ABŞ-ın aparıcı ali məktəblərinin yəhudi mənşəli tələbələrinə Azərbaycandakı tolerantlıq barədə məlumat verilib

Bakı:

17 °C

94 %

3 m/s

AZ RU EN

Ana səhifə / Sosial / ABŞ-ın aparıcı ali məktəblərinin yəhudi mənşəli tələbələrinə Azərbaycandakı tolerantlıq barədə məlumat verilib

ABŞ-ın aparıcı ali məktəblərinin yəhudi mənşəli tələbələrinə Azərbaycandakı tolerantlıq barədə məlumat verilib

10.12.2016 [11:49]

Dekabrın 8-də Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı ABŞ-ın aparıcı ali məktəblərinin yəhudi mənşəli tələbələrini birləşdirən məşhur KİVUNİM Amerika-İsrail akademik təşkilatının Azərbaycanda səfərdə olan nümayəndə heyətinin üzvləri ilə görüşüb.
DQİDK-nın mətbuat xidmətindən AZƏRTAC-a verilən məlumata görə, görüşdə Dini Qurumlarla İş üzrə Dövlət Komitəsi sədrinin birinci müavini Səyyad Salahlı, müavini Səyavuş Heydərov, Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri, beynəlxalq münaqişələr üzrə ekspert Arye Qut, KİVUNİM Amerika-İsrail akademik təşkilatının nümayəndə heyətinin rəhbəri Cey Liberman, Bakı şəhəri Dağ yəhudiləri icmasının sədri Milix Yevdayev, Rus Pravoslav Kilsəsinin Bakı və Azərbaycan Yeparxiyasının katibi Mifodi Ata iştirak ediblər.
Ölkəmizdəki dini durum, Dövlət Komitəsinin fəaliyyət istiqaməti barədə görüş iştirakçılarına ətraflı məlumat verən Mübariz Qurbanlı bildirib ki, tarixən tolerant, multikultural dəyərləri üstün tutan, əhalisinin 96 faizini müsəlmanlar təşkil edən Azərbaycanda bütün dinlərin nümayəndələri - müsəlman, xristian, yəhudilər əsrlərdir sülh və qardaşlıq şəraitində yaşayırlar. Dini konfessiyalar barədə danışan Komitə sədri vurğulayıb ki, bu konfessiyalar anlaşma şəraitində fəaliyyət göstərirlər və qeyri-islam dini icmalara dövlətimiz tərəfindən mütəmadi maliyyə yardımı edilir.
Yəhudilərin Azərbaycanda məskunlaşmasının 2600 illik tarixi olduğunu deyən komitə sədri ölkəmizdə hər zaman yəhudilərə xoş münasibət bəslənildiyini və indiyə qədər də bu münasibətin davam etdiyini bildirib. O qeyd edib ki, ölkəmizdə dini etiqad azadlığı tam təmin olunub, bütün dini konfessiyalara bərabər şərait yaradılıb. Digər konfessiya nümayəndələri kimi yəhudilər də öz ibadətlərini, dini ayinlərini sərbəst şəkildə yerinə yetirirlər.
Daha sonra çıxış edən Bakı Beynəlxalq Multikulturalizm Mərkəzinin İsraildəki nümayəndəliyinin rəhbəri, beynəlxalq münaqişələr üzrə ekspert Arye Qut Azərbaycan-İsrailin əlaqələrinin perspektivlərindən danışıb və bu cür görüşlərin keçirilməsini müsbət dəyərləndirib.
Görüş müzakirələrlə davam edib. Dövlət Komitəsinin sədri Mübariz Qurbanlı tələbələri maraqlandıran sualları cavablandırıb.
Sonda görüş iştirakçılarına Azərbaycandakı dini abidələrin fotoşəkillərindən ibarət kitab təqdim edilib.

Paylaş:

Baxılıb: 591 dəfə