“Yeni Azərbaycan” qəzeti KİVDF-nin elan etdiyi müsabiqə üzrə növbəti onlayn “dəyirmi masa” keçirib

Bakı:

29 °C

46 %

4 m/s

AZ RU EN

Ana səhifə / Sosial / “Yeni Azərbaycan” qəzeti KİVDF-nin elan etdiyi müsabiqə üzrə növbəti onlayn “dəyirmi masa” keçirib

“Yeni Azərbaycan” qəzeti KİVDF-nin elan etdiyi müsabiqə üzrə növbəti onlayn “dəyirmi masa” keçirib

31.07.2020 [13:12]

“Azərbaycan müasir beynəlxalq münasibətlər sistemində: milli-strateji maraqlar kontekstində” mövzusunda təşkil edilən tədbirdə ölkəmizin xarici siyasət kursunun strateji prioritetləri və istiqamətlərindən, ikitərəfli və çoxtərəfli münasibətlərinin inkişaf dinamikasından bəhs edilib

Xəbər verildiyi kimi, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) qəzet redaksiyalarına maliyyə yardımının göstərilməsi üçün müsabiqə elan edib. Müsabiqə çərçivəsində KİVDF tərəfindən “Azərbaycan Respublikasında Kütləvi İnformasiya Vasitələrinin İnkişafına Dövlət Dəstəyi Konsepsiyası”na uyğun olaraq 19 istiqamət üzrə layihə-təkliflər təqdim olunub.

“Yeni Azərbaycan” qəzeti “Regionların sosial-iqtisadi inkişafının təşviq edilməsi”, “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığının inkişaf etdirilməsi”, eləcə də “Azərbaycançılıq ideyasının təbliği” istiqamətləri üzrə müsabiqənin qalibi olub. Redaksiya tərəfindən müsabiqə şərtlərinə uyğun olaraq qəzetin səhifələrində hər üç istiqamət üzrə müntəzəm qaydada materiallar dərc olunur. Eyni zamanda, “Yeni Azərbaycan” qəzetinin redaksiyası layihələrin icrası çərçivəsində müvafiq mövzuların müzakirəsi ilə bağlı onlayn “dəyirmi masa”lar keçirir. Beləliklə, iyulun 27-də növbəti “dəyirmi masa” “Azərbaycan Respublikasının dünya birliyinə inteqrasiyası, region ölkələri və digər dövlətlərlə, beynəlxalq təşkilatlarla əməkdaşlığın inkişaf etdirilməsi” istiqaməti üzrə “Azərbaycan müasir beynəlxalq münasibətlər sistemində: milli-strateji maraqlar kontekstində” mövzusunda keçirilib. “Yeni Azərbaycan” qəzetinin şöbə redaktoru, layihə rəhbəri Nurlan Qələndərlinin moderatorluğu ilə keçirilən “dəyirmi masa”da Milli Məclisin deputatı Ramil Həsən, millət vəkili, siyasi elmlər doktoru Elşad Mirbəşiroğlu, AMEA-nın Naxçıvan bölməsinin Qafqaz tarixi şöbəsinin müdiri, tarix üzrə fəlsəfə doktoru, dosent Emin Arif iştirak ediblər.

Tədbirdə Cənubi Qafqaz regionunun lider dövləti olan Azərbaycanın xarici siyasət kursunun strateji prioritetləri və istiqamətlərindən, ikitərəfli və çoxtərəfli münasibətlərinin inkişaf dinamikasından danışılıb. Qeyd edilib ki, Ümummilli Lider Heydər Əliyevin təməlini qoyduğu çoxvektorlu, praqmatik və milli maraqlara əsaslanan uğurlu xarici siyasət kursu Prezident İlham Əliyev tərəfindən müvəffəqiyyətlə davam etdirilir. Bunun nəticəsidir ki, Azərbaycan müasir beynəlxalq münasibətlər sistemində güclü və nüfuzlu aktor, həmçinin etibarlı strateji tərəfdaş kimi tanınır. Ölkəmizin ikitərəfli və çoxtərəfli münasibətləri uğurla inkişaf edir, respublikamız regional və beynəlxalq təşkilatlarda müvəffəqiyyətlə təmsil olunur. Diqqətə çatdırılıb ki, Azərbaycanın təşəbbüsü və liderliyi ilə gerçəkləşdirilən geostrateji əhəmiyyətli enerji və nəqliyyat-kommunikasiya layihələri regional və beynəlxalq təhlükəsizliyin möhkəmləndirilməsi, əməkdaşlığın dərinləşdirilməsi baxımından mühüm əhəmiyyətə malikdir.

Onlayn “dəyirmi masa”da mövzu ilə əlaqədar geniş fikir mübadiləsi aparılıb.

Paylaş:

Baxılıb: 563 dəfə