ABŞ-ın və dünyanın aparıcı mütəxəssisləri metanolun dünya iqtisadiyyatı üçün əhəmiyyətini vurğulayırlar

Bakı:

20 °C

73 %

10 m/s

AZ RU EN

Ana səhifə / Siyasət / ABŞ-ın və dünyanın aparıcı mütəxəssisləri metanolun dünya iqtisadiyyatı üçün əhəmiyyətini vurğulayırlar

ABŞ-ın və dünyanın aparıcı mütəxəssisləri metanolun dünya iqtisadiyyatı üçün əhəmiyyətini vurğulayırlar

07.06.2012 [00:59]

Bu yaxınlarda ABŞ-ın Enerji Təhlükəsizliyi üzrə Şurası (USESC) və Metanol İnstitutunun birgə əməkdaşlığı ilə Vaşinqtonda Metanol Siyasəti üzrə Forum keçirilib. Tədbirdə müxtəlif iqtisadçı alimlər, federal agentliklərin əməkdaşları, eləcə də, konqresmenlərlə sözügedən məsələ ətrafında müzakirələr aparmaq üçün dünyanın bütün qitələrindən gəlmiş təqribən 200-dək nümayəndə iştirak edib. Hazırda, dünyanın ən aktual məsələlərindən olan bərpa olunan enerji mənbələrinin istifadəsi sahəsində dünya sənayesi üçün böyük əhəmiyyətə malik olan forum dörd sessiya iclası və nahar masası ətrafında plenar müzakirələrlə işini davam etdirib. Forumda ABŞ-da təbii qazın stabil olaraq aşağı qiymətləri ilə yaradılan bazarlardan başlayaraq bərpa olunan enerji mənbəyi sayılan metanolun hal-hazırda həyata keçirilən qlobal təcrübə proqramlarına daxil olunması yollarının işlənib hazırlanmasınadək ən müxtəlif mövzular ətrafında müzakirələr aparılıb. Forumun təntənəli açılışından sonra Energetika Departamenti sədrinin siyasi və beynəlxalq məsələlər üzrə köməkçisi David Sandalou tədbir iştirakçılarını video müraciətlə salamlayıb. Cənab Sandalou öz nitqində metanolun əhəmiyyətini xüsusi olaraq vurğulayıb: “Metanol nəqliyyat yanacağı kimi bir çox cəlbedici xüsusiyyətlərə malikdir. Hal-hazırda təbii qazın qiymətlərinin aşağı və neftin qiymətlərinin yuxarı olduğu bir şəraitdə, metanol istehlakçıların yanacaqdoldurma məntəqələrində yanacağın alınmasına sərf etdikləri xərclərini azaltmağa kömək edə bilər. Biz Energetika Departamentində bu sahə üzrə əlavə tədqiqatların aparılmasını planlaşdırırıq. Hazırda, metanolu az qatılıq dərəcələri ilə və yaxud digər üsullardan istifadə edərək maye yanacağa qatmaqla, neftin metanolla qlobal miqyasda əvəz edilməsinin potensialına dair, eləcə də, qeyd olunan problemlərdən bəzilərini ən yaxşı hansı üsulla həll etmək olar kimi məsələlər ətrafında tədqiqat işləri davam etdirilir. Biz bu mövzuların tədqiq edilməsində sizin kimi dəyərli mütəxəssislərin xidmətindən də istifadə etməyə, sizinlə sıx əməkdaşlıq etməyə hazırıq”.
Metanolun tətbiqi sahəsində aparıcı bölgə olan çinin Şanksi əyalətinin keçmiş qubernatoru Vanq Maolin öz doğma əyalətində metanolla aparılan təcrübələrdən əldə olunmuş uğurları forum iştirakçılarına təqdim edib: “Benzinin və dizel yanacağının metanolla əvəz olunmasının qarşısında duran əsas texniki əngəllər aradan götürülmüşdür”. O, həmçinin, bildirib ki, ötən il ərzində Şanksi əyalətində metanol əsaslı benzinin istehsalı 6 milyon tondan artıq olub. Növbəti bir neçə il ərzində isə çoxyanacaqlı mühərriklərlə təchiz edilmiş yüz minlərlə avtomobil çinin avtomobil yollarında şütüyəcək. Konfrans çərçivəsində, həmçinin, ABŞ-ın Enerji Təhlükəsizliyi üzrə Şurasının üzvləri ilə nahar masası ətrafında görüş də keçirilib. Bu görüş çərçivəsində aparılan müzakirələrdə əsas diqqət rəqabətədözümlü nəqliyyat yanacağı bazarının yaradılmasının vacibliyinə yönəldilib. Görüşdə iştirak edən ABŞ prezidentinin milli təhlükəsizlik məsələləri üzrə keçmiş müşaviri Robert MakFarleyn alternativ enerji mənbələrinin əhəmiyyətini qeyd edərək deyib: “Biz yanacaqdoldurma məntəqələrində rəqabət yaratmalıyıq. Yeganə yanacaq mənbəyindən əl çəkmək üçün biz indiki kimi əlverişli şəraitə hələ heç vaxt malik olmamışıq”.
ABŞ-ın Enerji Təhlükəsizliyi üzrə Şurasının digər üzvləri də çıxış edərək MakFarleyni dəstəkləyiblər. çıxışlarda nəqliyyat yanacağı bazarına alternativ enerji mənbələri ilə bağlı olan həll yollarının nüfuz etməsinin, eləcə də, Amerikanın və bütün dünyanın neftdən asılılığının azaldılması məqsədilə, rəqabətin yaradılmasının vacibliyi vurğulanıb.
Məlumat üçün bildirək ki, metanol- bir molekul kimi, təbiətdə təbii halda rast gəlinən, ətraf mühitdə mövcud olan, bioloji cəhətdən parçalanan spirtdir və ona hətta kosmosda belə rast gəlinə bilər. Metanol təbii şəkildə müxtəlif bitki və heyvanlarda bioloji parçalanma prosesində formalaşır və biz onunla demək olar ki, hər gün meyvələr, şirələr və hətta şərab vasitəsilə kontaktda oluruq. Hərçənd böyük miqdarda insan orqanizminə düşdüyü təqdirdə metanol zəhərli ola bilər, təbiətdə geniş yayılmış bu molekul bioloji cəhətdən tez parçalandığından ətraf mühitə atıldıqda çox zəif təsirə malik olur. Metanol ətraf mühitə atıldıqda o, sürətlə digər tərkib hissələrinə ayrılır, suda tamamilə həll olunur və bir sıra müxtəlif bakteriyalar üçün qidalanma mənbəyinə çevrilir. Buna görə də metanol çox vaxt sənayenin müxtəlif sahələrində, məsələn, sutəmizləmə qurğularında azotun çirkab sulardan ayrılmasına kömək üçün və ya neft və qaz mədənlərində antifriz və korroziya inhibitoru kimi tətbiq olunur. Hazırda isə, metanoldan enerji mənbəyi kimi istifadə edilməsinə başlanılıb. Dünyanın “Casio”, “Panasonic”, “Toshiba” və “Sony” kimi aparıcı şirkətləri artıq metanolla işləyən mobil telefon, noutbuklar üçün yanacaq elementlərinin və akkumulyatorların istehsalına başlayıb. Son illər inkişaf etmiş ölkələrdə metanol avtomobillər üçün yanacaq kimi geniş istifadə olunur. çində və ABŞ-da artıq yeni yanacaq növləri peyda olub ki, bunların əsas hissəsini metanol təşkil edir. Bu cür yanacağın ətraf mühit üçün ziyanı daha azdır və adi benzin və dizellə müqayisədə ekoloji cəhətdən daha faydalıdır. Dünyanın bir çox tanınmış alimləri metanola gələcəyin energetikasının vacib hissəsi və benzinin və dizelin potensial əvəzedicisi kimi baxırlar.

Paylaş:

Baxılıb: 886 dəfə