Azərbaycan Mətbuat Şurasında tanınmış jurnalist Əfqan Əsgərovun 85 illiyi ilə bağlı mərasim keçirilib

Bakı:

15 °C

67 %

5 m/s

AZ RU EN

Ana səhifə / Sosial / Azərbaycan Mətbuat Şurasında tanınmış jurnalist Əfqan Əsgərovun 85 illiyi ilə bağlı mərasim keçirilib

Azərbaycan Mətbuat Şurasında tanınmış jurnalist Əfqan Əsgərovun 85 illiyi ilə bağlı mərasim keçirilib

27.09.2014 [10:32]

Sentyabrın 26-da Azərbaycan Mətbuat Şurasında yazıçı-jurnalist Əfqan Əsgərovun anadan olmasının 85 illik yubileyi ilə bağlı mərasim keçirilib.
AzərTAc xəbər verir ki, tədbiri açan Azərbaycan Mətbuat Şurasının sədri Əflatun Amaşov rəhbərlik etdiyi qurumun ömrünü-gününü jurnalistika peşəsinə sərf etmiş qələm sahiblərinin yaradıcılıq məclislərinin təşkilini ənənəyə çevirdiyini bildirib. Diqqətə çatdırıb ki, bu işi daha səmərəli şəkildə gerçəkləşdirmək üçün Mətbuat Şurasının tərkibində Ahıl Jurnalistlər Məclisi yaradılıb. Məclisin xətti ilə indiyədək çoxsaylı tədbirlər təşkil olunub. Bu gün həmin mərasimlərdən biri - yazıçı-jurnalist Əfqan Əsgərovun 85 illik yubileyi qeyd edilir.
Mətbuat Şurasının sədri vurğulayıb ki, Azərbaycan ədəbiyyatının inkişafında mühüm xidmətlər göstərmiş Əfqan Əsgərov ömrünün yarım əsrdən çox hissəsini mətbuata, ədəbiyyata həsr edib, həm nəsr, həm də dramaturgiya sahəsində maraqlı əsərlər yaradıb. Əfqan Əsgərov 1929-cu ildə Şirvanın Qarabağlılar kəndində anadan olub. O, ötən əsrin 50-ci illərində ədəbiyyata gəlib, həmin vaxtdan da mətbuatda yorulmadan fəaliyyət göstərib. Ə.Əsgərov jurnalist kimi ilk dəfə “Azərbaycan gəncləri” qəzetində fəaliyyətə başlayıb. Qəzetin səhifələrində bir-birinin ardınca maraqlı publisistik yazıları, oçerkləri, felyeton və hekayələri, hətta “Poçtalyon” kino-ssenarisi çap edilən Ə.Əsgərov çox gənc yaşlarından oxucuların məhəbbətini qazana bilib.
Vurğulanıb ki, kinostudiyanın problemləri ilə bağlı “Kommunist” qəzetində məqalə ilə çıxış edən Əfqan Əsgərovun bu yazısı həmin vaxt Azərbaycan KP MK-nın şöbə müdiri Şıxəli Qurbanovun da iştirak etdiyi müşavirədə müzakirə olunub. Mərhum Şıxəli Qurbanov ona “Kommunist” qəzetində işləməyi məsləhət görüb. Beləliklə, Əfqan Əsgərov həmin qəzetdə ədəbiyyat şöbəsinin müdiri vəzifəsinə təyin edilib. 1989-cu ildə “Sovet kəndi” qəzetinin redaktoru olub. 1991-ci ildə Azərbaycan Ali Sovetinin orqanı olan “Həyat” qəzetinin baş redaktoru işləyib.
Əfqan Əsgərov ədəbi ictimaiyyət arasında həm də istedadlı yazıçı və dramaturq kimi tanınır. Onun qələmindən çıxan “Gülyanaq”, “Katib”, “Həsrət də bir vüsaldır”, “Qartal əfsanəsi” romanları, “Dədə Bəhmən” trilogiyası, “Qozbel”, “Məhəbbət ətirli qərənfilim”, “Dünya gözəlliyindir”, “O, daş deyildir” və başqa povestləri ədəbi nəsrimizin inkişafında mühüm əhəmiyyət kəsb edən əsərlərdən sayılır.
Diqqətə çatdırılıb ki, dramaturgiya sahəsində də qələmini sınayan Ə.Əsgərovun “Sarı əlcək”, “O mənim oğlumdur”, “Dağ seli”, “Gülməyən adam” adlı pyesləri respublikamızın müxtəlif teatrlarında tamaşaya qoyulub. Tamaşaçılar tərəfindən xüsusi rəğbətlə qarşılanan “Qız atası” komediyası onun ən yaxşı pyeslərindən sayılır.
Ə.Amaşov Ə.Əsgərova rəhbərlik etdiyi qurumun fəxri diplomunu təqdim edib.
Yubiley mərasimində Azərbaycan Mətbuat Şurasının Ahıl Jurnalistlər Məclisinin rəhbəri, Əməkdar Jurnalist Yusif Kərimov məclisin fəaliyyətində ömrünü-gününü jurnalistika peşəsinin məziyyətlərinə həsr etmiş görkəmli qələm sahiblərinin yada salınmasının mühüm əhəmiyyət daşıdığını bildirib. Ə.Əsgərovun müəllifi olduğu tarixi romanlarda qəhrəmanların sovet dövrünün xarakterik mənfi təqdimat tərzindən fərqli şəkildə oxuculara çatdırıldığını önə çəkən Y.Kərimov yubilyarın yaradıcılıq dəst-xəttindəki bir sıra xüsusiyyətləri sadalayıb, onu cəsarətli qələm sahibi kimi səciyyələndirib. Y.Kərimov, eyni zamanda, məlumat verib ki, Ahıl Jurnalistlər Məclisi Azərbaycan milli mətbuatının 140 illiyi ilə bağlı veteran jurnalistlərin müxtəlif illərdə qələmə aldıqları, həmçinin onlar barədəki yazıların yer alacağı toplu hazırlamağı nəzərdə tutur.
Mərasimdə çıxış edən veteran jurnalistlərdən Əli İldırımoğlu, Şakir Yaqubov, Müştəba Əliyev, Rafiq Həsənov, Rafiq Hacıyev, həmçinin “Xalq qəzeti”nin əməkdaşı Tahir Aydınoğlu, “Dünya və İnkişaf” İctimai Birliyinin sədri Namazəli Mustafayev və başqaları Ə.Əsgərovu ustad jurnalist, gözəl nəsr əsərlərinin yaradıcısı, səmimi və qayğıkeş dost kimi xarakterizə edərək onunla bağlı xatirələrini bölüşüblər.
Sonda çıxış edən Əfqan Əsgərov taleyindən razı olduğunu dilə gətirib, xoş sözlərə görə toplantı iştirakçılarına təşəkkürünü bildirib.
Tədbirdə yubilyara qiymətli hədiyyələr təqdim olunub.

Paylaş:

Baxılıb: 965 dəfə