Nazir: Yeni məşğulluq portalı işsizliyin aradan qaldırılmasında əhəmiyyətli rol oynayacaq

Bakı:

22 °C

56 %

3 m/s

Əlaqə

AZ RU EN

Ana səhifə / Sosial / Nazir: Yeni məşğulluq portalı işsizliyin aradan qaldırılmasında əhəmiyyətli rol oynayacaq

Nazir: Yeni məşğulluq portalı işsizliyin aradan qaldırılmasında əhəmiyyətli rol oynayacaq

04.07.2018 [10:04]

Məşğulluq və əmək bazarının genişləndirilməsi dünyanın istənilən ölkəsi üçün aktual məsələdir. Azərbaycanda da məşğulluq siyasətinin əhatə dairəsinin genişləndirilməsi, əhalinin ona daha çox cəlb olunması, əmək bazarının keyfiyyətinin yüksəldilməsi istiqamətində silsilə işlər həyata keçirilir. Prezident İlham Əliyevin apardığı uğurlu siyasət nəticəsində ölkəmizdə iqtisadi inkişaf bütün sahələrdə özünü göstərir. Bunun nəticəsində əmək bazarının genişlənməsinə də imkan yaranıb. Sahibkarlığın inkişafı nəticəsində özəl sektorun genişlənməsi ilə vətəndaşların məşğulluq imkanları da gündən-günə artır. Bu sahədə məşğulluq siyasətinin keyfiyyəti, onun əhatə dairəsinin genişləndirilməsi və şaxələndirilməsi, xüsusilə gənclərin, sosial müdafiəyə ehtiyacı olanların əmək bazarına inteqrasiyası sahəsində beynəlxalq təcrübənin öyrənilməsi və ən yaxşı beynəlxalq standartla belə bir portalın yaradılması, tətbiq olunması üçün müxtəlif tədbirlər proqramları həyata keçirilir. Həmin proqramlar həm Avropa İttifaqının Azərbaycandakı nümayəndəliyi, həm də Beynəlxalq Əmək Təşkilatının ekspertləri ilə əməkdaşlıq şəraitində həyata keçirilir.
Bu barədə əmək və əhalinin sosial müdafiəsi naziri Sahil Babayev Azərbaycan Hökuməti ilə Beynəlxalq Əmək Təşkilatı arasında imzalanmış “2016-2020-ci illər üçün Layiqli Əmək üzrə Ölkə Proqramı” çərçivəsində məşğulluq xidməti orqanlarının potensialının gücləndirilməsi məqsədilə keçirilən 4-cü təlim kursunun açılışında jurnalistlərə müsahibəsində deyib.
Nazir qeyd edib ki, bu tədbir də məhz beynəlxalq təcrübənin öyrənilməsi, Dövlət Məşğulluq Xidmətinin potensialının genişləndirilməsi, işçi heyətə təlim və treninqlərin keçirilməsi məsələlərinə həsr olunub. Bu tədbir məşğulluq xidmətlərinin keyfiyyətinin daha da artırılması, onların əlçatanlığının təmin olunması, məhdud qabiliyyətli insanların əmək bazarına inteqrasiyası baxımından böyük əhəmiyyət kəsb edir və bu istiqamətdə müxtəlif ölkələrin təcrübəsini öyrənməyə imkan verir.
Nazir yeni yaradılacaq məşğulluq portalı barədə də məlumat verib: “Məşğulluq portalı həyata keçirəcəyimiz əsas islahatlardan biridir. Portalda qeydiyyatdan keçmiş bütün işsizlər və işaxtaranlar haqqında məlumatlar öz əksini tapacaq. İşsiz və ya işəgötürən məşğulluq mərkəzinə getmədən həmin portala girərək öz kvalivikasiyası barədə məlumat daxil edəcək, həmçinin mövcud olan vakansiyalar haqqında məlumat əldə edə biləcək. Portalda iş yerinin ünvanı, iş saatının vaxtı, maaşı və s. barədə məlumatlar da yer alacaq. Eyni zamanda, işəgötürən hər hansı bir ixtisasa malik işçi axtaranda həmin portalda ona lazım olan işçini rahatlıqla tapa, seçə və uyğun bildiyini işə cəlb edə biləcək. İlin sonunadək həmin portalın proqram təminatı hazırlanacaq və orada ölkəmizdə olan işsiz və işaxtaranların hər biri haqqında məlumatlar toplanacaq. Belə bir portalın yaradılması həm bu sahədə şəffaflığın tam təmin olunması baxımından əhəmiyyətlidir, həm də əhatə dairəsinin genişliyi ilə yanaşı, sosial müdafiəyə ehtiyacı olanların, fiziki problemlərlə üzləşənlərin mərkəzlərə gəlməsinə lüzum qoymayacaq. Ən başlıcası, işsizlə işəgötürən arasında birbaşa əlaqə yaradılacaq”.
Nazir qeyd edib ki, məşğulluq portalının gələn ilin ortalarında fəaliyyətə başlayacağı gözlənilir.

Paylaş:

Baxılıb: 756 dəfə