Bakıda “Azərbaycan və Türkiyə universitetləri: təhsil, elm, texnologiya” konfransı keçirilir

Bakı:

28 °C

51 %

4 m/s

Əlaqə

AZ RU EN

Ana səhifə / Sosial / Bakıda “Azərbaycan və Türkiyə universitetləri: təhsil, elm, texnologiya” konfransı keçirilir

Bakıda “Azərbaycan və Türkiyə universitetləri: təhsil, elm, texnologiya” konfransı keçirilir

19.12.2019 [09:44]

Dekabrın 18-də Azərbaycan Texniki Universitetində (AzTU) bu ali təhsil müəssisəsi, Təhsil Nazirliyi və Türkiyə Respublikası Ali Təhsil Standartları İdarəsinin təşkilatçılığı ilə “Azərbaycan və Türkiyə universitetləri: təhsil, elm, texnologiya” 1-ci beynəlxalq elmi-praktiki konfransı öz işinə başlayıb.
Tədbir iştirakçıları əvvəlcə universitetin foyesində Ulu Öndər Heydər Əliyevin abidəsini ziyarət ediblər.
Konfrans Azərbaycanın və Türkiyənin dövlət himnlərinin səsləndirilməsi ilə başlayıb.
AZƏRTAC xəbər verir ki, tədbiri giriş sözü ilə açan AzTU-nun rektoru, professor Vilayət Vəliyev konfransın əhəmiyyətini vurğulayıb. Rektor qeyd edib ki, konfransın məqsədi Azərbaycan və Türkiyə universitetlərinin təhsil, elm, texnologiya sahələrindəki aktual problemlərini müzakirə etmək, perspektivlərini müəyyənləşdirmək və bu sahələrdə aparılan elmi-tədqiqat işlərini ümumiləşdirməkdən ibarətdir.
Müasir dövrdə elm və texnikanın inkişafından danışan rektor Azərbaycan və Türkiyə Universitetləri Assosiasiyasının yaradılması təklifi ilə çıxış edib. Bildirib ki, Assosiasiyanın yaradılması qardaş ölkələrin universitetləri arasında əlaqələrin inkişafında mühüm rol oynaya bilər.
Təhsil Nazirliyinin Beynəlxalq əlaqələr şöbəsinin müdiri Nicat Məmmədli Azərbaycan Prezidentinin ötən il imzaladığı “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” əsasında Türkiyə universitetləri ilə geniş əlaqələrin yarandığını bildirib. O qeyd edib ki, məhz həmin proqrama uyğun olaraq, növbəti tədris ilindən Azərbaycan vətəndaşları ikili diplom proqramları əsasında təhsil alacaqlar. Hazırda dünyanın 500 ən yaxşı universitetində Azərbaycan vətəndaşlarının dövlət hesabına doktorantura təhsili aldıqlarını diqqətə çatdıran şöbə müdiri bunun gələcəkdə dünya ali məktəblərinin təcrübəsinin ölkəmizdə tətbiq olunması istiqamətində mühüm addım olduğunu vurğulayıb. O, AzTU-nun rektorunun Azərbaycan-Türkiyə Universitetləri Assosiasiyasının yaradılması təşəbbüsünü müsbət qiymətləndirib və bu istiqamətdə işlərin davam etdirilməsinin vacibliyini söyləyib.
Təhsil Nazirliyi yanında İctimai Şuranın sədri Şahlar Əsgərov Azərbaycan-Türkiyə universitetlərinin birliyinin iki ölkənin təhsil və elminə böyük töhfələr verəcəyini vurğulayıb.
Tədbirdə çıxış edən türkiyəli qonaqlar konfransın əhəmiyyətindən danışıb və iki ölkənin universitetləri arasında əlaqələrin daha da inkişaf etdirilməsi ilə bağlı təkliflər səsləndiriblər.
İşini bölmə iclasları ilə davam etdirən konfrans dekabrın 20-də yekunlaşacaq.

Paylaş:

Baxılıb: 428 dəfə