“Böyük qələbəyə inamla” sənədli filminin təqdimatı olub

Bakı:

20 °C

64 %

3 m/s

Əlaqə

AZ RU EN

Ana səhifə / Sosial / “Böyük qələbəyə inamla” sənədli filminin təqdimatı olub

“Böyük qələbəyə inamla” sənədli filminin təqdimatı olub

06.05.2014 [08:52]

Azərbaycan Respublikası Milli Məclisinin sədr müavini Bahar Muradovanın təşəbbüsü, “Azərbaycan Televiziya və Radio Verilişləri” Qapalı Səhmdar Cəmiyyəti və Füzuli rayon İcra Hakimiyyətinin birgə təşkilatçılığı ilə çəkilmiş, Ümummilli lider Heydər Əliyevin anadan olmasının 91-ci il dönümünə həsr olunmuş “Böyük qələbəyə inamla” sənədli filminin mayın 5-də təqdimat mərasimi keçirilib.
AzərTAc xəbər verir ki, tədbiri açan Füzuli rayon İcra Hakimiyyətinin başçısı Alı Alıyev sənədli film haqqında danışıb. Qeyd edilib ki, Ermənistan silahlı qüvvələrinin Azərbaycana təcavüzü nəticəsində 1993-cü ilin avqustunda Füzuli rayonu da düşmən tərəfindən işğal olunub.
Daha sonra “Böyük qələbəyə inamla” sənədli filmi nümayiş olunub. Filmdə Füzuli rayonunun tarixi və memarlıq abidələri haqqında ətraflı məlumat verilir.
Milli Məclis sədrinin müavini Bahar Muradova tədbirdə çıxış edərək “Böyük qələbəyə inamla” sənədli filminin əhəmiyyətindən danışıb. Bahar Muradova vurğulayıb ki, film tariximizə nəzər salmaq baxımından çox önəmlidir. Bu film həm də fədakar insanlar haqqında bir hekayədir: “Hər bir azərbaycanlı fəxr etməlidir ki, qədim tarixə malik bir xalqın nümayəndəsidir. Azərbaycan xalqının qədim mədəniyyəti, zəngin tarixi keçmişi, qəhrəmanlıq salnaməsi vardır. Bütün bunlar həm də xalqımızı uğurlu gələcəyə aparan bir yoldur. Xalqımız bu tarixi yolu keçərkən bir çox çətinliklərlə üzləşib. Bunu filmdəki kiçik kadrlar da sübut edir. Amma biz xarakterimizə uyğun olaraq çətinliklərlə üzləşdiyimiz zaman heç vaxt qürur hissimizi itirmədik. Sabaha inamla yaşadıq. Hər şeyin yaxşı olacağına inandıq”.
Bahar Muradova diqqətə çatdırıb ki, Azərbaycan xalqı Füzuli əhalisinin timsalında öz ordusuna, dövlətinə, öz siyasi ideologiyasına, Prezidentinə inanır. Bu inamı Azərbaycanın qurucusu və memarı, Ümummilli lider Heydər Əliyevin siyasi ideologiyası şərtləndirir. Bütün qələbə və uğurlarımız da məhz bu inamdan doğur.
Milli Məclis sədrinin müavini əminliklə bildirib ki, yurd-yuvasından didərgin düşmüş hər bir insan qısa müddətdən sonra uğrunda vuruşduğumuz o torpaqlara qayıdacaq. Şəhid olmuş hər bir insanımız, dağıdılmış hər bir mədəni-milli abidəmiz üçün düşmən cavab verəcək. Yaşadıqlarımız bizi nəticə çıxarmağa vadar edir, bizi bu dövlətə, onun taleyinə sahiblik hissinə məsuliyyətlə yanaşmağa çağırır.
Bildirilib ki, filmin məqsədlərindən biri də təmas xəttində müxtəlif məhrumiyyətlərə məruz qalmış insanların necə böyük fədakarlıqla, qəhrəmanlıqla, yurduna bağlılıq hissi ilə yaşadığını göstərməkdir.
Horadiz döyüşündən söhbət açan Bahar Muradova bunun hərb tariximizin ən şanlı səhifələrindən biri olduğunu söyləyib.
Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov Ulu öndər Heydər Əliyevin rəhbərliyi ilə Füzulinin 22 yaşayış məntəqəsinin işğaldan azad edilməsi, həmin ərazilərdə aparılan yenidənqurma və bərpa işlərindən danışıb.
Füzulinin tarixi, ziyalıları barədə iştirakçılara məlumat verən Baş nazirin müavini bu rayonun ölkəmizin qədim yaşayış məskənlərindən biri olduğunu bildirib. Əli Həsənov qeyd edib ki, dünyada ən qədim yaşayış məskəni olan Azıx və Tağlar mağara düşərgələri tarixi mədəniyyət nümunələri ilə zəngin olan bu rayonun ərazisindədir. Bildirilib ki, işğal nəticəsində rayona ümumilikdə 30 milyard dollar ziyan dəyib.
Horadiz əməliyyatından danışan Əli Həsənov bildirib ki, bu ərazinin işğaldan azad olunması çox mühüm bir hadisədir. Çünki Horadiz çox əlverişli bir strateji mövqeyə malikdir. O deyib ki, Horadiz, həmçinin Sovet hakimiyyəti dövründə həmin ərazidə yerləşən ətraf rayonlar üçün regional baza idi. Burada regional neft bazası, pambıqtəmizləmə zavodu və digər önəmli müəssisələr var idi. Bundan başqa, Horadizin işğal olunması ilə digər rayonlar da blokada şəraitinə düşürdü. Buna görə də Ulu öndər əməliyyatın məhz bu istiqamətdə aparılmasını qərara alıb.
Azərbaycanın əldə etdiyi nailiyyətlərdən danışan Baş nazirin müavini deyib: “Biz bugünkü inkişafa görə xalqımızın Ümummilli lideri Heydər Əliyevə və Onun siyasi kursunun layiqli davamçısı İlham Əliyevə borcluyuq”.
Əli Həsənov vurğulayıb ki, dünya birliyində Ermənistan-Azərbaycan, Dağlıq Qarabağ münaqişəsinin həllinə münasibətdə ədalətsizlik hökm sürür. Çox təəssüflər olsun ki, beynəlxalq təşkilatların qərarlarını icra etməyənlərə himayədarlıq olunur, onların hərəkətləri əməldə dəstəklənir.
Baş nazirin müavini əmin olduğunu bildirib ki, torpaqlarından didərgin düşmüş həmvətənlərimiz yaxın vaxtlarda öz ata-baba yurdlarına qayıdacaqlar.
“Azərbaycan Televiziya və Radio Verilişləri” Qapalı Səhmdar Cəmiyyətinin baş proqram direktoru İlham Alışanov Azərbaycan Televiziyasının hər zaman Qarabağ mövzusuna xüsusi diqqət ayırdığını söyləyib. Bildirilib ki, bu mövzuda çox sayda filmlər, silsilə verilişlər hazırlanıb.
Sonra Horadiz əməliyyatının iştirakçısı, Qarabağ müharibəsi veteranı Füzuli Rzayev, Füzuli rayon sakini Məcnun Vəliyev çıxış edərək torpaqlarımızın işğaldan azad edilməsi uğrunda döyüşə hər an hazır olduqlarını bildiriblər. Onlar, həmçinin, dövlət tərəfindən göstərilən diqqət və qayğıya görə minnətdarlıqlarını ifadə ediblər.
Filmin təqdimat mərasimində dövlət və hökumət nümayəndələri, Milli Məclisin deputatları, ziyalılarla yanaşı, ölkəmizdə fəaliyyət göstərən diplomatik korpusun təmsilçiləri də iştirak ediblər.