Akif Qurbanov: Azərbaycanda istifadə edilən vaksinlər “delta” ştamına qarşı effektivdir

Bakı:

25 °C

53 %

5 m/s

Əlaqə

AZ RU EN

Ana səhifə / Sosial / Akif Qurbanov: Azərbaycanda istifadə edilən vaksinlər “delta” ştamına qarşı effektivdir

Akif Qurbanov: Azərbaycanda istifadə edilən vaksinlər “delta” ştamına qarşı effektivdir

16.07.2021 [08:43]

“Virusun yeni yarana biləcək istənilən ştamlarından qorunmaq üçün peyvənd vurdurmaq yeganə çıxış yoludur”
Yeni növ koronavirus (COVID-19) infeksiyasının sürətlə yayılan “delta” ştamı dünyanın 111 ölkəsində və ərazisində aşkar edilib. Bu barədə Ümumdünya Səhiyyə Təşkilatı (ÜST) məlumat verib. Bildirilib ki, son iki ayda ÜST-ün bütün altı regionunu əhatə edən azı 111 ölkədə “delta” variantı aşkar edilib. Bu variant indiyə qədər aşkar edilmiş, xüsusi narahatlıq doğuran başqa variantlarla müqayisədə daha yüksək dərəcədə yoluxucu olması ilə fərqlənir.
Məlum olduğu kimi, Azərbaycanda da koronavirusun “delta” ştamı aşkarlanıb. Bir neçə gün öncə Azərbaycan Respublikasının Səhiyyə Nazirliyi, İcbari Tibbi Sığorta üzrə Dövlət Agentliyi və Tibbi Ərazi Bölmələrini İdarəetmə Birliyinin birgə məlumatında bildirilib ki, ölkədə koronavirusun “delta” variantı ilə 31, “alfa” variantı ilə 9 yoluxma halı qeydə alınıb.
Qeyd olunub ki, dünyada və ölkəmizdə aparılan tədqiqatlardan əldə olunmuş nəticələrin təhlili bir daha göstərib ki, virusun yeni və sürətlə yayılan təhlükəli variantlarından qorunmağın ən effektiv yolu vaksinasiyadır. Məlumat üçün bildirək ki, hazırkı dövrədək ölkəmizdə vurulan vaksin dozalarının ümumi sayı 4 milyon 300 min-ə yaxındır.
Məsələ ilə bağlı Tibbi Ərazi Bölmələrini İdarəetmə Birliyinin (TƏBİB) İdarə Heyəti yanında tibbi-elmi komitənin sədri, professor Akif Qurbanov açıqlamasında bildirib ki, Azərbaycanda yeni növ koronavirus (COVID-19) infeksiyası əleyhinə 4 çeşid peyvənddən istifadə edilir. Bunlar “SinoVac”, “AstraZeneca”, “Pfizer”, “Sputnik V” vaksinləridir. Onun sözlərinə görə, peyvəndlərin hər biri “delta” ştamına qarşı da effektivdir: “Virusun yeni yarana biləcək istənilən ştamlarından qorunmaq üçün peyvənd vurdurmaq yeganə çıxış yoludur. Mikroorqanizmlər orqanizmə daxil olandan və COVID-19 əleyhinə vaksinasiyadan sonra bədəndə virusa qarşı anticisimlər yaranmağa başlayır. Anticisimlər gələcəkdə virusları neytrallaşdırır. Beləliklə, vətəndaş ya xəstəliyə yoluxmur, ya da yüngül keçirir. Məhz vaksinasiya nəticəsində əmələ gələn anticisimlər mikroorqanizmləri məhv etdiyinə görə, vətəndaşlar peyvənd vurdurmaqdan çəkinməməlidirlər”.
“Unutmamalıyıq ki, vaksinasiya ilə yanaşı, fiziki məsafənin saxlanılması, tibbi maskalardan istifadə və əl təmizliyi kimi qaydalar virusun variantından asılı olmayaraq, xəstəlikdən qorunmağın, dünyada və ölkəmizdə normal həyata qayıtmağın yeganə yoludur”, - deyə A.Qurbanov xatırladıb.
MÜŞFİQƏ

Paylaş:

Baxılıb: 682 dəfə