Beynəlxalq müşahidəçilər: Muxtar respublikada seçki prosesi yüksək səviyyədə təşkil edilib

Bakı:

31 °C

40 %

4 m/s

Əlaqə

AZ RU EN

Ana səhifə / Sosial / Beynəlxalq müşahidəçilər: Muxtar respublikada seçki prosesi yüksək səviyyədə təşkil edilib

Beynəlxalq müşahidəçilər: Muxtar respublikada seçki prosesi yüksək səviyyədə təşkil edilib

12.04.2018 [09:40]

Aprelin 11-də keçirilmiş Azərbaycan Respublikası Prezidentinin seçkiləri Naxçıvan Muxtar Respublikasında da yüksək seçici fəallığı və nümunəvi təşkilatçılıq baxımından əlamətdar olub. Səsvermə günü muxtar respublikadakı seçki məntəqələrində müşahidə aparan beynəlxalq müşahidəçilər seçkilərin tam demokratik və şəffaflıq şəraitində keçirildiyini bildirdilər.
MDB-dən olan müşahidəçi Vladimir Muradov AZƏRTAC-ın Naxçıvan bürosunun müxbirinə müsahibəsində deyib ki, seçkiləri izləmək üçün aprelin 10-dan Naxçıvana gəlib, aparılan hazırlıq işləri ilə yaxından tanış olub.
Muxtar respublikada seçkilərə hazırlıq işlərinin yüksək səviyyədə aparıldığını və səsvermənin uğurunu, ilk növbədə, bununla əlaqələndirən müşahidəçi deyib: “Bu gün 4 saylı Naxçıvan şəhər və 5 saylı Şahbuz-Babək seçki dairələrinin səkkiz seçki məntəqəsində müşahidələr apardıq. Ümumiyyətlə, seçkinin ilk saatlarından başlayaraq, yüksək fəallıq gördük. Məntəqələrdə seçicilərin zəruri informasiya ala bilmələri və sərbəst şəkildə səs vermələri üçün hər cür şərait yaradılmışdı. Vətəndaşlar çox asanlıqla öz adlarını seçici siyahılarında tapırdılar”.
Vladimir Muradov bildirib ki, Şahbuz rayonunun ən ucqar kəndlərində də seçki prosesini izləyiblər: “Yolboyu baş çəkdiyimiz seçki məntəqələrində əhalinin seçkiyə yüksək marağını müşahidə edirdik. Fikrimcə, bu seçkilər Azərbaycan vətəndaşlarının öz seçimini edə bilməsi baxımından çox yaxşı təşkil olunmuşdu. Səsvermə günü məntəqələrdə hər bir qanun pozuntusu və ya təşkilatçılıq çatışmazlığına rast gəlmədik. Ümumiyyətlə, prezident seçkilərinin gedişi ilə bağlı müsbət qeydlərimiz çoxdur”.
MDB müşahidə missiyasının digər üzvü Aygül Jumabayeva 14 məntəqədə olduqlarını, seçkilərin gedişi zamanı hər hansı çatışmazlıq və ya qanun pozuntusu müşahidə etmədiklərini deyib: “Qazaxıstan parlamentində təmsil olunan Qazaxıstan Demokratik Partiyasının üzvü, “Ağ yol” fraksiyasının aparat rəhbəri kimi, muxtar respublikada Azərbaycan Respublikası Prezidentinin seçkilərini müşahidə etməkdən məmnunam. Buradakı yüksək fəallıq və yaxşı təşkilatçılıq diqqətimizi cəlb etdi”.
Aygül Jumabayeva Azərbaycanda və muxtar respublikada keçirilən bu seçkilərdə tətbiq edilən qabaqcıl təcrübənin diqqətəlayiq olduğunu vurğulayıb: “Məsələn, ölkənizin Mərkəzi Seçki Komissiyasında bütün siyasi partiya nümayəndələri təmsil olunurlar. Hesab edirəm ki, bu, seçki demokratiyasının inkişafından xəbər verir. Əlbəttə ki, Azərbaycanda müşahidə etdiklərim mənim üçün çox faydalı olacaq”, - deyə qazaxıstanlı müşahidəçi bildirib.
ATƏT təmsilçisi Aqitos Rulantos da muxtar respublikada seçki prosesinin gedişi ilə bağlı müsbət fikirdədir: “Müşahidə apardığımız seçki məntəqələrində seçicilərin fəallığının şahidi olduq. Digər həmkarlarım ilə birgə missiyamızı diqqətlə yerinə yetirdik. Səsvermənin gedişindən razı qaldıq”.
ATƏT-dən olan digər müşahidəçi Tina Rus Naxçıvandakı seçki məntəqələrində yaradılan şəraitin yüksək səviyyədə olduğunu vurğulayıb. Tina Rus iki gün ərzində bir sıra məntəqələrin hazırlığı ilə tanış olduqlarını, səsvermə günü səhər saatlarından başlayaraq seçkilərin demokratik və şəffaf şəkildə keçirildiyinə şahidlik etdiklərini diqqətə çatdırıb.

Paylaş:

Baxılıb: 511 dəfə