Şotlandiya referendum keçirə bilməyəcək

Bakı:

27 °C

69 %

4 m/s

Əlaqə

AZ RU EN

Ana səhifə / Xarici siyasət / Şotlandiya referendum keçirə bilməyəcək

Şotlandiya referendum keçirə bilməyəcək

25.11.2022 [10:51]

Britaniya Ali Məhkəməsi müstəqillik haqqında referendumun keçirilməsinə dair müraciəti rədd edib

N.BAYRAMLI

Şotlandiyanın müstəqillik referendumuna dair müraciəti Böyük Britaniya Ali Məhkəməsi tərəfindən qəbul olunmayıb. Ali Məhkəmə Şotlandiya hökumətinin Böyük Britaniya parlamentinin təsdiqi olmadan ikinci müstəqillik referendumunun keçirilməsi tələbini yekdilliklə rədd edib. Məhkəmənin qərarını oxuyan hakim Lord Rid bildirib ki, Şotlandiyaya özünüidarə hüququ verən konstitusiya tənzimləməsinə əsasən, Şotlandiya Parlamentinin səlahiyyətləri məhduddur və iki ölkə arasında birliyin taleyi ilə əlaqədar məsələlərdə Londonda Böyük Britaniya Parlamentinə verilən səlahiyyətlərdən istifadə edə bilməz.

Xatırladaq ki, Şotlandiya 1707-ci ildən Böyük Britaniyanın tərkibinə daxil edilib, 1997-ci ildə isə muxtariyyət alıb. 2014-cü ildə Şotlandiyada ilk dəfə müstəqilliklə bağlı referendum keçirilib. Həmin vaxt Şotlandiyanın müstəqilliyi kampaniyasının və Şotlandiya Milli Partiyasının (SNP) lideri olan Aleks Salmond İttifaq tərəfdarlarının lideri Alister Darlinqlə qarşı-qarşıya gəlib. Şotlandiyanın o vaxtkı baş naziri Salmond bildirmişdi ki, müstəqil Şotlandiya daha varlı və ədalətli bir cəmiyyət olacaq: “Şotlandiyada yaşayan və çalışan insanlardan başqa heç kəs bu ölkəni yaxşı idarə edə bilməz”. Amma həmin il sentyabrın 18-də keçirilən referendumda seçicilərin 55 faizi Böyük Britaniyanın tərkibində qalmağa səs vermişdi.

Şotlandlar ikinci referendum keçirmək istəyini hələ Boris Consonun Britaniya hökümətinə rəhbirlik etdiyi dövrdə bəyan etmişdilər. Belə ki, Şotlandiyanın Baş naziri Nikola Stercen gələn il oktyabrın 19-da yeni müstəqillik referendumu keçirməyi planlaşdırıldığını açıqlamışdı. Stercen Böyük Britaniyanın Baş naziri Boris Consona məktub yazaraq referendumun keçirilməsi üçün ondan rəsmi razılıq alacağını demişdi. O, təklifin qəbul edilməyəcəyi təqdirdə isə planla bağlı qətiyyətlə hərəkət edəcəklərini bildirmişdi. N.Stercen hökumətin icazəsi olmadan referenduma getmək üçün müraciət ərizəsini Böyük Britaniya Ali Məhkəməsinə göndərəcəklərini də qeyd etmişdi. Regional hökumətin Baş naziri Ali Məhkəmənin Şotlandiya hökumətinin xeyrinə qərar verəcəyi təqdirdə referendum aktını Şotlandiya parlamentindən tez bir müddətdə keçirəcəyini də demişdi. Amma göründüyü kimi Ali Məhkəmə Şotlandiyanın bu müraciətini rədd etdi.

Bu, o deməkdir ki, Böyük Britaniya hökuməti ikinci referendumun keçirilməsinə qarşıdır. Bununla belə, Şotlandiya Milli Partiyası regional administrasiyada, 2016-cı ildə Brexit referendumunda şotland seçicilərin Avropa İttifaqından çıxmağın əleyhinə səs verdiyinə diqqət çəkərək, şərtlərin kökündən dəyişdiyini və yenidən referendum hüququnun ortaya çıxdığını müdafiə edir. Şotlandiyanın Baş naziri Nikola Stercen referendumun gələn il oktyabrın 19-da keçirilməsini təklif etsə də, Britaniya hökuməti bunu təsdiqləməkdən imtina edib. Mühafizəkar hökumətin liderləri, o cümlədən son Baş nazir Rişi Sunak, ölkə daxilində yüksək inflyasiya böhranı və xaricdəki Ukrayna müharibəsi ilə mübarizə apararkən, ölkənin müstəqillik referendumunu keçirə bilməyəcəyini və 2014-cü il referendumunun nəticəsinə hörmət edilməli olduğunu bildirib.

Məhkəmənin qərarı və Şotlandiya administrasiyasının Baş naziri Nikola Stercenin şərhindən sonra Şotlandiyanın bir çox şəhər və qəsəbələrində nümayişlərin keçirilməsi planlaşdırılır.

Paylaş:

Baxılıb: 1247 dəfə