11 illik zəhmətin bəhrəsi

Bakı:

26 °C

53 %

9 m/s

Əlaqə

AZ RU EN

Ana səhifə / Sosial / 11 illik zəhmətin bəhrəsi

11 illik zəhmətin bəhrəsi

06.08.2015 [00:33]

Qəbul imtahanlarında 700 bal toplayan İbrahim Əhmədov: Bundan sonra da təhsilimi yüksək səviyyədə davam etdirəcəyəm
Nizami rayon Vüqar Sadıqov adına 214 saylı tam orta məktəbin məzunu İbrahim Əhməd oğlu Əhmədov II qrup üzrə ən yüksək nəticə göstərən abituriyentdir. Müəllimləri və valideynləri üçün 700 bal gözlənilən nəticə olsa da, İbrahim üçün bu, necə deyərlər, əsl sürpriz olub. İndi bütün tanışları İbrahimi təbrik edir, bu uğurlu nəticənin fərəh və məmnunluq doğurduğunu qeyd edirlər.
Bizimlə söhbətində İbrahim deyib ki, imtahanlarda belə yüksək nəticə göstərməyinin səbəbi məktəbdə oxuduğu 11 il ərzində dərslərinə məsuliyyətli yanaşmasıdır. “Bu, mənim üçün gözlənilməz oldu, çox sevinirəm. Sevincimin həddi-hüdudu yoxdur. Sözün açığı, bütün suallara doğru cavab verib 700 bal toplayacağımı gözləmirdim. İmtahan başlayanda çox həyəcanlı idim. Amma əvvəlcədən yaxşı hazırlaşdığım üçün sualları cavablandırmaqda bir o qədər də çətinlik çəkmədim. Bəzi suallar var idi ki, onlar çətin idi, amma asan suallar da çox idi. İmtahan başa çatdıqdan sonra yaxşı yazdığımı bilirdim. Amma 700 bal toplayacağımı düşünməzdim”.
Gələcək planlarından, arzularından, eləcə də, seçəcəyi ixtisasdan danışan İbrahim diplomat olmaq və ölkəmizi bütün dünyada layiqincə təmsil etmək arzusundadır. Ona görə də sənədlərini “ADA” Universitetinin beynəlxalq münasibətlər fakültəsinə verməyi düşünür. Əldə etdiyi yüksək nəticəyə görə valideynlərinə borclu olduğunu deyən İbrahim bundan sonra da təhsilini yüksək səviyyədə davam etdirəcəyinə söz verib: “Mən bu uğuru valideynlərimə borcluyam. Onlar mənə hər zaman dəstək olurdular. Təbii ki, müəllimlərimin də əziyyətini unutmaq olmaz. Xüsusən də mənə məktəbdə dərs deyən müəllimlərim çox çalışırdılar ki, yaxşı nəticə əldə edim. Bəlkə də, mənim 700 bal toplamağıma müəllimlərim məndən çox sevinirlər. Bizim məktəbimizdə təhsil çox yüksək səviyyədədir. Hər il, demək olar ki, məktəbimizdən belə yüksək nəticə göstərərək ali məktəblərə qəbul olan abituriyentlərimiz olur”.
Təhsilini doğma vətənində davam etdirmək istədiyini deyən İbrahim yüksək səviyyəli və keyfiyyətli təhsil almaq istəyən hər bir gəncə bu gün dövlətimiz tərəfindən xüsusi dəstək göstərildiyini bildirdi: “Bu gün dövlətimiz bizim oxumağımız, savadlı gənclər kimi yetişməyimiz üçün hər şey edir. Prezident İlham Əliyevin göstərişi və tapşırığı əsasında çoxlu sayda yeni məktəblər inşa olunub. Ümumiyyətlə, Azərbaycan dövləti təhsilin inkişafına xüsusi diqqət və qayğı göstərir”.
Bizimlə söhbətində İbrahim, həmçinin, ali məktəbə qəbul olmaq istəyən abituriyentlərə uğurlar arzulayaraq, 700 bal toplamağın sirrinin çox çalışmaq olduğunu vurğulayıb: “Ali məktəbə qəbul olmaq istəyən, bundan sonra imtahan verəcək bütün abituriyentlərə uğurlar arzulayıram. İnanıram ki, abituriyentlər öz üzərlərində çox işləsələr, yaxşı nəticə əldə edərlər”.
Vüsalə CAVANŞİR

Paylaş:

Baxılıb: 821 dəfə