Yay mövsümündə bakterial infeksiyalardan necə qorunmaq lazımdır?

Bakı:

25 °C

56 %

9 m/s

Əlaqə

AZ RU EN

Ana səhifə / Sosial / Yay mövsümündə bakterial infeksiyalardan necə qorunmaq lazımdır?

Yay mövsümündə bakterial infeksiyalardan necə qorunmaq lazımdır?

14.07.2021 [08:44]

Yaz-yay mövsümündə bakterial infeksiyalara daha çox rast gəlinir. Kəskin bağırsaq infeksiyaları da (KBİ) daha çox yay aylarında və payızın əvvəlində özünü büruzə verir. Mütəxəssislərin sözlərinə görə, hər il yay fəslində bu xəstəliklə bağlı müraciət edənlərin sayında artım müşahidə olunur. Bəs yay mövsümündə bakterial infeksiyalardan necə qorunmaq lazımdır?
Məsələ ilə bağlı Azərbaycan Tibb Universitetinin dosenti, tibb üzrə fəlsəfə doktoru, yoluxucu xəstəliklər üzrə mütəxəssis Elza Orucova bildirib ki, kəskin bağırsaq infeksiyaları infeksion xəstəliklər arasında respirator infeksiyalardan sonra 2-ci yeri tutan geniş yayılmış patologiyadır: “Hər il 500 milyon nəfər bu xəstəlikdən əziyyət çəkir. İnfeksiya mənbəyi xəstə şəxs və ya infeksiya daşıyıcılarıdır”.
E.Orucovanın sözlərinə görə, həm böyüklər, həm də uşaqlar bu xəstəliyə yoluxa bilərlər: “KBİ uşaqlarda və yaşlı şəxslərdə ağır keçir. Adətən, 1-7 yaş arası uşaqlar bağırsaq infeksiyasına yoluxurlar. Bağırsaq infeksiyalarının yayılması əhalinin məişət xüsusiyyətləri və sanitar mədəniyyətinin səviyyəsi ilə sıx bağlıdır. Xəstələr üçün bağırsaq problemini yaxın insanlarla belə müzakirə etmək xoşagəlməzdir. Hətta çoxları bu barədə həkimlə danışmaqdan belə utanırlar”.
Həkim vurğulayıb ki, bu infeksiyaların qarşısını almaq üçün sadə gigiyena qaydalarına riayət etmək kifayətdir: “İnfeksiya, adətən, qida, su, çirkli əllər və toxunma-məişət yolları, fekal-oral yollarla keçir. Ən təhlükəli yoluxma faktorları isə krant suyu, yuyulmamış meyvələr, çiy tərəvəzlər, salatlar, pasterizə olunmamış süd və süd məhsulları, çiy ət, dəniz məhsullarıdır”.
“Bu qrup infeksiyaların yüksək hərarət, ürəkbulanma və qusma, qarın ağrıları, ishal, bağırsaqda qaz yaranması (meteorizm) kimi simptomları xarakterikdir. Bağırsaq infeksiyaları yüngül mədə-bağırsaq pozuntusundan ağır vəziyyətə qədər bir neçə saat ərzində orqanizmin tam susuzlaşması ilə ölümlə nəticələnə bilər. Qusma və ishaldan qorxmaq lazım deyil, belə ki, orqanizm daxilə düşən zəhərlərdən qorunur və xilas olur. Ona gorə xəstəliyin birinci günü qusma və ishala qarşı hər hansı bir dərman vasitəsini qəbul etmək tövsiyə olunmur. Antibiotiklərin qəbulunun zəruriliyi barədə yalnız həkim qərar verə bilər”, - deyə mütəxəssis söyləyib.
“Çirkli əllərin xəstəliyi” adlanan bu infeksiyalardan qorunmaq üçün ancaq qaynanmış su içmək, yeməkdən əvvəl əlləri yumaq, meyvə və tərəvəzi qaynar su ilə durulamaq, qabığı zədəli olan, korlanmış, yumşalan meyvələri yeməmək lazımdır: “Bununla yanaşı, ərzaqları, xüsusən də ət, toyuq, yumurta və dəniz məhsullarını qaynatmaq, qızartmaq gərəkdir. Tez xarab olan ərzaq məhsulları soyuq şəraitdə saxlanılmalıdır. Soyuducuda belə olsa, qidanı uzun müddət saxlamaq olmaz. İstifadə müddəti bitmiş və soyuq şəraitdə saxlanılmayan ərzaq məhsullarından istifadə etmək tövsiyə olunmur. Bişirilən yeməyi otaq tempraturunda iki saatdan artıq saxlamaq yolverilməzdir. Eləcə də qarpız və yemişi tam almaq lazımdır. Həmçinin çimərliklərə gedərkən ancaq bu məqsəd üçün ayrılmış yerlərdən istifadə edilməlidir. Su hövzələrində və hovuzda çimərkən ağıza su damcısının düşməməsinə diqqət yetirilməlidir. Bu adi qaydalara riayət etməklə infeksiyalara yoluxmaqdan xilas olmaq mümkündür”.
MÜŞFİQƏ

Paylaş:

Baxılıb: 731 dəfə