Rusiyalı jurnalist Natalya Kirillova Qarabağ həqiqətlərini nə üçün təhrif edir?!

Bakı:

25 °C

63 %

5 m/s

Əlaqə

AZ RU EN

Ana səhifə / Xarici siyasət / Rusiyalı jurnalist Natalya Kirillova Qarabağ həqiqətlərini nə üçün təhrif edir?!

Rusiyalı jurnalist Natalya Kirillova Qarabağ həqiqətlərini nə üçün təhrif edir?!

16.01.2015 [10:08]

Yanvarın 15-də Rusiyanın “5 Kanal” televiziyasının xəbərlər proqramında 20 Yanvar hadisələrinin 25-ci ildönümünə həsr olunmuş süjet göstərilib. Süjetin müəllifinin fikrincə, 25 il əvvəl keçmiş sovet ordusu bölmələrinin Bakıda törətdiyi qanlı qırğın Ermənistan-Azərbaycan, Dağlıq Qarabağ münaqişəsinin başlanmasına səbəb olub. Azərbaycanın qədim Qarabağ torpağı “birdən-birə iki sovet marşalı Baqramyan və Babacanyanın vətəni” adlandırılsa da, bu torpaqda dünyaya göz açmış və bu torpağın əsl sahibləri olan azərbaycanlılardan söhbət belə getmir. Sanki Qarabağın Üzeyiri, Natəvanı, Xan Şuşinskisi, Qasım bəy Zakiri yox imiş...
Süjetin müəlliflərinin hansı yolla tanınmamış “Dağlıq Qarabağ respublikası”na gedib çıxmasının hüquqi tərəfinin araşdırılmasını səlahiyyətli orqanların ixtiyarına buraxaraq onu da deyək ki, 20 Yanvar hadisələrini və onun nəticələrini nədənsə elə, əsasən, erməni tərəfi - “Qarabağ müharibəsinin iştirakçısı, konfliktoloq Aşot Beqlaryan, tanınmamış “Dağlıq Qarabağ respublikası”nda “qaçqınlar cəmiyyəti”nin sədri Saryan Sarasar, “həlak olmuş əsgərlər muzeyi”nin direktoru Artuq Arustamyan” şərh edirlər. A.Beqlaryan deyir ki, Qarabağ hadisələrinin alovlanmasına səbəb bu bölgəyə azərbaycanlı rəhbərin təyin edilməsi olub. “Bu, əsasən, ermənilər yaşayan bölgənin əhalisinin narazılığına səbəb oldu və nəticədə qırğınlar başlandı”. Beqlaryanın bu ağ yalanının Rusiyanın “5 kanal”ından səslənməsi təəssüf və təəccüb doğurur. Beqlaryan yalanlarını davam etdirərək deyir: “Qarabağ ermənilərini əvvəllər separatçı, ekstremist adlandırırdılar, ancaq vaxt keçib, qarabağlıların nəyin naminə mübarizə apardıqları aydın olub”.
Görəsən “qarabağlılar” deyəndə Beqlaryan kimi nəzərdə tutur? Evindən-eşiyindən didərgin düşmüş minlərlə azərbaycanlı qarabağlı deyilmi?! Nə üçün süjetdə Qarabağın azərbaycanlı əhalisinin fikirləri yer almadı?!
Müəllif Natalya Kirillova Sumqayıtda yaşamış qohumunun taleyindən bəhs edən Qarabağ ermənisi ekrandan itən kimi kadr arxasında tarix dərsi keçməyə başlayır. O deyir: “Cəmi beş ildən sonra burada, Sovet İttifaqının cənubunda dağlıq rayonu bölə bilməyən azərbaycanlılar və ermənilər arasında qanlı müharibə başlanacaq”.
20 Yanvar hadisələrindən 5 il sonra? Bu üzdəniraq jurnalist tarixi diqqətlə öyrənmədən niyə belə ağrılı mövzuda süjet hazırlamağı üzərinə götürüb. Bəlkə ona görə ki, bu süjet onun üçün mühasibat sənədində növbəti qeyddir? Bəlkə də bu süjetin sifarişçiləri tarixi yaxşı bilmirlər? Özlərinin saxtalaşdırdıqları tarixdən indi özləri də baş çıxarmaqda çətinlik çəkirlər. Ancaq xanım Kirillova bilməlidir ki, onun beləcə soyuqqanlılıqla hazırladığı, səthi şərhlərlə müşayiət etdiyi süjetdə söhbət açdığı o ərazi - Qarabağ bir milyona yaxın azərbaycanlı məcburi köçkünün doğulduğu və yaşadığı doğma torpaq, Azərbaycanda və onun sərhədlərindən kənarda yaşayan milyonlarla azərbaycanlının qəlbinin bir hissəsidir.
Qeyd edək ki, süjetdə Xocalı soyqırımından kadrlar göstərilsə də, bu barədə bir kəlmə də danışılmadı.

Paylaş:

Baxılıb: 1618 dəfə