Gömrük qaydalarına dəyişikliklərin əhəmiyyəti nədən ibarətdir?

Bakı:

20 °C

77 %

2 m/s

Əlaqə

AZ RU EN

Ana səhifə / Sosial / Gömrük qaydalarına dəyişikliklərin əhəmiyyəti nədən ibarətdir?

Gömrük qaydalarına dəyişikliklərin əhəmiyyəti nədən ibarətdir?

29.08.2020 [00:23]

Ekspertlər bildirirlər ki, bəhs olunan dəyişikliklər sahibkarların hüquqlarının qorunması, şəffaflığın və iqtisadi təhlükəsizliyin təmin olunması baxımından böyük önəm kəsb edir

Məlum olduğu kimi, Nazirlər Kabineti tərəfindən 21 avqust 2020-ci il tarixində “Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş Qaydaları”na dəyişikliklər həyata keçirilib. Son dəyişikliyə əsasən, fiziki şəxslər tərəfindən gətirilən kommersiya məqsədləri üçün nəzərdə tutulmayan malların ümumi məbləği 800 ABŞ dollarına, poçt göndərişləri ilə ölkə ərazisinə gətirilən kommersiya məqsədləri üçün nəzərdə tutulmayan mallar üçün müəyyən edilmiş güzəşt limiti 300 ABŞ dollarına endirilib. Bununla yanaşı, əgər vətəndaş ay ərzində bir dəfə deyil, bir neçə dəfə 300 ABŞ dollarını keçməmək şərtilə mal gətirirsə, burda vətəndaşa seçim hüquqları verilir. Onu da qeyd edək ki, sözügedən qaydalara zaman-zaman müvafiq dəyişikliklər edilir.

Ekspertlərin fikrincə, Azərbaycan Respublikasının Prezidenti İlham Əliyevin rəhbərliyi ilə ölkəmizdə bütün sahələrdə, həmçinin gömrük sahəsində aparılan genişmiqyaslı islahatlar - kölgə iqtisadiyyatına qarşı mübarizə, şəffaflığın təmin olunması istər gömrük qanunvericiliyində, istərsə də digər qanunvericiliklərdə bu kimi qaydaların yenidən işlənməsi, onlara düzəlişlər edilməsi zərurətini yaradır.Mütəxəssislər bildirirlər ki, bütövlükdə, bəhs olunan dəyişikliklər sahibkarların hüquqlarının qorunması, şəffaflığın və iqtisadi təhlükəsizliyin təmin olunması baxımından böyük önəm kəsb edir.

Məsələyə münasibət bildirən Milli Məclisin İqtisadi siyasət, sənaye və sahibkarlıq komitəsinin üzvü Məzahir Əfəndiyev deyib ki, 2018-ci il Prezident seçkilərindən sonra dövlət başçısı İlham Əliyev tərəfindən elan olunmuş islahatlar kontekstində çoxvektorlu iqtisadi siyasət həyata keçirilməkdədir: “Bir tərəfdən kadr islahatlarının, digər tərəfdən isə iqtisadiyyat subyektlərinin təkmilləşdirilməsi, yeni iqtisadi idarəçilik modelinin formalaşması, idxal və ixrac proseslərinin şəffaflaşdırılması, maliyyə nizam-intizamına ciddi nəzarətin tətbiqi, sahibkarlıq fəaliyyətinin bazar iqtisadiyyatı qanunlarına uyğunlaşdırılması əsas xətt olaraq ardıcıllıqla tətbiq olunmaqdadır”.

M.Əfəndiyevin sözlərinə görə, yeni çağırışlar və Prezident tərəfindən qoyulmuş tapşırıqlar fiskal siyasəti müəyyən edən orqanların qarşısında əlavə, təxirəsalınmaz tədbirlərin keçirilməsi vəzifəsini müəyyənləşdirir: “Bu baxımdan, gömrük və vergi orqanları, onların mütəxəssisləri real şəraitə uyğun olaraq ölkənin iqtisadi təhlükəsizliyinin qorunmasını, habelə iqtisadiyyatın şaxələndirilməsi və şəffaflaşdırılması üçün nəzərdə tutulan təkliflərlə hökumət qarşısında çıxış edir. Sözügedən qaydalara dəyişikliklər bilavasitə iqtisadiyyatımızın sağlamlaşması, həmçinin iqtisadi təhlükəsizliyimizin qorunması, qeydiyyat-uçot və statistik məlumatların pərakəndəliyinin qarşısının alınması istiqamətində xidmət göstərir”.

Milli Məclisin deputatı Azər Badamovun sözlərinə görə, dünyanın hər bir ölkəsində şəxsi istehlak üçün gətirilən mallarla gəlir əldə edilməsi üçün gətirilən mallar arasında fərqin müəyyən edilməsi üçün limitlər mövcuddur: “Dünya təcrübəsinə nəzər yetirdikdə, görürük ki, fiziki şəxslər tərəfindən poçt göndərişləri ilə ölkə ərazisinə gətirilən kommersiya məqsədləri üçün nəzərdə tutulmayan mallar üçün müəyyən edilmiş güzəşt limiti kifayət qədər aşağıdır. Əgər biz Avropanın hər hansı bir ölkəsinə poçtla göndəriş etsək, orada malın dəyərinin müəyyən olunmuş məbləğdən çox olduğu halda vergiyə cəlb olunduğunu görəcəyik”.

Deputat deyib ki, gömrükdə şəxsi istehlak üçün limitin tətbiq olunmasını haqsız rəqabətin, idxal olunan malların vergidən yayınmasının qarşısının alınması baxımından əhəmiyyət daşıyır: “Aparılan iqtisadi təhlillər nəticəsində son illər fiziki şəxslərin ölkənin gömrük sərhədindən mal keçirərkən ayrı-ayrı şəxslərin adlarına rəsmiləşdirilməklə gömrük rüsumunu ödəməkdən yayındığı müəyyənləşdirilib. Sözügedən qaydalarda dəyişiklik bu halların aradan qaldırılması baxımından məqsədəuyğundur”.

Qaşqay RAMAZANOV

Paylaş:

Baxılıb: 471 dəfə