Vitaminsizlik bir bəla, çox vitamin isə...

Bakı:

33 °C

25 %

4 m/s

Əlaqə

AZ RU EN

Ana səhifə / Sosial / Vitaminsizlik bir bəla, çox vitamin isə...

Vitaminsizlik bir bəla, çox vitamin isə...

16.11.2023 [11:35]

Özbaşına vitamin qəbulunun ziyanları nədir?

Son zamanlar “Vitaminin zərəri yoxdur”, “Xəstələnməmək üçün vitamin qəbulu şərtdir”, “Uşağım yaxşı yemir, vitamin almalıyam” düşüncəsi ilə özbaşına vitamin qəbulu halları artıb. Düzdür, insan orqanizminin normal inkişafı üçün vacib elementlərdən biri vitaminlərdir. Vitamin əksikliyi nəticəsində bədəndə bir sıra problemlər baş qaldırmağa başlayır. Lakin həkim təyinatı olmadan vitaminlərin özbaşına qəbulu təhülkəlidir.

Mütəxəsisslər istənilən vitaminlərin orqanizmdə normadan çox olmasının sağlamlıq üçün ziyanlı olduğunu bildirirlər. Belə ki, vitaminlərin həddindən artıq dozada olması xərçəng, urolitiyaz və osteoporozun inkişafına səbəb ola bilər. Bu baxımdan istər böyüklərdə, istərsə də azyaşlılarda vitaminlərin normal dozada və həkim təyinatı ilə istifadəsi vacibdir.

Hər bir xəstə üçün fərdi doza...

Mövzu barədə fikirlərini “Yeni Azərbaycan”la bölüşən həkim Şəmsiyyə Namazlı bildirib ki, bədəndə vitaminlərin çox olması səbəbindən ciddi pozuntular başlaya bilər. Onun sözlərinə görə, böyük miqdarda Vitamin D qəbulu böyrəklərdə, ürəkdə, qan damarlarında kalsiumun çökməsinə və osteoporozun inkişafına səbəb olur: “C vitamininin normadan çox qəbulu urolitiyaz xəstəliyinə səbəb ola bilər. A vitamininin çox olması isə xərçəngə tutulma riskini artıra bilər.

Ümumiyyətlə, bu vitaminlərin profilaktik dozaları onların çatışmazlığını müalicə etmir. Bunun üçün testlər və düzgün müalicə təyin edən bir mütəxəssislə əlaqə saxlamaq tövsiyə olunur. Həkimlər hər bir xəstə üçün dozanı fərdi olaraq seçirlər”.

Yaşı 65-dən çox olanlar...

Həkim qeyd edib ki, insanların internetdə olan vitamin çatışmazlığı müalicəsi protokollarından istifadə etmələri də çox təhlükəlidir. Belə ki, bu da doza həddini aşmağa səbəb ola bilər: “Dərmanlarda göstərilən dozaların təsirsiz olduğuna səhvən inanırlar. Əslində, istehsalçı həddindən artıq dozanın qarşısını almaq üçün profilaktik normanı göstərir. Bu baxımdan vitaminlərin özbaşına qəbulu yolverilməzdir. Xüsusilə də yaşlı adamların həkim təyinatı olmadan vitamin qəbul etməsi təhlükəlidir. 65 yaş üzərindəki insanlara vitamin tərkibli dərmanların istifadəsinə icazə verilmir. Çünki vitaminlər o bədəndə yatmış olan hansısa xərçəng hüceyrəsini oyatmaq qabiliyyətinə malikdir. Tərkibinin miqdarı gündəlik vitamin ehtiyacından da az olan vitaminlərin bir zərəri dəyməz. Amma ciddi tərkibi olan vitaminlərin, xüsusilə B, A, E, D vitamininin qəbulu həkim göstərişi olmadan yolverilməzdir”.

E vitaminindən çox istifadə etsəniz...

Vitamin çatışmazlığının özünəməxsus əlamətləri olduğunu bildirən Ş.Namazlı müxtəlif sağlıq problemlərinin hansı vitamin əksikliyindən yarandığını açıqlayıb: “A vitamini çatışmazlığı xüsusilə görməyə təsir edir. Gözün zəifləməsinə səbəb olur. B12 vitamin çatışmazlığı yaddaşsızlığa, qan azlığına səbəb ola bilər.

D vitamini çatışmadıqda əzələ yorğunluğu, sümük ağrıları, tez yorulma halları baş verir. Qaraciyər üçün vacib olan vitamin E-dir. Bunu yenə də həkim təyin etməlidir. Bu vitamin çatışmadıqda yumurta hüceyrəsində spermatazoidin inkişafının ləngiməsinə səbəb olur. E vitaminindən hədsiz çox istifadə isə qaraciyərdə hepatitin yaranmasına gətirib çıxara bilər.

C vitamini çatışmadıqda immun sistemi zəif olur. Xəstəlik, virusa yoluxma halları artır. Miqdarı çox olduqda laxtalanma sisteminə təsir edir. Bu səbəbdən xüsusilə də C vitamini iynələrini həkim göstərişi olmadan qəbul etmək olmaz”.

Yatmış hüceyrələri oyada bilərsiniz...

Ş.Namazlı hazırda insanların daha çox həkim müayinəsi olmadan B12 iynələrini vurdurduğunu qeyd edib: “Hansısa B12-lərin qəbulu yatmış hüceyrələri oyada və xərçəng yaranmasına səbəb ola bilər. Xüsusilə də qan xərçəngi. Bunun üçün vitamin qəbul edən zaman insanlar çox ehtiyatlı olmalıdırlar”.

Yeganə BAYRAMOVA

Paylaş:

Baxılıb: 911 dəfə