Məcburi köçkünlər Yeni ili yeni qəsəbədə qarşılayırlar

Bakı:

26 °C

49 %

1 m/s

Əlaqə

AZ RU EN

Ana səhifə / Sosial / Məcburi köçkünlər Yeni ili yeni qəsəbədə qarşılayırlar

Məcburi köçkünlər Yeni ili yeni qəsəbədə qarşılayırlar

31.12.2014 [09:48]

Dövlətimizin başçısı İlham Əliyevin 2004-cü il 1 iyul tarixli Sərəncamı ilə təsdiq edilmiş “Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı”na Azərbaycan Prezidentinin 2011-ci il 21 fevral tarixli Sərəncamı ilə təsdiq edilmiş Əlavələrin müvafiq bəndinə əsasən Gəncə şəhərinin Kəpəz rayonu ərazisində inşa edilən və 60 hektar sahəni əhatə edən qəsəbəyə əlamətdar bayramlar - Dünya Azərbaycanlılarının Həmrəylik Günü və Yeni il ərəfəsində Kəlbəcərdən və Xocalı rayonundan olan məcburi köçkünlərin köçürülməsi prosesi başa çatıb.
AzərTAc xəbər verir ki, bu proses Qaçqınların və Məcburi Köçkünlərin İşləri üzrə Dövlət Komitəsinin repatriasiya departamentinin rəhbərlik etdiyi köçürmə komissiyası tərəfindən aparılıb. Yeni salınan qəsəbələrdəki mənzillər ailə tərkibinə görə müvafiq rayon icra hakimiyyətinin, məcburi köçkün icmalarının və Qaçqınların və Məcburi Köçkünlərin İşləri üzrə Dövlət Komitəsinin nümayəndələrindən ibarət yaradılmış komissiyanın iştirakı ilə, püşkatma yolu ilə paylanılıb.
Qəsəbədə müasir tələblərə tam cavab verən 440 şagird yerlik məktəb, 50 yerlik uşaq bağçası, inzibati bina, tibb məntəqəsi, klub, poçt binası digər zəruri sosial-texniki infrastruktur yaradılıb. Digər ərazilərdə salınmış qəsəbələrdə olduğu kimi, bu qəsəbədə də elektrik enerjisi, içməli su və qaz təchizatı ilə bağlı hərtərəfli iş görülüb. Yol-küçə şəbəkəsinin salınması, abadlıq, yaşıllaşdırma işləri də yüksək səviyyədə aparılıb.
Burada yarımstansiyalar genişləndirilib, komplektləşdirilmiş transformator yarımstansiyaları quraşdırılıb. Uzunluğu 30 kilometrdən çox olan su kəməri çəkilib, nasosxana inşa olunub. Qəsəbəyə uzunluğu təqribən 25 kilometr olan qaz xətti çəkilib və 6 qaz təmizləyici məntəqə yaradılıb, müasir yol-küçə şəbəkəsi qurulub.
Ümumiyyətlə, qeyd edək ki, ötən müddətdə Prezident İlham Əliyevin müvafiq sərəncamları ilə təsdiq edilmiş Dövlət Proqramına və ona edilmiş Əlavələrə uyğun olaraq müxtəlif ərazilərdə məcburi köçkünlər üçün salınmış qəsəbələrin və digər zəruri obyektlərin açılışlarında dövlətimizin başçısının iştirakı, məcburi köçkünlərlə görüşü, onlarla birbaşa ünsiyyətdə olması, bu tədbirlər zamanı dərin məzmunlu çıxışları, onların qayğı və problemləri ilə yerində maraqlanması özlüyündə bir daha sübut edir ki, bu təbəqədən olan soydaşlarımızın problemlərinin həlli dövlət başçısının gündəlik diqqət mərkəzində duran əsas məsələlərdəndir.
Yaxın günlərə kimi Hacıkənd qəsəbəsində məskunlaşan, bu günlərdə isə Gəncə şəhərinin Kəpəz rayonu ərazisində salınmış yeni qəsəbəyə köçürülən Xocalı rayonunun Kosalar kənd sakinləri adından Ramil və Rafiq Quliyevlər, şəhid ailəsi Aida Quliyeva, Zakir İsgəndərov, Tofiq Məmmədov, Gülşən Muradova və Nazilə Abdullayeva Qaçqınların və Məcburi Köçkünlərin İşləri üzrə Dövlət Komitəsinə müraciət edərək yeni salınmış qəsəbəyə köçürmə prosesinin, bu işlərə məsul olan komissiyanın fəaliyyətinin yüksək səviyyədə təşkilinə, mənzil bölgüsündə heç bir mənfi hala yol verilməməsi üçün tələb olunan normalara tam əməl edilməsinə yaradılan şəraitə görə buraya köçürülən xocalılar adından minnətdarlıqlarını bildiriblər.
Elə bunlara görədir ki, indiyədək yeni məhəllələrə köçürülən məcburi köçkünlər, onları belə rahat mənzillərlə təmin etdiyinə görə Prezident İlham Əliyevə minnətdarlıqlarını bildirməklə onu da vurğulayırlar ki, bu, indiki şəraitdə onlar üçün dövlətimizin başçısı tərəfindən ən böyük hədiyyə, diqqət və qayğıdır. Məcburi köçkünlər haqlı olaraq qeyd edirlər ki, doğrudan da, insanın öz evinin varlığı, öz işığının daim yanması heç nə ilə əvəz oluna bilməz: “İllərdir biz bunun həsrətini çəkmişdik. Düzdür, burada da müvəqqəti məskunlaşmışıq. Amma insanın yaşaması, yaratması üçün onun rahat, geniş evə çox böyük ehtiyacı var. İndi biz də ağır şəraitdən xilas olub belə gözəl, geniş, müasir tipli, yaşayış üçün hər cür şəraitlə təmin olunmuş evlərə köçürülmüşük. Bu bir daha onu təsdiqləyir ki, dövlətimizin başçısı İlham Əliyevin apardığı uğurlu daxili və xarici siyasət sayəsində düşmən üzərində də qələbə çalaraq doğma yurdlarımıza qayıdacağıq”.

Paylaş:

Baxılıb: 907 dəfə