Qida Təhlükəsizliyi Agentliyi şəffaflığı və effektivliyi artırmaq üçün sahibkarlara və vətəndaşlara müraciət edib

Bakı:

21 °C

56 %

3 m/s

AZ RU EN

Ana səhifə / Sosial / Qida Təhlükəsizliyi Agentliyi şəffaflığı və effektivliyi artırmaq üçün sahibkarlara və vətəndaşlara müraciət edib

Qida Təhlükəsizliyi Agentliyi şəffaflığı və effektivliyi artırmaq üçün sahibkarlara və vətəndaşlara müraciət edib

30.03.2019 [08:58]

Bu gün ölkəmizdə qida sahəsində aparılan islahat xarakterli tədbirlər Prezident İlham Əliyevin rəhbərliyi ilə həyata keçirilən Strateji Yol xəritələrinin və islahatlar dalğasının növbəti bir mərhələsi və tərkib hissəsidir. Milli iqtisadiyyat perspektivləri üzrə həyata keçirilən islahatlar, kənd təsərrüfatı və qida sənayesi sektorunda müasir standartların tətbiqi, qida təhlükəsizliyinə nəzarət sahəsində dövlət idarəçiliyinin təkmilləşdirilməsi böyük əzm və qətiyyətlə davam etdirilir. Hazırda ölkəmizdə qida zənciri boyu məhsulların izlənilməsini, istehlakçıların və sahibkarların hüquqlarının qorunmasını özündə əks etdirən risk əsaslı yeni nəzarət sistemi qurulur.
Qida Təhlükəsizliyi Agentliyinin informasiya təminatı və innovativ həllər şöbəsindən AZƏRTAC-a verilən məlumata görə, bu istiqamətdə effektiv nəticələrin əldə olunması üçün hər bir vətəndaşın prosesdə iştirakı və həyata keçirilən tədbirlərə, tətbiq olunan yeniliklərə obyektiv münasibəti xüsusi əhəmiyyət daşıyır, çünki qurulan yeni qida təhlükəsizliyi sistemi bu sahəyə ictimai marağı, vətəndaş mövqeyini və iştirakını tələb edir.
Təbii ki, ölkəmizdə qida təhlükəsizliyi sisteminin təkmilləşdirilməsi və əhalinin təhlükəsiz qida məhsulları ilə təmin olunması istiqamətində həyata keçirilən islahat xarakterli tədbirlər bu sahədə uzun illərdən bəri insanların təhlükəsizliyi və gələcək nəsillərin sağlamlığı bahasına qanunsuz olaraq külli miqdarda gəlir əldə etmiş müəyyən şəxslər tərəfindən heç də xoş qarşılanmır. Ancaq əhalinin təhlükəsiz qida məhsulları ilə təmin olunması istiqamətində agentlik tərəfindən aparılan yoxlama nəzarət tədbirləri zamanı aşkar olunan qanunsuz hallara qarşı qanunvericilik çərçivəsində ən sərt tədbirlər həyata keçirilir.
Qida sahəsində həyata keçirilən nəzarət tədbirlərində şəffaflıq və effektivliyin daha da artırılması üçün sahibkarları və vətəndaşları prosesdə aktiv iştirak etməyə dəvət edən agentliyin müraciətində deyilir: “Əməkdaşlarımız tərəfindən sahibkarlıq subyektlərində həyata keçirilən yoxlama-nəzarət tədbirləri, baytarlıq və fitosanitariya nəzarəti, idxal-ixrac proseslərində sənədləşmə, qida sahəsində fəaliyyət göstərən sahibkarlıq subyektlərinin qeydiyyatı zamanı sahibkar və ya hər hansı bir vətəndaş tərəfindən qanunsuz hal müşahidə olunarsa, bununla əlaqədar hüquq-mühafizə orqanlarına məlumat vermələri xahiş olunur.
Qida sahəsində qanunsuz fəaliyyət və pozuntuların vaxtında və operativ şəkildə qarşısının alınması üçün bir daha vətəndaşları prosesdə aktiv iştirak etməyə və neqativ hallarla bağlı agentliyin 1003 “Qaynar xətt”inə və ya aidiyyəti üzrə hüquq-mühafizə orqanlarına məlumat verməyə çağırırıq”.

Paylaş:

Baxılıb: 656 dəfə