Dövlət Miqrasiya Xidməti ilə BMT-nin Qaçqınlar üzrə Ali Komissarlığı arasında əməkdaşlığın perspektivləri müzakirə edilib

Bakı:

23 °C

56 %

0 m/s

AZ RU EN

Ana səhifə / Sosial / Dövlət Miqrasiya Xidməti ilə BMT-nin Qaçqınlar üzrə Ali Komissarlığı arasında əməkdaşlığın perspektivləri müzakirə edilib

Dövlət Miqrasiya Xidməti ilə BMT-nin Qaçqınlar üzrə Ali Komissarlığı arasında əməkdaşlığın perspektivləri müzakirə edilib

05.05.2018 [16:00]

Dövlət Miqrasiya Xidmətinin (DMX) rəisi Vüsal Hüseynov BMT-nin Qaçqınlar üzrə Ali Komissarlığının Azərbaycandakı nümayəndəliyinin rəhbəri Furio de Angelis ilə görüşüb.
DMX-dən AZƏRTAC-a bildiriblər ki, əməkdaşlığın perspektivlərinin müzakirə edildiyi görüşdə Azərbaycan hökuməti ilə BMT-nin Qaçqınlar üzrə Ali Komissarlığı arasında əlaqələrin yaxşı əsaslar üzərində qurulduğu və münasibətlərimizin bu gün də uğurla davam etdirildiyi vurğulanıb.
Söhbət zamanı 2008-ci ilin fevralından DMX-də qaçqın statusunun müəyyənləşdirilməsi üzrə müvafiq struktur bölmənin fəaliyyət göstərdiyi diqqətə çatdırılıb. Bildirilib ki, “qaçqın” statusu almaq niyyətində olan şəxslərin müraciətləri Xidmətdə araşdırılması üçün qeydiyyata alınır və müvafiq prosedurlardan sonra onların hər birinə “qaçqın” statusunun verilib-verilməməsi barədə məlumat verilir. Status verilməsindən imtina edilmiş şəxslərə bunun səbəbləri izah edilməklə, inzibati və ya məhkəmə qaydasında şikayət etmək hüququ göstərilməklə yazılı qərarlar təqdim olunur.
Vüsal Hüseynov bildirib ki, DMX-də əcnəbilərə və vətəndaşlığı olmayan şəxslərə sığınacaq almaq üçün müraciət etməyə yaradılmış lazımi şəraitin daha da təkmilləşdirilməsi üçün müvafiq işlər görülür. DMX tərəfindən biometrik “Qaçqın vəsiqəsi” və “Yol sənədi”nin yeni nümunələri hazırlanıb.
Azərbaycanın iki regionunda (Bakıda və Yevlaxda) Dövlət Miqrasiya Xidmətinin Qanunsuz Miqrantların Saxlanılması mərkəzləri fəaliyyət göstərir ki, “qaçqın” statusu almaq niyyətində olan şəxslərin yaşamaq üçün yerləri olmadığı təqdirdə müraciətlərinin araşdırılması mərhələsində onlar könüllü şəkildə həmin mərkəzlərdə yerləşdirilirlər.
Xidmət rəisi bildirib ki, 2007-2017-ci illərdə müxtəlif ölkələrdən 1125 ərizəçi (ailə üzvləri ilə birlikdə 2210 nəfər) qaçqın statusu almaq üçün Dövlət Miqrasiya Xidmətinə ərizə ilə müraciət edib. Hazırda 46 ərizəçi (ailə üzvləri ilə birlikdə 75 nəfər) qaçqın kimi Dövlət Miqrasiya Xidmətində qeydiyyatdadır.
Vüsal Hüseynov “10 ilə vətəndaşsızlığa son” kampaniyası çərçivəsində görülmüş işlərin miqyasının daha da genişləndirilməsi və vətəndaşsızlıq hallarının aradan qaldırılması üçün əsaslı tədbirlərin davam etdiriləcəyini vurğulayıb. Bu günlərdə sənədsiz yaşayan və vətəndaşlığı naməlum şəxslərin sənədləşdirilməsi işinin təşkili üçün DMX tərəfindən Şirvanda “Vətəndaşlıq məsələsi əsas insan hüquqlarından biridir” mövzusunda keçirilmiş görüşdə Furio de Angelisin iştirakı qeyd edilib.
BMT-nin Qaçqınlar üzrə Ali Komissarlığının Azərbaycandakı nümayəndəliyinin rəhbəri Furio de Angelis səmimi görüşə və Xidmət rəisi kimi fəaliyyətinin başlanğıcında bu həssas mövzuya ayırdığı diqqətə görə minnətdarlığını bildirib və xoş arzularını ifadə edib. Əməkdaşlığın genişləndirilməsinə böyük önəm verdiklərini deyən qonaq diqqətə çatdırıb ki, BMT QAK-ın Azərbaycandakı nümayəndəliyi Dövlət Miqrasiya Xidməti ilə birlikdə sığınacaq axtaran şəxslər üçün altı dildə “Azərbaycanda sığınacaq” adlı məlumat kitabçaları hazırlayıb. Qeyd edilib ki, DMX-nin aidiyyəti idarəsinin əməkdaşları “Azərbaycanla Yerdəyişmə üzrə Tərəfdaşlığın İcrasına Dəstək (MOBİLAZE)” layihəsi çərçivəsində “Sığınacaq sisteminin keyfiyyətinin artırılması” istiqamətində keçirilən tədbirlərdə fəal iştirak edir.
Görüşdə qarşılıqlı maraq doğuran digər məsələlər ətrafında fikir mübadiləsi aparılıb.

Paylaş:

Baxılıb: 458 dəfə