"Dəyərlərimiz-sərvətimiz, gələcəyimizdir" layihəsi çərçivəsində keçirilən məktəblərarası müsabiqənin qalibləri mükafatlandırılıb

Bakı:

17 °C

77 %

4 m/s

AZ RU EN

Ana səhifə / Sosial / "Dəyərlərimiz-sərvətimiz, gələcəyimizdir" layihəsi çərçivəsində keçirilən məktəblərarası müsabiqənin qalibləri mükafatlandırılıb

"Dəyərlərimiz-sərvətimiz, gələcəyimizdir" layihəsi çərçivəsində keçirilən məktəblərarası müsabiqənin qalibləri mükafatlandırılıb

17.04.2019 [14:11]

"Pətək" Yeni Nəslin Mənəvi Tərbiyəsi İctimai Birliyinin Təhsil Nazirliyinin dəstəyi və TİKA ilə birgə həyata keçirdiyi müsabiqəyə qatılan şagirdlər "Milli mənəvi dəyərlərə əsaslanan nümunəvi kişi və nümunəvi qadın" mövzusunda "Ən yaxşı hekayə" və "Ən yaxşı videoçarx" nominasiyaları uğrunda yarışıblar
"Pətək" Yeni Nəslin Mənəvi Tərbiyəsi İctimai Birliyinin Təhsil Nazirliyinin dəstəyi və TİKA ilə birgə həyata keçirdiyi "Dəyərlərimiz – sərvətimiz, gələcəyimizdir" layihəsi çərçivəsində keçirilən məktəblərarası müsabiqə başa çatıb. Aprelin 16-da qaliblərin mükafatlandırılması mərasimi keçirilib. Tədbirdə Təhsil Nazirliyinin və Bakı şəhəri üzrə Təhsil İdarəsinin nəzdində olan ümumtəhsil məktəb və liseylərindən, həmçinin rayonlardan müsabiqəyə qatılan fəal şagirdlər, məktəb direktorları və müəllimlər iştirak ediblər.
Azərbaycanın və Türkiyənin dövlət himnlərinin səsləndirilməsindən sonra çıxış edən "Pətək" İB-nin sədri Sevinc Əsgərova bildirib ki, layihə çərçivəsində keçirilən təqdimatlara Təhsil Nazirliyinin və Bakı şəhəri üzrə Təhsil İdarəsinin nəzdində olan 80 ümumtəhsil məktəbindən 5714 şagird, həmçinin bölgələr üzrə 11 rayonun (Astara, Lənkəran, Masallı, Salyan, Şirvan, Hacıqabul, Zaqatala, Balakən, Şəki, Oğuz, Qəbələ) 202 məktəbindən 1883 şagird qatılıb. Şagirdlər "Milli mənəvi dəyərlərə əsaslanan nümunəvi kişi və nümunəvi qadın" mövzusunda "Ən yaxşı hekayə" və "Ən yaxşı videoçarx" nominasiyaları uğrunda yarışıblar.
Sevinc Əsgərova deyib ki, bu layihəni keçirməkdə məqsəd gənc nəslin milli-mənəvi dəyərlərə sadiq, hərtərəfli inkişaf etmiş, əxlaqlı bir şəxsiyyət kimi yetişməsində cəmiyyətə dəstək olmaqdır: "Məktəblilərin asudə vaxtlarını faydalı axtarışlara yönəltməyi, milli-mənəvi dəyərlərimizi öyrənmələrini, bunu yaşam və davranışlarında tətbiq etmələrini istəyirdik".
Çıxış edən Türkiyənin Azərbaycandakı səfiri Erkan Özoral öncə belə bir tədbirin keçirilməsinin xüsusi əhəmiyyət kəsb etdiyini bildirib. Hər iki ölkənin zəngin tarixə və mədəniyyətə malik olduğunu qeyd edən səfir "Azərbaycan xalqının da öz dəyərlərini qoruyub saxlaması təqdirəlayiqdir. Türk milləti olaraq milli dəyərlərimizə çox ciddi önəm veririk", - deyə əlavə edib.
Səfirin sözlərinə görə, dünyanın son 20 ildə müxtəlif sahələrdə inkişafa nail olduğu, elm və texnologiyanın sürətlə inkişaf etdiyi, internetin həyatımızın az qala ayrılmaz bir hissəsinə çevrildiyi bir şəraitdə milli-mənəvi dəyərlərimizi, zəngin tariximizi qorumaq çox vacibdir.
Sonra çıxış edən Təhsil Nazirliyinin Ümumtəhsil sektorunun müdürü Firudun Həmzəyev, TİKA Bakı Proqram Koordinatoru Teoman Tiryaki, Bakı şəhər Təhsil idarəsinin İnkişaf Layihələri sektorunun məsləhətçisi Səkinə Ağalarova və digərləri belə tədbirin keçirilməsinin gənc nəslin milli-mənəvi dəyərlərə bağlı böyüməsində mühüm bir əhəmiyyətə malik olduğunu bildirib, məktəblilələrə uğurlar arzulayıblar.
Çıxışlardan sonra yazıçı dramaturq Əli Əmirli, xalq artisti Həmidə Ömərova, əməkdar artist Fərqanə Qasımova, təhsil eksperti Şahlar Əsgərov, "Dimet" klinikasının baş həkimi Səfərbəy Səfərbəyov və "Herba Flora" şirkətinin rəhbəri Fizuli Hüseynovdan ibarət münsiflər heyətinin müəyyənləşdirdiyi müsağiqə qaliblərinin mükafatlandırılması mərasimi olub. Qaliblərə hədiyyə və diplomlar təqdim edilib, müsabiqədə fəal iştirak edən şagirdlərə isə təşəkkürnamə verilib.

Paylaş:

Baxılıb: 641 dəfə