“Neftqazelmitədqiqatlayihə” İnstitutunun kollektivi 20 Yanvar faciəsinin qurbanlarını anıb

Bakı:

24 °C

94 %

2 m/s

Əlaqə

AZ RU EN

Ana səhifə / Sosial / “Neftqazelmitədqiqatlayihə” İnstitutunun kollektivi 20 Yanvar faciəsinin qurbanlarını anıb

“Neftqazelmitədqiqatlayihə” İnstitutunun kollektivi 20 Yanvar faciəsinin qurbanlarını anıb

18.01.2018 [10:07]

SOCAR-ın “Neftqazelmitədqiqatlayihə” İnstitutunda 20 Yanvar faciəsinin 28-ci ildönümü ilə əlaqədar tədbir keçirilib. Tədbiri giriş sözü ilə açan Yeni Azərbaycan Partiyası (YAP) Yasamal rayon təşkilatı “Neftqazelmitədqiqatlayihə” İnstitutu ərazi ilk partiya təşkilatının sədri, institutun şöbə rəisi Xıdır İbrahimov bildirib ki, Azərbaycan xalqı 1990-cı ilin Qanlı Yanvarını həm faciə, həm də qəhrəmanlıq səhifəsi kimi yaşadı. O mudhiş gecədə Azərbaycan xalqı sınağa cəkildi. Oğul və qızlarımız müstəqillik, azadlıq uğrunda şəhidlik zirvəsinə ucaldılar.
Sonra Yeni Azərbaycan Partiyası Yasamal rayon təşkilatının sədri Tağı Əhmədov 20 Yanvar faciəsinin şahidi kimi o günlərdə baş verən prosesləri diqqətə çatdırıb. Sovet hakimiyyətinin Azərbaycan haqqında qaranlıq düşüncələrini bölüşən T.Əhmədov faciənin yaranma səbəbləri və Qanlı Yanvarda törədilən dəhşətlər haqqında ətraflı məlumat verib. 20 Yanvar hadisələrinin Azərbaycan xalqının müstəqillik tarixində mühüm əhəmiyyət kəsb etdiyini vurğulayan YAP Yasamal rayon təşkilatının sədri Ümummilli lider Heydər Əliyevin təşəbbüsü və təkidi nəticəsində 20 Yanvar faciəsinə dövlət səviyyəsində hüquqi-siyasi qiymət verildiyini diqqətə çatdırıb.
Daha sonra YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə qan yaddaşımız olan 20 Yanvar faciəsinin azərbaycanlılara qarşı zaman-zaman həyata keçirilən məkrli siyasətin əsas tərkib hissələrindən biri olduğunu bildirib. İllər ötdükcə baş verən hadisənin mahiyyətinin daha aydın şəkildə nəzərə çarpdığını söyləyən V.Rəhimzadə bildirib ki, hadisələrin səhəri günü ailə üzvləri ilə birlikdə Azərbaycanın Moskvadakı daimi nümayəndəliyinə gələrək Bakıya hərbi müdaxiləni respublikanın suverenliyinə qarşı terror kimi qiymətləndirən Ümummilli lider Heydər Əliyev belə ağır məqamda xalqla birlikdə olduğunu bəyan edib, qanlı faciəni pisləyib, günahsız adamların axıdılan qanlarını insanlığa qarşı törədilmiş xəyanət adlandırıb.
V.Rəhimzadə vurğulayıb ki, 20 Yanvar şəhidləri Vətənin azadlığı, suverenliyi uğrunda göstərdikləri şücaətlə bugünkü gənclərimizə örnəkdirlər və xalqımız əmindir ki, möhtərəm Prezidentimiz İlham Əliyevin həyata keçirdiyi uğurlu daxili və xarici siyasət nəticəsində torpaqlarımız erməni silahlılarının işğalından azad ediləcək, şəhidlərimizin uğrunda qurban getdikləri Azərbaycanın ərazi bütövlüyü təmin olunacaq.
Tədbirdə həmçinin institutun əməkdaşları Əbdülağa Qurbanov və Elnur Hacıyev çıxış ediblər.

Paylaş:

Baxılıb: 620 dəfə