Tərtər və Daşkəsən şəhərlərinin içməli su təchizatı və kanalizasiya sistemləri yenidən qurulur

Bakı:

27 °C

49 %

3 m/s

Əlaqə

AZ RU EN

Ana səhifə / Sosial / Tərtər və Daşkəsən şəhərlərinin içməli su təchizatı və kanalizasiya sistemləri yenidən qurulur

Tərtər və Daşkəsən şəhərlərinin içməli su təchizatı və kanalizasiya sistemləri yenidən qurulur

20.10.2015 [10:24]

Azərbaycan Respublikası regionlarının sosial-iqtisadi inkişafı Dövlət Proqramına uyğun olaraq “Azərsu” Açıq Səhmdar Cəmiyyəti (ASC) tərəfindən bölgələrdə içməli su təchizatı və kanalizasiya sistemlərinin yenidən qurulması layihələrinin icrası uğurla davam etdirilir. Azərbaycan hökuməti və İslam İnkişaf Bankı tərəfindən birgə maliyyələşdirilən “Azərbaycanın 6 rayonunda milli su təchizatı və kanalizasiya proqramı layihəsi” çərçivəsində Tərtər və Daşkəsən şəhərlərində tikinti-quraşdırma işləri sürətləndirilib.
“Azərsu” ASC-dən bildirilib ki, icrasına 2015-ci ilin may ayında başlanılmış “Tərtər şəhərinin içməli su təchizatı və kanalizasiya sistemlərinin yenidən qurulması layihəsi” 2035-ci ilə perspektiv inkişaf nəzərə alınmaqla, Tərtər şəhərində 26 min nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb. Layihə çərçivəsində gələcəkdə 21 min nəfərin yaşadığı 11 kəndin də içməli su təchizatının yaxşılaşdırılması nəzərdə tutulur. Ümumilikdə, bu layihədən Tərtər rayonunun 47 min nəfər sakini faydalanacaq.
Yeni layihəyə əsasən, Tərtər şəhərinə və ətraf kəndlərə içməli su subartezian quyulardan veriləcək. Bu məqsədlə layihələndirilmiş 9 ədəd subartezian quyusunun 4-də qazıntı işləri davam etdirilir. Bununla paralel olaraq Tərtər şəhərində ümumi tutumu 10 min kubmetr olan su anbarı və buradan şəhərə qədər 3,6 kilometr uzunluğunda magistral su xətti inşa edilir. Tikinti-quraşdırma işləri başlanandan ötən müddət ərzində Tərtər şəhərində 110 kilometr uzunluğunda paylayıcı su şəbəkəsinin 15 kilometrlik hissəsi tikilib və 700-ə yaxın ünvana birləşmə verilib. Ümumilikdə 2959 ünvan yeni şəbəkəyə qoşulacaq və bütün abunəçilər smart sayğacla təmin olunacaqlar.
Layihə çərçivəsində ilk dəfə Tərtər şəhərində kanalizasiya sistemi yaradılır. İnşası nəzərdə tutulan 104 kilometr uzunluğunda kanalizasiya şəbəkəsinin 22 kilometrlik hissəsində işlər başa çatıb.
İslam İnkişaf Bankı ilə birgə həyata keçirilən layihə çərçivəsində Daşkəsən şəhərinin içməli su təchizatı və kanalizasiya sistemləri də yenidən qurulur. Layihə 2035-ci ilə perspektiv inkişaf nəzərə alınmaqla, Daşkəsən şəhərində 16,2 min nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb. Bu layihə çərçivəsində gələcəkdə rayonun Alunitdağ və Mədənçilər qəsəbələrinin də içməli su təchizatı yaxşılaşdırılacaq və ümumilikdə, bu layihədən 17,8 min sakin faydalanacaq.
Daşkəsən şəhərini, Mədənçilər və Alunitdağ qəsəbələrini keyfiyyətli və dayanıqlı içməli su ilə təmin etmək üçün mənbə olaraq Qarainək və Gurbulaq bulaqları seçilib. Hazırda Qarainək su mənbəyində sugötürücü qurğunun tikintisi həyata keçirilir. Su mənbəyindən şəhərə qədər 20 kilometr uzunluğunda magistral su kəmərinin inşası yekunlaşmaq üzrədir. Şəhərin relyef baxımından hündür nöqtələrində ümumi tutumu 4500 kubmetr olan 4 ədəd anbarın 3-də və nasos stansiyalarında da tikinti-quraşdırma işləri davam etdirilir. Layihədə nəzərdə tutulan 18,3 kilometr uzunluğunda paylayıcı su şəbəkəsinin 4,2 kilometrlik hissəsində işlər başa çatıb. Ümumilikdə, 2560 ünvan yeni yaradılan şəbəkəyə qoşulacaq və abunəçilər smart sayğacla təmin olunacaqlar.
Layihə çərçivəsində Daşkəsən şəhərində kanalizasiya şəbəkəsi də yaradılır. Bu məqsədlə layihələndirilmiş 13,5 kilometr uzunluğunda kanalizasiya şəbəkəsinin 3 kilometrlik hissəsi inşa edilib. Daşkəsən şəhərində yaranan tullantı suların təmizlənib kənarlaşdırılması üçün sutkalıq məhsuldarlığı 3500 kubmetr olan çirkab sutəmizləyici qurğu tikiləcək. Layihənin icrasının 2016-cı ilin sonunda başa çatdırılması nəzərdə tutulur.
Qeyd edək ki, “Azərbaycanın 6 rayonunda milli su təchizatı və kanalizasiya proqramı layihəsi” çərçivəsində Tərtər və Daşkəsən şəhərləri ilə yanaşı, Gədəbəy, Astara, Qazax, Samux şəhərlərinin də su təchizatı və kanalizasiya infrastrukturlarının yenidən qurulması nəzərdə tutulur. Gədəbəy, Astara, Daşkəsən və Tərtər şəhərlərində tikinti-quraşdırma işləri davam edir, Qazax və Samux şəhərləri üzrə layihələrin icrasına isə hazırlıq görülür.

Paylaş:

Baxılıb: 859 dəfə