Səadət Sarayından xoşbəxtlik evinə

Bakı:

23 °C

94 %

3 m/s

Əlaqə

AZ RU EN

Ana səhifə / Sosial / Səadət Sarayından xoşbəxtlik evinə

Səadət Sarayından xoşbəxtlik evinə

23.04.2022 [11:52]

MÜŞFİQƏ

- Nikaha daxil olmaq barədə

ətraflı düşünmüsünüzmü?

- Bəli!

Neçə-neçə sevgiyə şahidlik edən, elə təməli də sevgi üzərində qurulan bir abidədən - Səadət Sarayından söhbət açacağıq. Bakını sevmə səbəblərimizdən biri olan bu möhtəşəm tikili cütlüklərin sevgilərini rəsmiləşdirdiyi ünvandır. Saray Bakının mərkəzində, Murtuza Muxtarov və Əhməd Cavadın adını daşıyan küçələrin kəsişməsində, M.Muxtarov küçəsi 6-da yerləşir.

Öz sahibləri burada səadət tapmadılar

Öz sahibləri belə burada səadət tapmasalar da, bina hər zaman sevgi atributu olaraq qalır. Şəhərin ən yaraşıqlı binalarından olan sarayın tarixçəsinə nəzər salaq. Bakının memarlıq ansamblında özünəməxsus yeri olan Səadət Sarayının binası milyonçu Murtuza Muxtarov tərəfindən tikdirilib.

Həyat yoldaşı Liza xanım Tuqanova ilə Venesiyada gəzərkən olduqca yaraşıqlı və əzəmətli bir bina görürlər. “Belə binada yaşayanlar necə də xoşbəxtdirlər!” - deyə Liza heyranlığını əri ilə bölüşür. Bu mənzərəni sakitcə seyr edən Murtuza bəy bu binanın bənzərini Bakıda tikdirmək qərarına gəlir. Bakının memarlıq incilərindən biri olan bu bina polyak mənşəli arxitektor İosif Ploşkonun layihəsi əsasında, “Qasımov qardaşları” şirkəti tərəfindən tikilib. Bina fransız qotik üslubunda inşa edilib, interyeri klassik, qotik və rokoko ənənəsində işlənib.

Nəticədə, 1912-ci ildə binanın tikintisi başa çatır. Bir gün Murtuza Muxtarov gəzinti adı ilə Liza xanımı faytona mindirib binanın qarşısına gətirir. Heyrətindən nə deyəcəyini bilməyən qadın, binanın qapısında qulluqçularının onları qarşıladığını görüncə və sarayın ona bağışlandığını eşidincə sevincinin həddi-hüdudu olmur. Bakı milyonçusu xanımı ilə bu sarayda 1920-ci ilə qədər yaşayır.

Azərbaycanda sovet rejimi qurulduqdan sonra saray bolşeviklərin ixtiyarına keçir. Evinə 3 nəfər rus zabitinin soxulduğunu görən Muxtarov bu rüsvayçılığa dözməyərək əvvəlcə onları, sonra isə özünü dəhlizdəcə güllələyir.

Oktyabr inqilabından sonra bina Əli Bayramov adına Qadın klubu, daha sonra isə Şirvanşahlar muzeyi kimi fəaliyyət göstərir.

Səadət Sarayında ilk nikah

Daha sonralar uzun illər “Nikah evi” kimi istifadə olunur. Açılışın birinci günündən gənclər ailə həyatı qurmaq üçün ilk yollarını buraya salır, ömürlərinin ilk xoşbəxt dəqiqələrini keçirirlər. Sarayda ilk dəfə 1967-ci ildə Tamilla ilə Altay cütlüyünə nikah bağlamaq nəsib olur. Cütlük xoşbəxtlik sarayının tarixinə əbədi həkk olunur. Zamanla Səadət Sarayı uzun illər Bakıda nikah mərasimlərinin keçirildiyi əsas məkan kimi şöhrət qazanır.

Xoşbəxtlik sarayının əvvəlki şöhrəti özünə qaytarıldı

Tarixi abidə Azərbaycan Respublikası Nazirlər Kabinetinin 2001-ci il 2 avqust tarixli qərarı ilə ölkə əhəmiyyətli tarixi və memarlıq abidəsi kimi qeydə alınır. 2012 - ci ildə saray əsaslı təmir və yenidənqurma işlərindən sonra istifadəyə verilir. Təntənəli mərasim, VİP qəbul, rəqs və gözləmə zalları, qəbul zamanı elektron və texniki xidmətin təmin edilməsi üçün otaqlar, eləcə də rəsmi görüş otağı, rəsmi danışıqların aparılması üçün geniş zallar da qonaqların zövqünü oxşayır.

Beləliklə, yüksək zövqlə görülən əsaslı yenidənqurma işləri nəticəsində Bakının daha bir memarlıq abidəsinə yeni həyat verilir, Səadət Sarayının əvvəlki şöhrəti özünə qaytarılır.

Arzu edirik ki, bu xoşbəxtlik sarayı qədər bizim xanımların həyatı işıqlı, fərəhli və gözəl olsun. Burada ailə həyatına atılan addımlar sevənləri mənalı günlərə qoşa aparsın.

Foto Dövlət Televiziyasının arxivindən götürülüb.

Paylaş:

Baxılıb: 966 dəfə