“Qarabağın qapısı” açılır: Ərdoğan Füzuliyə gəlir

Bakı:

20 °C

71 %

9 m/s

Əlaqə

AZ RU EN

Ana səhifə / Xarici siyasət / “Qarabağın qapısı” açılır: Ərdoğan Füzuliyə gəlir

“Qarabağın qapısı” açılır: Ərdoğan Füzuliyə gəlir

05.10.2021 [17:31]

Türkiyə Prezidentinin bu səfəri əməkdaşlığa və sülhə “yeni nəfəs” vəd edir

Qısa zaman ərzində, cəmisi altı aya ərsəyə gələn və Qarabağın ilk beynəlxalq statuslu hava limanı olan Füzuli Beynəlxalq Hava Limanının yaxın günlərdə rəsmi açılışı nəzərdə tutulur. Açılışa Türkiyə Prezidenti Rəcəb Tayyib Ərdoğan da qatılacaq. Bununla bağlı Türkiyə Prezident Administrasiyasının sözçüsü İbrahim Kalın “Haber Global”a müsahibəsində deyib.

Vurğulamaq lazımdır ki, Füzuli Beynəlxalq Hava Limanının açılışı regional təhlükəsizliyin təmini, o cümlədən iqtisadi münasibətlərin inkişafı baxımından yeni mərhələnin başlanğıcıdır. Soçi görüşünün ardından Türkiyə liderinin bu açılışda iştirakı isə son dövrlərdə yenidən aktiv müzakirə predmetinə çevrilmiş kommunikasiya xətlərinin açılması, konkret olaraq Zəngəzur dəhlizinin reallaşması məsələsini aktuallaşdırır. Bu mənada, ekspertlərin də fikrincə, açılışda səslənəcək mesajlar Cənubu Qafqazın inkişafının gələcək yol xəritəsinin müəyyənləşdirilməsi baxımından böyük əhəmiyyət daşıyır.

Milli Məclisin deputatı, Azərbaycan - Türkiyə parlamentlərarası əlaqələr üzrə işçi qrupunun üzvü Ramil Həsən qəzetimizə açıqlamasında Azərbaycan ilə Türkiyə arasındakı münasibətlərin rəsmən strateji müttəfiqlik səviyyəsində olduğunu və gündən-günə inkişaf etdiyini bildirib. Onun sözlərinə görə, bu əlaqələrin möhkəmlənməsində hər iki dövlətin başçıları arasındakı səmimi qardaşlıq münasibətləri xüsusi əhəmiyyət daşıyır: “Şübhəsiz ki, münasibətlərin möhkəmlənməsində ikitərəfli qarşılıqlı səfərlər və bu səfərlər çərçivəsində regionun gələcək inkişafı ilə bağlı səsləndirilən mesajlar da böyük önəm daşıyır. Hələ iyul ayında cənab Ərdoğanın Şuşaya səfəri zamanı iki dövlət arasında strateji müttəfiqliklə bağlı bəyannamə imzalanmışdı. Budəfəki səfərdən də gözləntilər olduqca böyükdür. Çünki Qarabağda ilk dəfə beynəlxalq statuslu hava limanı açılır və qardaş ölkə olsa belə, bir xarici dövlətin başçısının orada iştirakı xüsusi anlam daşıyır. Xüsusilə də, son dövrlərdə dünyanın aparıcı iqtisadi siyasi güc mərkəzinə çevrilməkdə olan Türkiyənin prezidentinin bu açılışa gəlməsi prosesə böyük dəstək ifadəsidir”.

Hava limanı açılışında Azərbaycan-Türkiyə əməkdaşlığının inkişaf predmetləri ilə yanaşı regional əməkdaşlıqla bağlı yeni mesajların və bəyanatların şahidi ola biləcəyimizi istisna etməyən R.Həsənin fikrincə, bizi qarşıda maraqlı proseslər gözləyir. “Türkiyə bir daha Azərbaycanın regionda davamlı sülhə nail olunması istiqamətində atdığı addımları dəstəklədiyini göstərir. Artıq bölgədə dayanıqlı sülhün təmin olunması ilə bağlı müsbət fikirlər səslənir və Türkiyənin bu dəstəyi indiki halda olduqca əhəmiyyətli və vacibdir”, - deyən millət vəkili əlavə edib ki, bir neçə gün öncə Rusiya və Türkiyə liderləri arasında baş tutmuş Soçi görüşü də bütövlükdə regionun gələcəyi üçün mühüm anlam kəsb edir. R.Həsən “Qarabağın hava qapısı” adlandırılan hava limanının açılışı zamanı Soçi görüşündə müzakirə olunmuş məsələlərlə bağlı müəyyən məsləhətləşmələrin və fikir mübadiləsinin aparılacağını da istisna etmir: “Regionda davamlı sülhə nail olunması, dövlətlər arasında əməkdaşlığın inkişafı Azərbaycan və Türkiyədən daha çox Ermənistan üçün lazımdır. Buna nail olmaq üçün hər kəs əlini daşın altına qoymalıdır. Yəni Ermənistan üzərinə götürdüyü öhdəliyə riayət etməlidir. İnanıram ki, Soçi görüşü bu proseslərə də böyük təkan verəcək. Əminəm ki, yaxın zamanda Zəngəzur dəhlizinin açılması ilə bağlı verilmiş sözlərin tutulmasının, nəqliyyat kommunikasiya infrastrukturlarının reallaşmasının şahidi olacağıq”.

Politoloq Zaur Məmmədov isə vurğulayıb ki, Füzuli Beynəlxalq Hava Limanının qısa zamanda inşa edilməsi Azərbaycan dövlətinin infrastruktur layihələrinin reallaşması istiqamətindəki iradəsini göstərir. Z.Məmmədovun fikrincə, yenidənqurma, bərpa işləri uzunmüddətli zaman tələb etsə də, Azərbaycan dövləti vaxtilə öz doğma yurd-yuvalarından qovulmuş vətəndaşlarımızın yenidən öz doğma torpaqlarına qayıtmasını prioritet sayır, buna qısa zamanda nail olmağı planlaşdırır. Bu mənada, ən vacib məsələ isə yeni infrastrukturların qurulmasıdır: “Qarabağda beynəlxalq statuslu Hava Limanının istifadəyə verilməsi stratej əhəmiyyət daşıyır. Cənab Prezidentin də ifadə etdiyi kimi bu hava limanı “Qarabağın hava qapısı”dır. Türkiyə Prezidentinin bu Hava Limanının açılışına qatılması isə qardaş dövlətin müharibə dövründə olduğu kimi postmüharibə dövründə də Azərbaycanın yanında olduğunu göstərir. Bu gün Türkiyə və Azərbaycan istənilən təhlükəni zərərsizləşdirmək iqtidarındadır. Bizi istəyən və istəməyən qüvvələr də bunu görür. Hər kəs anlayır ki, Azərbaycan və Türkiyə qarşıdakı illərdə həm Zəngəzurda, həm Qarabağda, ümumilikdə, Qafqazda uzunmüddətli, strateji hədəfləri bəlli olan işlər aparacaqlar”.

Türkiyə ilə Azərbaycanın işğaldan azad edilmiş regionların bərpası prosesində də əməkdaşlıq etdiyini diqqətə çatdıran Z.Məmmədovun sözlərinə görə, hazırda ən önəmli məsələ “Zəngəzur layihəsi” və onun reallaşmasıdır. “Bəzi dövlətlər Zəngəzur dəhlizini özünə rəqib hesab edir. Türkiyə və Azərbaycan isə regiona elə bir layihə təqdim edir ki, bu layihə dövlətləri siyasi cəhətdən də yaxınlaşdıracaq. 40 kilometri Ermənistan ərazisindən keçəcək bu yol Şərqlə Qərbi, Şimalla Cənubu, ən nəhayət, Avropa ilə Asiyanı Azərbaycanda qovuşduracaq. Bu yol Londondan Pekinə, Hind okeanından Şimal Buzlu okeana qədər müxtəlif yüklərin daşınmasına imkan verəcək, qitələr, ölkələr arasında sıx əlaqələrin qurulmasına yol açacaq”, - deyə politoloq əlavə edib.

Pərviz Sadayoğlu

Paylaş:

Baxılıb: 1184 dəfə