İqtisadi platformada siyasi gəlişmələr

Bakı:

26 °C

61 %

10 m/s

Əlaqə

AZ RU EN

Ana səhifə / Xarici siyasət / İqtisadi platformada siyasi gəlişmələr

İqtisadi platformada siyasi gəlişmələr

09.07.2022 [11:51]

MÜBARİZ

İyulun 7-8-də İndoneziyanın Bali adasında keçirilən G20 ölkələrinin xarici işlər nazirlərinin görüşü başa çatsa da, belə görünür ki, tədbirlə bağlı müzakirələr hələ uzun müddət bitməyəcək. Söhbət heç də sammit çərçivəsində baş tutan sessiyalarda qlobal iqtisadiyyatın ayrı-ayrı məsələləri ətrafında aparılan müzakirələrdən getmir. Əsasən, beynəlxalq iqtisadi platforma kimi səciyyələndirilən G20-nin budəfəki sammiti, həm də iştirakçıların siyasi gəlişmələri ilə yadda qaldı.

Dünyanın G20-dən gözləntiləri

G20 ölkələrinin xarici işlər nazirlərinin budəfəki toplantısı bütün dünya üçün çox həssas olan bir dönəmə təsadüf etdi. İqlim dəyişiklikləri, qlobal pandemiya, Rusiya-Ukrayna müharibəsi və bu kimi digər hadisələr beynəlxalq birlik üçün ciddi təhdidlər yaradıb.

Dünyada müşahidə edilən mənfi təzahürlərin fonunda G20-nin mötəbər tədbirindən gözləntilər böyük idi. Hamı o ümiddə idi ki, yaranan qlobal çağırışlara adekvat olaraq dünyanın iqtisadi güc mərkəzləri məhz qlobal həmrəylik nümayiş etdirərək birgə çıxış yolları arayacaq və səylərin, fəaliyyətlərin əlaqələndirilməsinə hesablanan mesajlar verəcəklər.

G20 samitindən belə gözləntilər heç də əbəs yerə yaranmayıb. Burada təmsil olunan ölkələrin siyahısına ABŞ, Argentina, Avstraliya, Almaniya, Braziliya, Böyük Britaniya, Kanada, İndoneziya, İtaliya, Fransa, Hindistan, Meksika, Rusiya, Səudiyyə Ərəbistanı, Cənubi Afrika Respublikası, Cənubi Koreya, Çin, Türkiyə və Yaponiya daxildir. Adıçəkilən ölkələri dünyanın iqtisadi inkişaf trendlərini müəyyənləşdirən dövlətlər kimi də səciyyələndirmək mümkündür. Bütövlükdə, G20 ölkələri dünya iqtisadiyyatının 80 faizini, əhalinin üçdə ikisini və qlobal ticarətin dörddə üçünü birləşdirir. Statistikaya istinadən deyə bilərik ki, qlobal iqtisadiyyat əsasən G20-də formalaşır.

İqtisadi platformada siyasi çatlar

Rusiya-Ukrayna müharibəsinin dünyanı iki yerə böldüyünü hər kəs təsdiqləyə bilər. Bu, G20 görüşündə də açıq-aydın hiss olundu. Tədbir iştirakçıları bir sıra məqamlarda müzakirələrin mövzusunu, G20 platformasının iqtisadi mahiyyətini unudaraq Rusiyanı müharibə düyməsini basdığına görə, tənqid etdilər. Ayrı-ayrı ölkələrin xarici işlər nazirləri rusiyalı həmkarları ilə görüşməkdən ümumiyyətlə imtina etdilər. Sessiyalarda Rusiyanın G20 platformasından kənarlaşdırılması mesajları bir daha eşidildi. Böyük Britaniya, Almaniya, Fransa, Kanada, ABŞ, İtaliya və Yaponiyanın xarici işlər nazirləri rusiyalı həmkarlarıyla bir masada oturmamaq üçün ev sahibinin təşkil etdiyi ziyafətə belə qatılmadılar.

Tədbirdə iştirak edən ayrı-ayrı dövlətlərin xarici işlər nazirləri isə adıçəkilən ölkələrdən olan həmkarlarının mövqeyini bölüşmək istəməyiblər. Məsələn, Çin Xalq Respublikasının xarici işlər naziri Van İ Avropa Komissiyasının rəsmisi Jozef Borellə görüşdə bəyan edib ki, Ukrayna böhranının həllinə nail olmaq üçün daha real yanaşma tələb olunur. Bununla da o, ölkəsinin tərəflər arasında bərabərlik işarəsi qoyduğu qənaətini bütün dünyanın diqqətinə çatdırıb. Beləliklə, iqtisadi platformanın siyasi məsələlərə görə parçalandığı göz qabağındadır.

Foto qalmaqalı

G20 görüşündə müzakirələrə yol açan məqamlardan biri də foto qalmaqalıdır. Bütün dünyada qəbul edilən rəsmi etiket G20 tədbirində yenə də siyasi ambisiyalara görə pozulub. Belə ki, görüşdə G20 ölkələrinin xarici işlər nazirləri Rusiya XİN-in rəhbəri Sergey Lavrovla foto çəkdirməkdən imtina ediblər. Bu barədə “Kyodo” agentliyi məlumat yayıb. Bildirilir ki, iki gün davam edən Bali görüşündə xatirə fotosu çəkilməyib, buna səbəb bir sıra diplomatların, o cümlədən ABŞ Dövlət katibi Entoni Blinkenin Rusiya xarici işlər naziri Sergey Lavrovla şəkil çəkdirməkdən imtina etməsi olub.

G20 görüşünün yekunlarını dəyərləndirən Rusiyanın xarici işlər naziri Sergey Lavrov isə öz növbəsində Qərb ölkələrini qlobal iqtisadiyyatdakı problemlərlə bağlı müzakirələr aparmaq əvəzinə, Rusiyanın ünvanına ittihamlar yaratmağa üstünlük vermələrinə görə qınayıb. Rusiya XİN-in rəhbərinin foto qalmaqalına münasibəti də özünü çox gözlətməyib. O, məsələyə münasibətini “Mən heç kəsi birlikdə foto çəkdirməyə dəvət etmədim” ifadəsi ilə bildirib. Rusiya XİN-in rəhbəri G20-ni “siyasi klub” kimi səciyyələndirib.

Paylaş:

Baxılıb: 1225 dəfə