Yaz aylarında allergik xəstəliklər: nəyə diqqət etməli, necə qorunmalı?

Bakı:

24 °C

62 %

1 m/s

Əlaqə

AZ RU EN

Ana səhifə / Sosial / Yaz aylarında allergik xəstəliklər: nəyə diqqət etməli, necə qorunmalı?

Yaz aylarında allergik xəstəliklər: nəyə diqqət etməli, necə qorunmalı?

13.05.2020 [17:03]

Yaz mövsümündə ən çox rast gəlinən problemlər sırasında allergik xəstəliklər xüsusi yer tutur. Statistik məlumatlara əsasən, hazırda dünyada hər on nəfərdən ikisi allergiyadan əziyyət çəkir. Məlumat üçün bildirək ki, mövsümi allergiya nəticəsində bədəndə səpgi, gözlərdə qızarma, sulanma, burun axması, çoxsaylı asqırma, qaşınma, öskürək, boğulma və daha təhlükəli olan boğazda şişkinlik və nəfəs darlığı yaranır.

Mart ayından mayın sonuna qədər bəzi insanlarda allergik xəstəliklər daha çox özünü göstərir

Həkimlərin bildirdikləri kimi, mart ayından mayın sonuna qədər bəzi insanlarda allergik xəstəliklər daha çox özünü göstərir. Səhiyyə Nazirliyinin baş allerqoloqu Cəbrayıl Məmmədov bildirib ki, bunun səbəbi yaz fəslində ağacların çiçəkləməsidir. Onun sözlərinə görə, bir sıra ağacların yaz fəslində tozlanması allergiyaya həssas insanlarda bu problemin əlamətlərinin baş qaldırmasına səbəb olur. Bu səbəbdən yaz aylarında allergik xəstəliklər özünü daha qabarıq büruzə verir.

Dünyada allergik xəstəliklərin sayında kəskin artım müşahidə edilir

Baş allerqoloq deyib ki, insanlar vaxtında həkimə müraciət etməlidirlər ki, bu dövrü yüngül keçirə bilsinlər: "Allergiyanın yaratdığı problemlər arasında Azərbaycanda ən çox yayılmış olanı bronxial astmadır ki, buna əhalinin təxminən 5-8 faizində rast gəlinir. Allergiya əsasən selikli qişanın güclü qaşınması və dəri səpgiləri, ümumi zəifliklə özünü büruzə verir".

Allerqoloqun sözlərinə görə, statistik məlumatlara əsasən, son illər bütün dünyada allergik xəstəliklərin sayında kəskin artım müşahidə edilir. Alimlərin son araşdırmalarına əsasən, 2020-ci ildə Avropa əhalisinin yarısının bu xəstəliklərdən əziyyət çəkəcəyi ehtimal edilir.

İrsi faktor meyillilik riskini nə dərəcədə artırır?

Bütün allergik problemlərin uşaq dövründə başlandığını deyən Cəbrayıl Məmmədov bildirib ki, gələcəkdə bu istiqamətdə daha ağır xəstəliklərlə üzləşməmək üçün problemin qarşısının zamanında, yəni kiçik yaşlarda alınması mütləqdir.

Açıqlamasında, həmçinin allergiyanın əmələ gəlmə səbəbləri haqqında danışan mütəxəssis burada irsiliyin də vacib rol oynadığını qeyd edib. Bildirib ki, valideynlərdən birində allergik xəstəlik və ya reaksiyanın olması uşağın bu növ xəstəliklərə meyillilik riskini yüzdə əlli, hər ikisində olması isə 75 faiz artırır.

Uşaqlarda allergiya: xəstəlik və reaksiyalar hansı formada davam edir?

“Altı aylığa qədər olan uşaqlarda allergiyanın əmələ gəlməsinə əsasən qida məhsulları səbəb olur. Allergik reaksiya özünü səpki, öskürək, asqırıq, boğulma və bir sıra digər hallarla büruzə verir. Xəstəlik və reaksiyalar mərhələli davam edir. Yeni doğulmuş körpələri ananın immun sistemi qoruyur. Altı aydan sonra körpələrdə immunitet bir qədər zəifləyir, onlarda virus və ya bakterial mənşəli xəstəliklərə meyillilik artır. Əgər uşaqlarda üç yaşa qədər təngnəfəslik və ya xışıltılı nəfəsalma müşahidə edilirsə, bu, artıq obstruktiv bronxitin göstəricisidir. Belə uşaqlar bronxların bəlğəmlə tıxaclanması səbəbindən çətin nəfəs alır və mütəmadi olaraq öskürürlər. Onlar bronxlarda olan seliyi ifraz etməyə çalışırlar ki, bu da güclü öskürəklə nəticələnir. Bu hal artıq xəstəliyin astmaya keçmə ehtimalını artırır”.

Allergiyalı xəstələr hansı qidalardan çəkinməlidirlər?

O da vurğulanıb ki, bu mövsümdə ən çox qida allergiyalarına da rast gəlinir. Ümumiyyətlə, dünyada təxminən 100 qidaya qarşı allergiyanın yarandığı sübut olunub. Allerqoloq onu da əlavə edib ki, allergiyalı xəstələr sitrus meyvələri, giləmeyvə, süd, şokolad, dəniz məhsulları və çərəzlərlə qidalanmaqdan çəkinməlidirlər.

Beləliklə, xəstəlik tam müalicə olunmasa da, onu vaxtında müalicə edərək allergen təsir göstərən vasitələrdən uzaqlaşmaq olar. Bunun üçün allergen-test adlanan analiz növündən istifadə etmək kifayətdir. Həmin üsulla allergiya yaradan qida və dərmanları müəyyən etmək olar.

Müşfiqə BAYRAMLI

Paylaş:

Baxılıb: 529 dəfə