İslam Əməkdaşlıq Təşkilatının jurnalında Qafqaz Müsəlmanları İdarəsi sədrinin məqaləsi dərc olunub

Bakı:

23 °C

71 %

12 m/s

AZ RU EN

Ana səhifə / Sosial / İslam Əməkdaşlıq Təşkilatının jurnalında Qafqaz Müsəlmanları İdarəsi sədrinin məqaləsi dərc olunub

İslam Əməkdaşlıq Təşkilatının jurnalında Qafqaz Müsəlmanları İdarəsi sədrinin məqaləsi dərc olunub

04.04.2018 [10:11]

İslam Əməkdaşlıq Təşkilatının (İƏT) ərəb və ingilis dillərində nəşr olunan rəsmi jurnalının aprel sayında Qafqaz Müsəlmanları İdarəsinin (QMİ) sədri, tarix elmləri doktoru, professor, şeyxülislam Allahşükür Paşazadənin “Azərbaycanın İslam həmrəyliyinə töhfəsi” adlı məqaləsi dərc olunub.
QMİ-nin mətbuat xidmətindən AZƏRTAC-a bildiriblər ki, məqalədə İslam dünyasının ayrılmaz parçası olan Azərbaycan İslam mədəniyyətinin yaranıb qorunduğu mühüm yerlərdən biri kimi təqdim edilir. Bildirilir ki, Azərbaycanda heç vaxt irqi, yaxud dini zəmində qarşıdurma və anlaşılmazlıq olmayıb. Qafqazın ən qədim məscidi - 743-cü ildə inşa edilmiş Şamaxı məscidi, Bibiheybət ziyarətgah və məscid kompleksi, Gəncədəki “İmamzadə” kompleksi və bir çox digər məscid və ziyarətgahlar Azərbaycanın İslamın dini-mədəni dəyərlərinə verdiyi böyük töhfədir. Azərbaycan xalqı həmişə öz tarixinə və mənəvi dəyərlərinə böyük hörmətlə yanaşıb. Sovet İttifaqı dağılanda ölkəmizdə fəaliyyət göstərən cəmi 17 məscid var idi, bu gün isə bu rəqəm 2 mini keçib. Son 13 il ərzində Azərbaycanda 200-dən artıq yeni məscid ucaldılıb, 80-dən çox məsciddə təmir işləri aparılıb. Ölkə rəhbərliyinin himayəsi altında Bibiheybət, Təzəpir, köhnə Cümə məscidi və Məhəmməd məscidində təmir-bərpa və yenidənqurma işləri həyata keçirilib.
2014-cü il dekabrın 26-da dövlətimizin başçısının müvafiq Sərəncamı ilə ucaldılmış Heydər məscidinin açılışının həyata keçirildiyini diqqətə çatdıran A.Paşazadə bunun Cənubi Qafqazda ən böyük məscid olduğunu vurğulayır. Bildirir ki, 2017-ci ilin Azərbaycan Prezidenti tərəfindən ölkədə “İslam Həmrəyliyi İli” elan olunması bütün dünyaya ünvanlanan tolerantlıq, qarşılıqlı ehtiram, dinlərarası və məzhəblərarası dialoqa çağırışdır. Azərbaycanda Ümummilli lider Heydər Əliyev tərəfindən qurulmuş dövlət-din münasibətlərinin parlaq nümunəsi başqa dövlətlər tərəfindən öyrənilib araşdırılır.
QMİ sədri vurğulayır ki, ölkəmizdə keçirilmiş olduqca mühüm hadisə - IV İslam Həmrəyliyi Oyunları müstəqil Azərbaycanın İslam dünyasındakı yüksək nüfuzunu nümayiş etdirdi. “İslam Həmrəyliyi İli” çərçivəsində ölkəmizdə və xaricdə çoxlu sayda beynəlxalq konfranslar, seminarlar və başqa tədbirlər keçirildi. Qafqaz Müsəlmanları İdarəsi Dini Qurumlarla İş üzrə Dövlət Komitəsi ilə birgə İslam həmrəyliyinin möhkəmləndirilməsi, islami dəyərlərin təbliği və radikallığa qarşı birgə mübarizə ilə bağlı dörd beynəlxalq konfrans keçirib. Bu gün dünyada təkcə dini zəmində deyil, eləcə də milli-irqi zəmində münaqişələr baş verir. Azərbaycan xalqı XX əsrin sonlarında Ermənistan tərəfindən etnik təmizləmə və soyqırımına məruz qalıb. Ermənilərin təcavüzkar siyasəti tarixboyu kütləvi qırğınlarla müşayiət olub. Ermənistanın hərbi təcavüzünün nəticəsi olaraq Azərbaycanın beynəlxalq müstəvidə tanınmış torpaqlarının 20 faizi, o cümlədən Dağlıq Qarabağ və 7 ətraf rayon işğal edilib, bir milyon insan qaçqın və məcburi köçkün vəziyyətinə düşüb. İşğal altındakı torpaqlarda qalan çoxlu sayda tarixi, mədəni-dini abidələr vəhşicəsinə məhv edilib, bəzi məscidlərin əraziləri İslam qaydalarına zidd şəkildə istifadə olunur. Ermənistanı təcavüzkar kimi tanıyan BMT və İƏT qətnamələri işğalçı ilə əlaqələri inkişaf etdirməyə niyyəti olan müsəlman ölkələri üçün mesaj olmalıdır, çünki Ermənistan işğalı təkcə Azərbaycanın dini və mədəni dəyərlərini deyil, İslam tarixini və mədəniyyətini hədəf alır.

Paylaş:

Baxılıb: 459 dəfə