Tərtər şəhərinin içməli su təchizatı və kanalizasiya sistemlərinin yenidən qurulması layihəsinin icrasına başlanıb

Bakı:

19 °C

72 %

6 m/s

AZ RU EN

Ana səhifə / Sosial / Tərtər şəhərinin içməli su təchizatı və kanalizasiya sistemlərinin yenidən qurulması layihəsinin icrasına başlanıb

Tərtər şəhərinin içməli su təchizatı və kanalizasiya sistemlərinin yenidən qurulması layihəsinin icrasına başlanıb

20.05.2015 [09:48]

Azərbaycan hökuməti və İslam İnkişaf Bankı tərəfindən birgə maliyyələşdirilən “Azərbaycanın 6 rayonunda Milli Su Təchizatı və Kanalizasiya Proqramı layihəsi” çərçivəsində Tərtər şəhərinin içməli su təchizatı və kanalizasiya sistemlərinin yenidən qurulması layihəsinin icrasına başlanıb. Tərtər şəhərində keçirilmiş təməlqoyma mərasimi ilə tikinti-quraşdırma işlərinə start verilib.
Təməlqoyma mərasimində çıxış edən Tərtər rayon İcra Hakimiyyətinin başçısı Müstəqim Məmmədov bu əlamətdar hadisə münasibəti ilə rayon sakinlərini təbrik edib, icrasına yeni başlanan layihənin böyük əhəmiyyətə malik olduğunu diqqətə çatdırıb: “Cəbhə bölgəsində yerləşən rayonumuz Prezident İlham Əliyevin diqqət və qayğısı sayəsində özünün yeni inkişaf dövrünü yaşayır. Su təchizatı və kanalizasiya sistemlərinin təməlinin qoyulması ilə tərtərlilərin ən böyük arzularından biri gerçəkliyə çevrilir. Əminik ki, layihənin icrası operativ həyata keçiriləcək, şəhər əhalisi ilə yanaşı, ətraf kəndlərimizin sakinləri də keyfiyyətli içməli su ilə təmin olunacaqlar”.
“Azərsu” ASC-nin sədri Qorxmaz Hüseynov çıxış edərək təmas xəttində düşmən mövqelərinə yaxın ərazidə yerləşən Tərtər rayonunda su təchizatının və kanalizasiya sisteminin yenidən qurulması layihəsinə başlanılmasının rayonun sosial-iqtisadi həyatında son dərəcə əlamətdar bir hadisə olduğunu, bu layihənin bölgənin sosial-iqtisadi inkişafına öz töhfəsini verəcəyini vurğulayıb: “Cəbhə bölgəsində yerləşən Tərtər şəhərinin su təchizatının yaxşılaşdırılması həmişə aktual olmuşdur. Prezident İlham Əliyevin tapşırıqlarına əsasən sərhəd rayonlarının kommunal infrastrukturunun yaxşılaşdırılmasına xüsusi önəm verilir və çalışacağıq ki, tikinti işləri intensiv qaydada həyata keçirilsin. Ümidvarıq ki, tərtərlilər tezliklə bu layihənin imkanlarından faydalanacaq”.
Rayon Ağsaqqallar Şurasının sədri Qədir Allahverdiyev düşmənin bir addımlığında yaşayan tərtərlilərin uzun illərdir içməli su sarıdan əziyyət çəkdiyini vurğulayıb, sakinlər adından Prezident İlham Əliyevə və “Azərsu” ASC-nin kollektivinə minnətdarlığını bildirib.
Daha sonra ilk borunun xəndəyə endirilməsi ilə Tərtər şəhərində içməli su və kanalizasiya layihəsinin təməli qoyulub.
Qeyd edək ki, “Tərtər şəhərinin içməli su təchizatı və kanalizasiya sistemlərinin yenidən qurulması layihəsi” 2035-ci ilə perspektiv inkişaf nəzərə alınmaqla Tərtər şəhərində 26 min nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb.
Tikinti-quraşdırma işlərinin 2017-ci ildə başa çatdırılması nəzərdə tutulur.

Paylaş:

Baxılıb: 812 dəfə