Regionlarda səhiyyə xidməti yüksək səviyyədə təşkil olunub

Bakı:

27 °C

64 %

1 m/s

Əlaqə

AZ RU EN

Ana səhifə / Sosial / Regionlarda səhiyyə xidməti yüksək səviyyədə təşkil olunub

Regionlarda səhiyyə xidməti yüksək səviyyədə təşkil olunub

01.11.2016 [09:34]

Səhiyyə Nazirliyi Lənkəran, Lerik və Astara rayonlarına press-tur təşkil edib
Azərbaycanda səhiyyənin inkişafı sosial siyasətin başlıca istiqamətlərindən biridir. Səhiyyə ilə bağlı mühüm Dövlət proqramlarının hazırlanaraq həyata keçirilməsi əhalinin sağlamlığının daha etibarlı şəkildə qorunmasında müstəsna əhəmiyyətə malikdir. Məhz dövlətin diqqət və qayğısı sayəsində təkcə paytaxtda deyil, regionlarda da əhalinin tibbi xidmətlərlə lazımınca keyfiyyətli şəkildə təmin olunması üçün bütün növ müayinə və müalicəni, əməliyyatları uğurla həyata keçirməyə imkan verən yeni səhiyyə müəssisələri yaradılıb. Son illərdə bu sahənin daha da təkmilləşdirilməsi, müasir tibb ocaqlarının inşası və mövcud səhiyyə müəssisələrinin əsaslı bərpası geniş vüsət alıb. Elə Səhiyyə Nazirliyi də regionlarda fəaliyyət göstərən tibb müəssisələrinin şəraiti ilə tanış olmaq və real vəziyyətlə bağlı əhalini məlumatlandırmaq məqsədilə Lənkəran Müalicə-Diaqnostika Mərkəzinə (MDM), Lerik və Astara mərkəzi rayon xəstəxanalarına növbəti press-tur təşkil edib.
Press-tur çərçivəsində jurnalistlər ilk olaraq Lənkəran MDM-ə baş çəkiblər. Media nümayəndələrinin suallarını cavablandıran xəstəxananın baş həkim müavini Ağəli Əliyev bildirib ki, Lənkəran və ətraf rayonların əhalisinə xidmət edən səhiyyə müəssisəsi ən müasir tibbi avadanlıqla təchiz edilib: “Burada dializ, stasionar əməliyyat, cərrahiyyə, reanimasiya, şüa-diaqnostika, poliklinika şöbələri xidmət göstərir. Mərkəzdə müalicə və müayinə ilə yanaşı, müxtəlif əməliyyatlar, o cümlədən açıq ürək əməliyyatları da həyata keçirilib. Lənkəran Müalicə-Diaqnostika Mərkəzinə Respublika Müalicəvi Diaqnostika Mərkəzindən ezam olunan həkim heyəti tərəfindən əhalinin müayinə və müalicəsi aparılıb. Bunun nəticəsi olaraq, əhali müalicə və müayinə üçün paytaxt Bakıya getmək zərurəti ilə üzləşmir, birbaşa yaşadığı ərazidə keyfiyyətli səhiyyə xidməti ilə təmin edilib”.
KİV nümayəndələrinin növbəti dayanacağı isə Lerik Mərkəzi Rayon Xəstəxanası olub. Jurnalistlərə açıqlamasında xəstəxananın baş həkimi Mübariz Ağayev bildirib ki, səhiyyə ocağında əhaliyə nümunəvi tibbi xidmət göstərmək üçün hər cür şərait yaradılıb: “Xəstəxana 2010-cu ildə əsaslı təmir olunaraq istifadəyə verilib. Tibb ocağı 81,6 min nəfərlik əhaliyə yüksək səviyyədə tibbi xidmət göstərir. 90 çarpayılıq xəstəxanada poliklinika, terapiya, cərrahiyyə, doğum, uşaq xəstəlikləri, təcili və təxirəsalınmaz tibbi yardım şöbələri fəaliyyət göstərir”.
Press-tur çərçivəsində media nümayəndələri Astara Mərkəzi Rayon Xəstəxanasında da olublar. Xəstəxananın baş həkimi Əlövsət Əliyev jurnalistlərə müsahibəsində vurğulayıb ki, Astara rayonunda əhaliyə tibbi xidmətin ən müasir tələblər səviyyəsində təşkilinə nail olmaq üçün mühüm işlər görülüb.
Xatırladaq ki, əsaslı təmir və yenidənqurmadan sonra açılış mərasimində Prezident İlham Əliyevin iştirak etdiyi Astara Mərkəzi Rayon Xəstəxanası yüksək beynəlxalq standartlara cavab verən müasir tibbi avadanlıq və ixtisaslı kadrlarla təmin olunub. Xəstəxananın həkim və tibb işçilərindən ibarət səyyar briqadalarının rayonun ən ucqar dağlıq kəndlərində yerli əhalinin tibbi müayinə və müalicəsini apardığını vurğulayan Ə.Əliyev respublikanın tanınmış və yüksəkixtisaslı tibb mütəxəssislərinin də rayona dəvət edildiyini, onların yerli əhalinin tibbi müayinə və müalicəsində iştirakının gözəl ənənəyə çevrildiyini, Səhiyyə Nazirliyinin təşkilatçılığı ilə tibb ocağında ilk dəfə olaraq böyrəkköçürmə əməliyyatının aparıldığını diqqətə çatdırıb.
Müşfiqə BAYRAMLI

Paylaş:

Baxılıb: 669 dəfə