Görkəmli alimin anadan olmasının 90 illik yubileyinə həsr edilmiş “Müasir coğrafiya elminin tətbiqi istiqamətləri” mövzusunda konfrans keçirilib

Bakı:

25 °C

55 %

1 m/s

AZ RU EN

Ana səhifə / Sosial / Görkəmli alimin anadan olmasının 90 illik yubileyinə həsr edilmiş “Müasir coğrafiya elminin tətbiqi istiqamətləri” mövzusunda konfrans keçirilib

Görkəmli alimin anadan olmasının 90 illik yubileyinə həsr edilmiş “Müasir coğrafiya elminin tətbiqi istiqamətləri” mövzusunda konfrans keçirilib

25.04.2014 [09:24]

Aprelin 24-də Bakı Dövlət Universitetində (BDU) görkəmli alim, coğrafiya elmləri doktoru, professor Rizvan Xanəmi oğlu Piriyevin anadan olmasının 90 illik yubileyinə həsr edilmiş “Müasir coğrafiya elminin tətbiqi istiqamətləri” mövzusunda elmi-praktiki konfrans keçirilib.
Tədbirdən əvvəl BDU-nun coğrafiya fakültəsində görkəmli alimin xatirə lövhəsinin açılışı olub.
Konfransda BDU-nun rektoru, Milli Məclisin deputatı, akademik Abel Məhərrəmov, coğrafiya fakültəsinin dekanı, professor Fərda İmanov görkəmli alim Rizvan Piriyevin çətin, lakin mənalı ömür yolundan, geniş elmi və pedaqoji fəaliyyətindən, Azərbaycan elminə verdiyi töhfələrdən danışıblar.
Bildirilib ki, alimin elmi tədqiqatlarında əsas istiqamət morfometriya sahəsi olub. O, Azərbaycan Respublikasının və Xəzər dənizi akvatoriyasının morfometrik xarakteristikalarının öyrənilməsi ilə məşğul olub. Professor R.Piriyev ilk dəfə olaraq relyefin riyazi modelini xarakterizə etmək məqsədi ilə riyazi-statistik üsullarla morfometrik göstəricilərin, o cümlədən relyefin funksional paylanmasını ekstremal yüksəkliklər üzrə tədqiq edib.
Alim respublika ərazisi timsalında ilk dəfə olaraq relyefin parçalanmasını xarakterizə edən morfometrik göstəriciləri təyin edib və bir sıra orta miqyaslı xəritələr tərtib edib.
R.Piriyev kartoqrafiya, morfometriya sahəsində tanınmış alimdir, Azərbaycan morfometriya məktəbinin əsasını qoyub. Alimin yaratdığı bu məktəb nəinki keçmiş SSRİ-də, eləcə də bir çox xarici ölkələrdə məşhur olub.
Professor R.Piriyev bir çox elmi məqalələrin, morfometrik xəritə və kitabların müəllifidir. Onun “Relyefin morfometrik təhlili” monoqrafiyası, ilk dəfə olaraq Azərbaycan dilində hazırladığı kartoqrafiya və geodeziyaya aid dərsliklərdən və elmi-metodik vəsaitlərdən ali məktəblərdə geniş istifadə edilir.
60-dək əsərin müəllifi olan R.Piriyev Azərbaycan Dövlət Universitetində 35 il elmi-pedaqoji fəaliyyətlə məşğul olub. O, bir neçə il geologiya-coğrafiya fakültəsinin dekanı olub, sonra isə özünün təşəbbüsü ilə açılmış Geodeziya və kartoqrafiya kafedrasına rəhbərlik edib.
R.Piriyev 1989-cu ildə dünyasını dəyişib. Azərbaycan Milli Elmlər Akademiyasının müxbir üzvü Tofiq Hacıyev, BDU-nun professoru Şövqi Göyçaylı və digər alimlər də professor Rizvan Piriyevin elmi yaradıcılığının əhəmiyyətindən bəhs edib, onunla bağlı xatirələrini söyləyiblər.
Alimin oğlu, Bakı Slavyan Universitetinin pedaqoqika kafedrasının dekanı, professor Eldar Piriyev atasının xatirəsinə göstərilən diqqətə görə tədbirin təşkilatçılarına və iştirakçılarına təşəkkürünü bildirib.

Paylaş:

Baxılıb: 1214 dəfə