Xanın kəndini nura boyayan tonqal

Bakı:

25 °C

52 %

2 m/s

Əlaqə

AZ RU EN

Ana səhifə / Siyasət / Xanın kəndini nura boyayan tonqal

Xanın kəndini nura boyayan tonqal

20.03.2024 [09:45]

Ulu əcdadlarımızın yazın gəlişinə duyduqları sevinc hissi ilə qeyd etdikləri Novruz bayramı əsrlərdən üzü bəri keşməkeşli və şərəfli yollar keçərək bu gün Xanın kəndində nuru səmanı aydınladan bayram tonqalı ilə rövnəqləndi.

Türlü-türlü adət-ənənələri ilə əlamətdar olan Novruzun sevdiyim atributlarından biridir odlar ölkəsini mənalandıran tonqalı. Tonqal ulularımızdan bizə yadigar qalan ayindir, göndərişdir. Elə bir ayin ki, sevinci də, kədəri də özündə eyni dərəcədə şəkilləndirir. Babalarımız məktubun, radionun, telefonun yox zamanlarında sevinclərini də, kədərlərini də uca yerdə qaladıqları tonqallar vasitəsi ilə bir-birinə xəbər edərmişlər.

Əsrlərin bu tayında, 2024-cü ilin 18 martında qədim Azərbaycan torpağı, Pənah xanın yurdu Xankəndidə dövlətimizin başçısı, cənab Prezident İlham Əliyev tərəfindən qalanan bayram tonqalı mənə ilk növbədə məhz bu xəbərləşmə ayinini xatırlatdı. Altı ay öncə azadlığı ilə xalqımızı illərdir həsrəti olduğu suverenliyə qovuşduran Xankəndi şəhərində qalib sərkərdəmiz tərəfindən yandırılan tonqal bu ali xəbəri sanki bütün dünyaya car çəkdi. Onun kor qalan gözlərinə, kar olan qulaqlarına bir daha, təkrarən dedi: “Qarabağ Azərbaycandır!”

Novruz tonqalının daha bir gözəl əlaməti var. O tonqaldan atlanarkən “ağırlığım, uğurluğum odda yansın”- deyərlər. Biz də suverenliyimizin ilk Novruzunda ötüb keçən bütün dərdlərimizin, ağrı-acılarımızın, həsrətlərimizin odda yanmasını dilədik. Azadlığın ilk bayram tonqalı üç onillikdə bu torpaqlarda “hakim olmuş” pislikləri, mənfurluqları yandırıb külə sevirdi, havaya sovurdu. Əvəzində yeni, azad günləri müjdələyən əbədi məşələ çevrildi.

Axı od həm də azadlığın, yeniliyin nişanıdır. Köhnəlikdən azad olmaq, günahlardan arınmaqdır. Azərbaycan xalqı üçün də azad, firavan həyat, yeni gün doğur. Xüsusən, 30 il öz ev-eşiklərindən, doğma ocaqlarından uzaq qalmış yurddaşlarımızın həsrəti sona yetib. Bu gün bayram tonqalı qalanan Xankəndi və bütün Qarabağımız özünün əsl sahiblərinə, doğma övladlarına qucaq açmağa hazırlaşır.

Eyni zamanda, bu, qarşı tərəfə günahlarından arınmaq, yeni və təmiz başlanğıclara rəvac vermək, regionda sülhü bərqərar etmək üçün göndərilən növbəti mesajdır.

Əzəldən od əcdadlarımız üçün gücün, qüvvətin rəmzi olub. Ali Baş Komandan, qalib ölkənin qalib lideri İlham Əliyev Xankəndinin mərkəzində- “Zəfər meydanı”nda qaladığı bayram tonqalı ilə özünün gücünü, qüdrətini, “Dəmir yumruğ”un şücaətini bir daha bütün dünyaya sübut etmiş oldu.

Bəli, artıq Azərbaycan əbədiyyən öz torpaqlarının hakimi, tək sahibidir. Bundan sonra bu Novruz tonqalları onun hər guşəsində xalqının və onun qətiyyətli liderinin gücünü hər kəsə təkrar-təkrar sübut edərcəsinə əbədi yanacaq.

Suveren Azərbaycanımızın ilk Novruz bayramı mübarək olsun!

Şahanə MÜŞFİQ

Paylaş:

Baxılıb: 652 dəfə