Azərbaycan mülki aviasiyasının canlı əfsanələrindən olan Əzimbala Əzimova həsr edilmiş tədbir keçirilib

Bakı:

15 °C

94 %

4 m/s

AZ RU EN

Ana səhifə / Sosial / Azərbaycan mülki aviasiyasının canlı əfsanələrindən olan Əzimbala Əzimova həsr edilmiş tədbir keçirilib

Azərbaycan mülki aviasiyasının canlı əfsanələrindən olan Əzimbala Əzimova həsr edilmiş tədbir keçirilib

15.05.2014 [09:00]

Mayın 14-də Milli Aviasiya Akademiyasının nəzdində fəaliyyət göstərən Mülki Aviasiya Muzeyində Azərbaycan mülki aviasiyasının canlı əfsanələrindən biri, “Şöhrət” ordenli Əzimbala Əzimova həsr edilmiş “50 il səmada” adlı tədbir keçirilib.
AzərTAc xəbər verir ki, tədbirdə Milli Aviasiya Akademiyasının (MAA) rektoru, akademik Arif Paşayev, “Azərbaycan Hava Yolları” Qapalı Səhmdar Cəmiyyətinin (QSC) əməkdaşları, akademiyanın professor-müəllim və tələbə heyəti iştirak ediblər.
Mərasimi muzeyin direktoru, Əməkdar Mədəniyyət İşçisi Firəngiz Hüseynova açaraq Əzimbala Əzimovun həyat yolundan, Azərbaycan milli aviasiyasının inkişafındakı xidmətlərindən danışıb.
Vurğulanıb ki, Azərbaycan mülki aviasiyasının bayraqdarlarından olan Əzimbala Əzimov 50 ildir bu sahədə çalışır. Bu müddətdə o, 28 min 500 saat uçuşda olub. Bütün MDB məkanında bu göstərici birincidir. Ə.Əzimov hazırda MAA-da pedaqoji fəaliyyətlə məşğuldur. Əfsanəvi pilot həm də uçuş heyətlərinin məsləhətçisidir.
Diqqətə çatdırılıb ki, Əzimbala Əzimova verilən fəxri fərmanlar, qol saatı Mülki Aviasiya Muzeyində ən dəyərli eksponat kimi qorunub saxlanılır. Çünki o, canlı əfsanədir.
Sonra tədbir iştirakçıları “50 il səmada” adlı videoslayda baxıblar.
Tədbirdə “Azərbaycan Hava Yolları” QSC-nin aeronaviqasiya idarəsinin direktoru Valeri Sultanov, “Silk Way” aviaşirkətinin əməkdaşları Azər Babayev, İmran Baqiyev, Rahib Şərbətov və başqaları çıxış edərək, təyyarəçinin keçdiyi şərəfli ömür yolundan, müasir mülki aviasiyamızın inkişafındakı əvəzsiz xidmətlərindən söhbət açıblar.
Vurğulanıb ki, Ə.Əzimov həlledici məqamlarda verdiyi düzgün qərarlarla yüzlərlə insanın həyatını xilas edib.
Xüsusi qeyd edilib ki, onun həyatı gənc pilotlar üçün də nümunədir. 1991-ci ildə Leninqrad Mülki Aviasiya Akademiyasını mühəndis-təyyarəçi ixtisası üzrə bitirən Ə.Əzimov indiyədək yüzlərlə kadrın hazırlanmasında əvəzsiz xidmətlər göstərib. Bu gün onun tələbələrinin uçuş coğrafiyası, demək olar ki, bütün Yer planetini əhatə edir.
Bildirilib ki, təcrübəli pilotun əməyi dövlətimiz tərəfindən yüksək qiymətləndirilib. Azərbaycan Respublikasının Prezidenti İlham Əliyevin 2006-cı il 1 iyun tarixli Sərəncamı ilə Əzimbala Xanbaba oğlu Əzimov “Şöhrət” ordeni ilə təltif olunub. Bu mükafat Ə.Əzimovun ömrünün səmada keçən əlli illik hissəsinə düşən şöhrət işığıdır.
Mərasimdə çıxış edən Əzimbala Əzimov tədbirin təşkilinə görə Milli Aviasiya Akademiyasının rektoru, akademik Arif Paşayevə dərin minnətdarlığını bildirib. O, tələbələrə seçdikləri peşənin sirlərinə dərindən yiyələnməyi, daim öz üzərlərində çalışmağı, biliklərini və təcrübələrini zənginləşdirməyi tövsiyə edib.
Sabunçu rayonundakı 187 nömrəli məktəbin şagirdlərinin ifasında aviasiya və vətənpərvərlik mövzusundakı şeirlər səsləndirilib.
MAA-nın tədris işləri üzrə prorektoru Ədalət Səmədov təmsil etdiyi ali təhsil müəssisəsi adından Əzimbala Əzimovu təbrik edib, ona uzun ömür, cansağlığı arzulayıb.

Paylaş:

Baxılıb: 1223 dəfə