1993-cü il iyunun 15-də müasir Azərbaycanın inkişafını təmin edən yolun əsası qoyuldu

Bakı:

26 °C

61 %

7 m/s

Əlaqə

AZ RU EN

Ana səhifə / Sosial / 1993-cü il iyunun 15-də müasir Azərbaycanın inkişafını təmin edən yolun əsası qoyuldu

1993-cü il iyunun 15-də müasir Azərbaycanın inkişafını təmin edən yolun əsası qoyuldu

14.06.2016 [10:30]

Xətai rayonunda 15 İyun - Milli Qurtuluş Gününə həsr olunmuş tədbir keçirilib
Dünən Xətai rayonunda 15 İyun - Milli Qurtuluş Gününə həsr olunmuş tədbir keçirilib. Rayondakı Heydər Əliyev parkında baş tutan tədbirin iştirakçıları və qonaqlar əvvəlcə Ulu öndər Heydər Əliyevin parkda ucaldılan abidəsi önünə güllər düzərək xatirəsini ehtiramla anıblar.
Tədbirdə rayon İcra Hakimiyyətinin başçısı Razim Məmmədov çıxış edərək bildirib ki, müstəqilliyin ilk illərində ölkədə həllini gözləyən çox ciddi problemlər özünü göstərirdi: “Təkcə iqtisadi sferada inflyasiya 1800 faizə çatmış, dövlət büdcəsinin kəsri 100 dəfəyə qədər artmışdı. Ölkədə vəziyyət get-gedə pisləşir, iqtisadiyyatın bütün sahələri sıradan çıxır, siyasi gərginlik artır, mənəvi aşınma baş verirdi. Ölkəni vətəndaş müharibəsi təhlükəsi gözləyirdi”.
R.Məmmədovun sözlərinə görə, məhz belə bir mürəkkəb şəraitdə xalqımızın təkidli tələbi ilə Ümummilli liderimiz Heydər Əliyev Naxçıvandan Bakıya qayıtdı, bütün problemləri qısa bir müddətdə aradan qaldırdı, dövlətçiliyin əsaslarını yaratdı. Hazırda isə Azərbaycan dövləti Prezident İlham Əliyevin rəhbərliyi ilə Ulu öndərin yaratdığı möhkəm bünövrə üzərində uğurla inkişaf edir.
Yeni Azərbaycan Partiyası (YAP) Xətai rayon təşkilatının sədri, millət vəkili Hüseynbala Mirələmov bildirib ki, 23 il əvvəl xalqın təkidi və tələbi ilə yenidən siyasi hakimiyyətə gələn Ümummilli lider Heydər Əliyev dövlətçiliyimizin qorunmasını, müstəqilliyimizin əbədiliyini və dönməzliyini təmin edib. Bu isə o deməkdir ki, 1993-cü il iyunun 15-də müasir Azərbaycanın inkişafını təmin edən yolun əsası qoyuldu. Onun sözlərinə görə, 1993-cü ilin 15 iyunundan başlanan inkişaf yolu bu gün yeni mərhələyə daxil olub və Prezident İlham Əliyevin rəhbərliyi ilə Azərbaycan dünyanın öndə gedən dövlətlərindən birinə çevrilib.
“İki Sahil” qəzetinin baş redaktoru, YAP Siyasi Şurasının üzvü Vüqar Rəhimzadə isə deyib ki, 1991-1993-cü illərdə bütün sahələrdə mövcud uğursuzluqlar ölkəmiz üçün ciddi problemlər yaratmışdı. Xalq belə çətin vəziyyətdə üzünü öz xilaskarına - Ulu öndər Heydər Əliyevə tutdu. Ümummilli lider hakimiyyətə qayıdışı ilə Azərbaycanı inkişaf yoluna çıxardı. Bu gün ölkəmiz beynəlxalq aləmdə sabitlik diyarı, iqtisadiyyatı sürətlə inkişaf edən, demokratik ölkə kimi tanınır və qəbul olunur.
Daha sonra tədbirdə çıxış edənlər ötən əsrin 90-cı illərində respublikamızın ictimai-siyasi həyatında baş verən hadisələri geniş təhlil edib, məhz Ulu öndərin müdrikliyi və qətiyyəti sayəsində ölkəmizdə vətəndaş qarşıdurmasına son qoyulduğunu, Azərbaycanın dövlət müstəqilliyinin məhv olmaq təhlükəsindən xilas edildiyini xüsusi vurğulayıblar. Natiqlər ötən 23 il ərzində Azərbaycan Respublikasının əldə etdiyi böyük nailiyyətləri bir daha diqqətə çatdırıblar.
Tədbirdə rayon orta məktəbinin şagirdləri Ulu öndər Heydər Əliyevə həsr olunmuş şeirlər səsləndirib, respublikanın tanınmış mədəniyyət ustaları gözəl ifaları ilə tədbirə toplaşanlara xoş ovqat bəxş ediblər.

Paylaş:

Baxılıb: 913 dəfə