Qriqoryanın KTMT “şousu”

Bakı:

29 °C

50 %

3 m/s

Əlaqə

AZ RU EN

Ana səhifə / Siyasət / Qriqoryanın KTMT “şousu”

Qriqoryanın KTMT “şousu”

10.06.2023 [10:24]

O, növbəti dəfə təşkilat üzvlərini aldatmağa çalışıb

Nardar BAYRAMLI

Ermənistanın Təhlükəsizlik Şurasının katibi Armen Qriqoryan Minsk şəhərində Kollektiv Təhlükəsizlik Müqaviləsi Təşkilatına (KTMT) üzv ölkələrin Təhlükəsizlik Şurası katiblərinin iclasında çıxışı zamanı Azərbaycana qarşı əsassız ittihamlar səsələndirib. A.Qriqoryan iddia edib ki, guya Azərbaycan güc tətbiq etmək və ya güc tətbiq etmək hədəsi siyasətini davam etdirir, əvvəllər əldə edilmiş razılaşmaları pozmağa çalışır. O, əsassız olaraq Azərbaycanın təkcə şərti dövlət sərhədində deyil, Qarabağda və Laçın dəhlizində də vəziyyəti gərginləşdirməkdə davam etdirdiyini deyib. Ermənistanın Təhlükəsizlik Şurasının katibi öz yalanları ilə KTMT-dakı həmkarlarını inandırmağa və onları vəziyyətə “aydın və məqsədyönlü” qiymət verməyə, Qarabağda yaşayan “120 min (?!) erməninin etnik təmizləməyə məruz qalmaması üçün təsirli addımlar atmağa” çağırıb. O çıxışında yenə də Qarabağdakı ermənilərin hüquq və təhlükəsizliyinin təmin edilməsi üzrə hansısa beynəlxalq mexanizmin yaradılmasından danışıb.

Qriqoryanın məntiqsiz çıxışı

Ermənistan Təhlükəsizlik Şurasının katibinin Azərbaycana qarşı söylədikləri qəbulolunmazdır. Onun Laçın yolu ilə bağlı dedikləri, ilk növbədə, Azərbaycanın ərazi bütövlüyünə ziddir. Azərbaycan suveren ölkədir və sərhədlərinə də özü nəzarət edir. Üçüncü ölkənin Azərbaycanın daxili işlərinə qarışması beynəlxalq hüquqla yolverilməzdir. Qriqoryan Azərbaycan-Ermənistan sərhədinin Laçın rayonu ərazisindən keçən hissəsində sərhəd-keçid məntəqəsinin quraşdırılmasını qəbul etmək istəmir və bəzi iddialar irəli sürür. Onun Ermənistanın Qarabağda beynəlxalq mexanizmlərin tətbiqi haqqında dedikləri də heç bir məntiqə sığmır.

XİN: Ermənistan TŞ katibinin iddiaları manipulyasiyadır

Azərbaycanın Xarici İşlər Nazirliyi A.Qriqoryanın iddialarına cavab verib. Nazirliyin mətbuat xidmətinin yaydığı məlumatda bildirilir ki, Ermənistanın Təhlükəsizlik Şurasının katibinin Minskdə Kollektiv Təhlükəsizlik Müqaviləsi Təşkilatının iclasında çıxışı zamanı guya Azərbaycanın Ermənistanla sərhəddə və Laçın yolunda vəziyyəti gərginləşdirdiyi, güc tətbiqi siyasəti yürütdüyü, Qarabağ bölgəsində yaşayan erməni sakinlərə qarşı etnik təmizləmə həyata keçirmək niyyətində olduğu barədə səsləndirdiyi iddiaların heç bir əsası yoxdur və bu, Ermənistan tərəfinin növbəti manipulyasiyasıdır. Qeyd edilib ki, Ermənistan tərəfinin öz üzərinə götürdüyü öhdəlikləri yerinə yetirmək, eləcə də Azərbaycanın ərazi bütövlüyü və suverenliyinə hörmət etmək əvəzinə erməni sakinlərin reinteqrasiyası kimi daxili məsələlərə müdaxilə cəhdlərinə hələ də son qoymaması bu ölkənin bölgədə sülh və sabitlikdə maraqlı olmadığını göstərir. Misal olaraq, Ermənistan Təhlükəsizlik Şurasının katibinə xatırladırıq ki, Ermənistan üçtərəfli Bəyanat çərçivəsində öhdəliklərinə zidd olaraq erməni silahlı qüvvələrini Azərbaycan ərazisindən tam olaraq hələ də çıxarmayıb və bu qüvvələrin ölkəmizin ərazisində mövcudluğu beynəlxalq hüququn bütün norma və prinsiplərinin pozuntusu olmaqla yanaşı, ciddi təhdid mənbəyidir.

Rəsmi İrəvanın puç olan arzuları

“Azərbaycanın Laçın sərhəd-buraxılış məntəqəsindən gün ərzində onlarla erməni sakinlərin Azərbaycan qanunvericiliyinə və müvafiq prosedurlara əməl etməklə hər iki istiqamətdə sərbəst şəkildə keçməsi bir daha göstərir ki, Ermənistanın reinteqrasiya prosesinə maneçilik cəhdləri uğursuzluğa düçar olub. Ermənistanı bölgədə sülh və təhlükəsizliyin təmin olunmasına xələl gətirən təhlükəli ritorikadan çəkinməyə çağırır, əsassız yerə Azərbaycanı ittiham etmək, beynəlxalq ictimaiyyəti yayındırmaq cəhdlərini davam etdirmək əvəzinə, üzərinə götürdüyü öhdəlikləri yerinə yetirməyi tələb edirik”, - deyə Xarici İşlər Nazirliyinin məlumatında vurğulanıb.

Göründüyü kimi, Ermənistan yenə də KTMT-dən Azərbaycana qarşı istifadə etməyə çalışır. Ötən ilin sentyabrında şərti dövlət sərhədində baş verən hadisələr zamanı da erməni tərəfi KTMT-yə müraciət edərək guya Azərbaycanın hərbi “təcavüzünə” qarşı yardım istədi və müvafiq sənəd qəbul edilməsinə cəhd göstərdi. Lakin KTMT ölkələri onların yalançı “göz yaşlarına” haqlı olaraq inanmadı.Nəzərə almaq lazımdır ki, Ermənistan istisna olmaqla bu təşkilata üzv dövlətlərin ölkəmizlə çox yüksək münasibətləri var. Ona görə də, rəsmi İrəvanın məqsədləri heç vaxt gerçəkləşməyəcək. Bu baxımdan, Qriqoryanın KTMT-nın toplantısına göstərdiyi “şou” fiaskoya məhkumdur.

Paylaş:

Baxılıb: 624 dəfə