"Ümid qapısı, mərhəmət ünvanı" kitabının təqdimatı olub

Bakı:

28 °C

56 %

17 m/s

Əlaqə

AZ RU EN

Ana səhifə / Siyasət / "Ümid qapısı, mərhəmət ünvanı" kitabının təqdimatı olub

"Ümid qapısı, mərhəmət ünvanı" kitabının təqdimatı olub

30.06.2011 [10:42]

Dünən Azərbaycan Milli Elmlər Akademiyasının (AMEA) Mərkəzi Elmi Kitabxanasında Ağabəy Novruzbəyli adına 46 nömrəli orta məktəbin direktoru, tarix üzrə fəlsəfə doktoru Sevinc Budaqovanın “ümid qapısı, mərhəmət ünvanı” kitabının təqdimat mərasimi keçirilib.
AzərTAc xəbər verir ki, “Elm və təhsil” nəşriyyatında işıq üzü görən 260 səhifəlik bu kitab AMEA-nın A.A.Bakıxanov adına Tarix İnstitutu Elmi Şurasının protokoluna əsasən çap olunub.
Tədbirdə çıxış edən AMEA-nın Mərkəzi Elmi Kitabxanasının direktoru, filologiya elmləri doktoru Aybəniz Əliyeva-Kəngərli deyib ki, bu elmi-publisistik əsər Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva fenomeninin öyrənilməsi baxımından olduqca əhəmiyyətlidir.
Mehriban xanım Əliyeva müasir Azərbaycan qadını kimi iki böyük sivilizasiyanın daşıyıcısıdır. O, kökləri Şərq mədəniyyətinə bağlı olan bir ailədə yetişməklə, intellektual cəhətdən Avrora mədəniyyəti ilə tərbiyələnib. Məhz bunun nəticəsidir ki, Mehriban xanım Əliyevanın bütün fəaliyyəti müasirliklə ənənənin vəhdətini əks etdirir. Maddi mənəvi, tarixi, milli irsimizi yaşatmaq, dirçəltmək və bununla bərabər dünyada layiqincə təbliğ etmək kimi missiyanı öz üzərinə götürmüş Mehriban xanım Əliyeva əsl ziyalıya, ictimai xadimə, qayğıkeş insana məxsus bütün nümunəvi xüsusiyyətləri özündə birləşdirir.
Natiq vurğulayıb ki, bəzən hamıda xoş təəssürat oyatmaq, hamının sevimlisi olmaq mümkünsüz görünür. Ancaq Mehriban xanım Əliyeva öz əməlləri ilə bu sevgini qazana bilib. S.Budaqovanın kitabı da məhz bu sevginin, hörmətin təzahüründən yaranıb.
Tədbirdə Tarix İnstitutunun direktoru, AMEA-nın müxbir üzvü, Milli Məclisin deputatı Yaqub Mahmudov, AMEA-nın Nizami adına Ədəbiyyat İnstitutunun direktoru, akademik Bəkir Nəbiyev, Milli Məclisin deputatları Gülər Əhmədova, Qənirə Paşayeva və başqaları kitabın böyük tarixi əhəmiyyət daşıdığını vurğulayıblar.
Bildirilib ki, bu kitab yazılarkən qarşıya qoyulan əsas məqsəd bu gün Azərbaycan cəmiyyətində formalaşan Mehriban xanım Əliyeva fenomeninin öyrənilməsindən, Heydər Əliyev Fondunun fəaliyyətinin tarixilik və müasirlik kontekstində təhlilindən, bu sahədə irs və varislik ənənələrinin araşdırılmasından ibarətdir.
Sonda mərasimin təşkilatçılarına və iştirakçılarına minnətdarlığını bildirən Sevinc Budaqova deyib ki, bu istiqamətdə araşdırmalarını bundan sonra da davam etdirəcək.

Paylaş:

Baxılıb: 1123 dəfə