SOCAR-AQŞ məşhur “Qazma Mühəndisliyi” kitabını Azərbaycan dilinə tərcümə etdirib

Bakı:

29 °C

55 %

10 m/s

Əlaqə

AZ RU EN

Ana səhifə / Sosial / SOCAR-AQŞ məşhur “Qazma Mühəndisliyi” kitabını Azərbaycan dilinə tərcümə etdirib

SOCAR-AQŞ məşhur “Qazma Mühəndisliyi” kitabını Azərbaycan dilinə tərcümə etdirib

30.12.2014 [09:19]

Dünən SOCAR-AQŞ-nin baş inzibati binasında qazma mühəndisliyi sahəsində tanınmış amerikalı professor C.C.Azar və təcrübəli qazma məsləhətçisi Q.Robello Samuelin birgə yazdıqları qazma sənətinin əsaslarından və tətbiqindən bəhs edən məşhur “Qazma Mühəndisliyi” kitabının təntənəli təqdimat mərasimi keçirilib. Kitabın tərcümə edilərək çap edilməsində əsas məqsəd neft-qaz profilli ixtisaslar, xüsusən də qazma mühəndisliyi üzrə təhsil alan gələcək mütəxəssisləri müasir texnologiyalar, optimal qərarların qəbulu üsulları və vasitələri ilə tanış etməkdir.
Tədbiri giriş sözü ilə açan SOCAR-AQŞ-nin Baş direktoru Ramin İsayev bildirib ki, respublikamızda qazma texnologiyasının inkişafını, yenilikləri və nəhəng neft-qaz şirkətlərinin təcrübələrini özündə əks etdirən metodiki vəsaitlərə böyük ehtiyac duyulur. Doğma ana dilimizdə müasir neft-qaz tədris vəsaitlərinin məhdudluğu müvafiq sahələr üzrə təhsil alan tələbələrimizin tədris məsələsində ciddi əngəllər yaradır. Bu baxımdan SOCAR-AQŞ rəhbərliyinin “Qazma Mühəndisliyi” kitabını Azərbaycan dilinə tərcümə etdirmək təşəbbüsü ilə çıxış etməsi milli gənc mütəxəssislərin yetişdirilməsinə diqqətin təzahürüdür.
Tədbirdə iştirak edən Azərbaycan Dövlət Neft Akademiyasının “Neft və qaz quyularının qazılması” kafedrasının müdiri, professor Əlinazim Məmmədtağızadə bildirib ki, “Sənaye ili” çərçivəsində “Qazma Mühəndisliyi” kitabının Azərbaycan dilinə tərcümə edilərək tələbələrə təmənnasız paylanması çox müsbət addımdır. “Azərbaycan dilində neft-qaz sənayesi üzrə ədəbiyyatın məhdud olması pedaqoji heyət üçün tədris zamanı müəyyən problemlər yaradır. SOCAR-AQŞ rəhbərliyinin elmin inkişafına verdiyi bu töhfə digər sənaye müəssisələri üçün nümunə olmalıdır”.
Tədbirdə Azərbaycan Respublikası Milli Məclisinin deputatları, ali məktəblərin, yerli və xarici sənaye müəssisələrinin məsul əməkdaşları iştirak ediblər.
Sonda SOCAR-AQŞ MMC-nin Baş direktoru Ramin İsayev “Qazma Mühəndisliyi” kitablarından ibarət bağlamaları Azərbaycan Dövlət Neft Akademiyası, Bakı Ali Neft Məktəbi, Xəzər Universiteti, Qafqaz Universiteti, AMEA-nın Geologiya və Geofizika İnstitutu, Azərbaycan Milli Kitabxanası, ARDNŞ “Neftqazlayihə” İnstitutu, ARDNŞ Təlim, Tədris və Sertifikatlaşdırma İdarəsi, “Azneft” İstehsalat Birliyi və xarici şirkətlərə hədiyyə edib.

Paylaş:

Baxılıb: 1088 dəfə