Əli Həsənov: Dağlıq Qarabağ məsələsində hazırkı "status-kvo"nun saxlanması müharibəyə səbəb ola bilər

Bakı:

20 °C

77 %

7 m/s

AZ RU EN

Ana səhifə / Siyasət / Əli Həsənov: Dağlıq Qarabağ məsələsində hazırkı "status-kvo"nun saxlanması müharibəyə səbəb ola bilər

Əli Həsənov: Dağlıq Qarabağ məsələsində hazırkı "status-kvo"nun saxlanması müharibəyə səbəb ola bilər

13.10.2011 [23:18]

“Dağlıq Qarabağ məsələsində hazırkı “status-kvo”nun saxlanması regionda müharibənin başlanmasına səbəb ola bilər. Beynəlxalq aləm də çalışır ki, Azərbaycan Dağlıq Qarabağ problemini həll etmək üçün müharibəyə əl atmasın. Amma Azərbaycan Prezidenti dəfələrlə bəyan edib ki, Azərbaycanın səbrinin də bir həddi var”. APA-nın məlumatına görə, bunu Prezident Administrasiyası İctimai-siyasi məsələlər şöbəsinin müdiri Əli Həsənov deyib.
O, bildirib ki, Azərbaycan “status-kvo”nun sonsuzluğa qədər davam etməsini gözləyə bilməz və ərazi bütövlüyünü təmin etmək üçün ixtiyarında olan hüquq və vasitələrdən istifadə edəcək: “Ona görə də son zamanlar beynəlxalq aləm, ATƏT-in sülhyaratma missiyasında iştirak edən Minsk qrupunun həmsədrləri təkidlə “status-kvo”nun dəyişdirilməsini tələb edir, “status-kvo”nun saxlanılmasını qəbul olunmaz sayır, Azərbaycanı da bu “status-kvo” dəyişənə qədər başqa vasitələrdən çəkindirməyə çalışırlar. Azərbaycan militarist dövlət deyil və heç kimin torpağında gözü yoxdur. Bizim əsas məqsədimiz dövlət suverenliyini qorumaq, təmin etmək, ərazi bütövlüyünü bərpa etmək, vətəndaşlarının pozulmuş hüquqlarını təmin etmək və regionda sülhə nail olmaqdır. Ona görə də Azərbaycan maksimum çalışır ki, danışıqlar prosesindən istifadə etsin, sülhyaratma proseslərinə əlavə vasitələr, o cümlədən hərbi yola əl atmadan nail olsun. Amma olmayacaqsa, Azərbaycan torpaqlarını başqa vasitələrlə işğaldan azad etmək hüququnu özündə saxlayır”.
Ə.Həsənov qeyd edib ki, Azərbaycan bu hüquqlarını heç kimə güzəştə getmək fikrində deyil. Şöbə müdiri bildirib ki, fundamental hüququn iki əsas prinsiplərindən biri II Dünya müharibəsindən sonra BMT Nizamnaməsində əksini tapıb: “Bu, dövlətlərin ərazi bütövlüyü və ərazi bütövlüyünün toxunulmazlığı prinsipidir. Dövlətin ərazi bütövlüyü yalnız həmin dövlətin razılığı ilə dəyişdirilə, başqa dövlətin ərazisi ilə bağlanıla və ya orada yaşayan hansısa topluma müstəqillik verilə bilər. Bu prinsip birmənalı şəkildə beynəlxalq hüququn əsas normalarından biridir. Sonrakı dövrdə, xüsusən ATƏT yaranandan sonra beynəlxalq hüquqa ikinci prinsip əlavə olunub. Bu da xalqların, millətlərin öz müqəddəratlarını təyin etməsi hüququdur. Lakin millətlərin öz müqəddəratını təyin etməsi hüququnun dövlətlərin ərazi bütövlüyünün pozulmasına gətirəcəyi burada qeyd olunmayıb”.
Ə.Həsənov qeyd edib ki, dövlətlərin ərazi bütövlüyü çərçivəsində ayrı-ayrı xalqların hüquqlarının təmin olunması da mümkündür: “Bunun nümunələri var. Xalqlar və millətlər hüquqlarını müəyyən etmək çərçivəsində milli muxtariyyət alırlar. Bu muxtariyyətdə özlərinin yaşam hüquqlarını, o cümlədən yaşayış tərzlərini formalaşdırırlar. Dövlətin geosiyasi aktor kimi, beynəlxalq hüququn subyekti kimi dünya aləmində çıxış etməsi və bugünkü model şəklində təmsil olunması hələ ki, alternativi olmayan nümunədir. Biz də bu nümunəyə əsaslanaraq, Azərbaycanın ərazi bütövlüyünün toxunulmazlığı prinsipini birmənalı şəkildə ortaya qoyur və dəstəkləyirik. Ermənistan-Azərbaycan, Dağlıq Qarabağ münaqişəsi də məhz bu hüquqa söykənərək həll olunacaq”.

Paylaş:

Baxılıb: 951 dəfə