Pilot layihə: Neftçala Sənaye Məhəlləsi qeyri-neft sektorunun inkişafına mühüm töhfə olacaq

Bakı:

20 °C

94 %

0 m/s

Əlaqə

AZ RU EN

Ana səhifə / Sosial / Pilot layihə: Neftçala Sənaye Məhəlləsi qeyri-neft sektorunun inkişafına mühüm töhfə olacaq

Pilot layihə: Neftçala Sənaye Məhəlləsi qeyri-neft sektorunun inkişafına mühüm töhfə olacaq

15.01.2016 [09:28]

Prezident İlham Əliyev bütün regionlarda sənaye zonalarının yaradılmasını prioritet vəzifə kimi qarşıya qoyub
Neftçalada yaradılan sənaye məhəlləsində birinci mərhələ çərçivəsində tikinti işlərinin bir hissəsi artıq başa çatıb. Prezident İlham Əliyevin müvafiq Sərəncamına əsasən tikilən sənaye məhəlləsi qeyri-neft sektorunun inkişafına təkan vermək, əhalinin məşğulluğunu artırmaq məqsədi daşıyır. Məhəllə, həmçinin sənaye sahəsində fəaliyyət göstərən kiçik və orta sahibkarlığın inkişafına yardım edəcək.
Prezident İlham Əliyev Nazirlər Kabinetinin son iclasındakı nitqində bütün regionlarda sənaye zonalarının yaradılmasının vacibliyini bildirib. Bu istiqamətdə çox ciddi iş aparılmasının, texnoparkların, sənaye klasterlərinin yaradılmasının vacibliyinə diqqət çəkən dövlətimizin başçısı Neftçalada reallaşdırılan pilot layihəni buna misal göstərib.
AZƏRTAC-ın müxbiri Neftçalada həyata keçirilən pilot layihə çərçivəsində görülən işlərlə maraqlanıb. Neftçala Sənaye Məhəlləsinin yaradılması üçün 10 hektar torpaq sahəsi ayrılıb. Salyan-Neftçala magistral yolunun kənarında salınan məhəllədə bir sıra istehsal və emal müəssisələri tikilir. Əsas diqqət isə region üçün prioritet olan sənaye məhsullarının istehsalına yönəldiləcək.
Məhəllənin ərazisində eyni vaxtda yardımçı binalarla birlikdə 17 obyekt tikilir. Paralel olaraq kommunikasiya xətlərinin çəkilişi ilə bağlı işlər görülür. Sahə rəisi Elşən Ağalarov AZƏRTAC-ın müxbirinə məlumat verib ki, tikintiyə ötən ilin sentyabr ayında başlanılıb. Qısa müddətdə inzibati binada, ümumi sahəsi 7779 kvadratmetr olan 4 istehsal blokunda və bütün zəruri infrastrukturun tikintisində işlərin əksəriyyəti başa çatıb. Hazırda həmin tikililər tamamlanma mərhələsindədir.
Məhəllənin dayanıqlı enerji ilə təmin olunması üçün transformator quraşdırılıb. Müxtəlif məqsədlər üçün hər birinin tutumu 200-300 kubmetr olan 6 su anbarı və 2 su quyusu tikilib. Məhəllədə balıq yemi istehsal edəcək zavodun bünövrəsinin qoyulmasına hazırlıq işləri görülür.
Rayon icra hakimiyyəti başçısının müavini Nəriman Xəlilov bildirib ki, sənaye məhəlləsinin fəaliyyətə başlaması ilə yeni iş yerləri açılacaq, bunun sayəsində də rayonda əhalinin məşğulluq səviyyəsi yüksələcək. Həmçinin investisiya qoyuluşu, istehsalın artması nəticəsində rayonun iqtisadi potensialı yüksələcək.
Hazırda Neftçala Sənaye Məhəlləsində fəaliyyət göstərmək istəyən sahibkarlarla danışıqlar aparılır. Artıq 18 layihə Azərbaycan İnvestisiya Şirkətinə təqdim edilib. İlkin mərhələdə şirkətlər tərəfindən sənaye məhəlləsinə 7 layihə üzrə 15,6 milyon manat investisiya qoyulacağı və nəticədə 380 iş yerinin açılacağı gözlənilir.
Tikinti işlərinə 200 nəfərdən çox yerli sakin cəlb olunub. Məhəllənin tikintisinin may-iyun aylarında başa çatdırılması nəzərdə tutulur.

Paylaş:

Baxılıb: 861 dəfə