Xətai rayonunun nümayəndə heyəti Türkiyənin Mersin vilayətində səfərdə olub

Bakı:

4 °C

87 %

10 m/s

Əlaqə

AZ RU EN

Ana səhifə / Xarici siyasət / Xətai rayonunun nümayəndə heyəti Türkiyənin Mersin vilayətində səfərdə olub

Xətai rayonunun nümayəndə heyəti Türkiyənin Mersin vilayətində səfərdə olub

14.03.2015 [10:46]

Bakı şəhəri Xətai rayon İcra Hakimiyyətinin başçısı Razim Məmmədov, Milli Məclisin deputatı Hüseynbala Mirələmov, Xətai rayon bələdiyyəsinin sədri Teymur Məmmədovun daxil olduğu nümayəndə heyəti Türkiyənin Mersin vilayətində səfərdə olub. Səfər Bakının Xətai rayonu ilə Türkiyənin Mersin şəhəri, eləcə də Mersinin Xətai rayonu ilə qardaşlaşmış Tarsus rayonu arasında əməkdaşlıq əlaqələri çərçivəsində həyata keçirilib. Bu əlaqələrin nəticəsi olaraq Tarsusda 2,5 hektar ərazidə salınan Heydər Əliyev Parkında yenidənqurma işləri tamamlanmaq üzrədir. Səfər çərçivəsində nümayəndə heyəti, eləcə də azərbaycanlı və türkiyəli mütəxəssislər Heydər Əliyev Parkında görülən işlərlə tanış olublar. Ərazinin abadlaşdırılması, idman meydançaları, uşaqlar üçün əyləncə meydançalarının yaradılması, peyzaj işləri ilə bağlı müzakirələr aparılıb.
Səfər çərçivəsində Azərbaycan nümayəndə heyətinin qonaq kimi iştirakı ilə Mersin Bələdiyyə Məclisinin toplantısı keçirilib. Toplantıda Xocalı soyqırımının pislənməsi ilə bağlı qətnamənin qəbul edilməsi məsələsi Məclisin gündəliyinə daxil edilib. Yaxın günlərdə qəbul edilməsi nəzərdə tutulan qətnamə Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” kampaniyası çərçivəsində görülən işlərin davamı olacaq. Toplantıdan sonra Mersin Böyükşəhər Bələdiyyəsinin sədri ilə görüşən Xətai rayon İcra Hakimiyyətinin başçısı Razim Məmmədov, deputat Hüseynbala Mirələmov və nümayəndə heyətinin digər üzvləri Xocalı soyqırımı ilə bağlı qəbul edilən mühüm qərara görə Mersin Bələdiyyəsinə minnətdarlıqlarını bildiriblər.
Bələdiyyə sədri Burhanettin Kocamaz bu addımı Azərbaycanla Türkiyənin qardaşlıq münasibətlərinin təzahürü kimi qiymətləndirib. O, 2012-ci ildə Bakıya etdiyi səfər zamanı paytaxtımızda gördüyü inkişafın onda yaratdığı xoş təəssüratlar barədə danışıb. Görüşdə qarşılıqlı əməkdaşlıq əlaqələrinin daha da genişləndirilməsi imkanları haqqında fikir mübadiləsi aparılıb. Nümayəndə heyəti Xətai rayonu ilə geniş əməkdaşlıq tarixinə malik olan Tarsusda da olub. Burada Tarsus şəhər bələdiyyəsinin sədri Şövkət Can ilə Xətai rayon nümayəndə heyəti arasında görüş olub. Görüşdə Xətai rayon İcra Hakimiyyətinin başçısı Razim Məmmədov səmimi qəbula görə nümayəndə heyəti adından bələdiyyə sədrinə minnətdarlığını bildirərək, Azərbaycan və Türkiyə arasında mövcud dostluq əlaqələrindən danışıb. Xatırladaq ki, Xətai rayonu ilə Tarsus şəhəri 2007-ci ildə qardaşlaşıb. Tərəflər arasındakı əməkdaşlıq çərçivəsində 2011-ci ilin mart ayında Tarsusdakı Berdan çayı üzərindən salınan körpüyə Azərbaycan xalqının Ümummilli lideri Heydər Əliyevin adı verilib. Eyni zamanda, mövcud qardaşlıq münasibətlərini daha da sıxlaşdırmaq məqsədilə 12-15 aprel 2012-ci il tarixdə Burhanettin Kocamazın rəhbərliyi ilə nümayəndə heyətinin Bakı şəhəri, eləcə də Xətai rayonuna işgüzar xarakterli səfərləri də baş tutub.
Nümayəndə heyətinin üzvləri Tarsus bələdiyyəsində də olublar.
Görüşdə Tarsus və Xətai rayonunun yeni seçilmiş bələdiyyə sədrləri Şövkət Can və Teymur Məmmədov əməkdaşlığın inkişafı ilə bağlı fikir mübadiləsi aparıblar. Tarsus Bələdiyyə rəhbərinə Azərbaycan xalçası, eləcə də xatirə hədiyyələri təqdim edilib.

Paylaş:

Baxılıb: 1292 dəfə