Litvadan Rusiyaya Kalininqrad qadağası...

Bakı:

13 °C

82 %

5 m/s

Əlaqə

AZ RU EN

Ana səhifə / Xarici siyasət / Litvadan Rusiyaya Kalininqrad qadağası...

Litvadan Rusiyaya Kalininqrad qadağası...

22.06.2022 [10:24]

N.BAYRAMLI

Litva hakimiyyəti Avropa Komissiyası ilə məsləhətləşmələrdən sonra Avropa İttifaqının (Aİ) sanksiyalarına məruz qalan malların Rusiyadan Kalininqrad vilayətinə tranzitinə qadağa qoyub. Bunu Litvanın xarici işlər naziri Qabrielius Landsberqis Aİ ölkələrinin Xarici İşlər Nazirləri Şurasında çıxışı zamanı deyib. O qeyd edib ki, iyunun 18-dən sanksiyaya məruz qalan mallar artıq Litva ərazisindən keçə bilmir. Bir neçə gün əvvəl isə Kalininqrad vilayətinin qubernatoru Anton Alixanov bildirmişdi ki, Litva Dəmir Yolları Aİ sanksiyalarına daxil olan böyük bir qrup malın tranzitinin dayandırılması barədə Kalininqrad Dəmir Yolunu xəbərdar edib. İlkin hesablamalara görə, bu, tikinti materialları, sement və metallar daxil olmaqla, malların çeşidinin 40-50 faizini təşkil edir. “Bu, regionumuzu iqtisadi cəhətdən boğmaq cəhdidir”-deyə, Anton Alixanov bildirib.

Rəsmi Moskva isə Litvanın qərarına çox sərt reaksiya verib. Rusiya Prezidentinin mətbuat katibi Dmitri Peskov Vilnüsün qərarını qəbulolunmaz hesab edib. Rusiya Xarici İşlər Nazirliyi isə Litvanın müvəqqəti işlər vəkili Virciniya Umbrasieneni çağıraraq etiraz notası təqdim edib və məhdudiyyətlərin dərhal aradan qaldırılması tələb olunub. Bildirilib ki, bu addım Rusiya Federasiyası və Avropa İttifaqının Birgə Bəyanatını pozur və Litva tərəfinin təxribatıdır. “Yaxın gələcəkdə Kalininqrada yük tranziti bərpa olunmazsa, Rusiya öz milli maraqlarını qorumaq üçün tədbirlər görmək hüququnu özündə saxlayır”, deyə - Rusiya XİN bəyan edib.

Rusiyanın Təhlükəsizlik Şurasının katibi Nikolay Patruşev də bildirib ki, rəsmi Moskva bu cür düşmənçilik hərəkətlərinə mütləq reaksiya verəcək: “İdarələrarası formatda müvafiq tədbirlər hazırlanır və yaxın vaxtlarda həyata keçiriləcək. Onların nəticələri Litva əhalisinə ciddi mənfi təsir göstərəcək”.

Rusiya Federasiya Şurasının sədr müavini Konstantin Kosaçev isə deyib ki, Litva Kalininqradın blokadasına başlamaqla Avropa İttifaqının öhdəliklərinə də təsir edən bir sıra beynəlxalq hüquqi aktları pozur.

“Litva tərəfindən Kalininqrad vilayətinin faktiki blokadasını yaratmaq cəhdi Rusiyanın bu region üzərində suverenliyinin pozulmasıdır və bu, Rusiyanın çox sərt və tamamilə qanuni hərəkətləri üçün əsas ola bilər”. Bu fikirləri isə Rusiya Federasiya Şurasının Konstitusiya Qanunvericiliyi Komitəsinin sədri Andrey Klişas bəyan edib.

Yeri gəlmişkən, Avropa İttifaqının Moskvadakı nümayəndəliyinin rəhbəri Markus Ederer Rusiyanın Xarici İşlər Nazirliyinə çağırılıb. M. Edererin XİN-ə çağırılmasına səbəb Litva tərəfindən Rusiya subyektlərindən Kalininqrad vilayətinə bir neçə məhsulun daşınmasına məhdudiyyət qoyulması olub. Avropa İttifaqı isə Rusiyanın Litvaya qarşı təhdidlərinə hələ ki, reaksiya verməyib. Kalininqradla bağlı verilən qərarın Rusiyanın Ukraynaya qarşı hərbi təcavüzünə qarşı atılan addım olduğu bütün dünyaya məlumdur. Bu sanksiyalar Rusiyanın hərbi addımlarını dayandırmağa məcbur etmək məqsədi daşıyır. Amma rəsmi Moskvanın Litvaya qarşı sərt mövqeyi regionda yeni gərginliyə yol aça bilər.

Paylaş:

Baxılıb: 1110 dəfə