Brüsseldə Azərbaycan Respublikası adından Krans Montana Forumunun rəsmi naharı olub

Bakı:

20 °C

88 %

3 m/s

Əlaqə

AZ RU EN

Ana səhifə / Siyasət / Brüsseldə Azərbaycan Respublikası adından Krans Montana Forumunun rəsmi naharı olub

Brüsseldə Azərbaycan Respublikası adından Krans Montana Forumunun rəsmi naharı olub

25.06.2011 [09:10]

Mehriban xanım Əliyeva: Azərbaycanın Avropa ilə çox güclü münasibətləri vardır. Avropa İttifaqına üzv dövlətlər ilə Azərbaycan arasında ikitərəfli münasibətlər qarşılıqlı fayda və hörmətə əsaslanır
AzərTAc-ın xüsusi müxbiri xəbər verir ki, iyunun 23-də axşam Brüsseldə Azərbaycan Respublikası adından Krans Montana Forumunun rəsmi naharı olub.
Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva mərasimdə iştirak edib.
Mehriban xanım Əliyevanı Krans Montana Forumunun prezidenti Jan Pol Karteron qarşılayıb.
Rəsmi naharı açan Jan Pol Karteron Azərbaycanın birinci xanımını mərasimdə görməkdən məmnun olduğunu deyib. “Artıq iki gündür ki, Brüsseldə Azərbaycanı kəşf edirik”, - deyən Krans Montana Forumunun prezidenti ölkəmiz ilə əməkdaşlığın bundan sonra da uğurla davam edəcəyinə əminliyini bildirib.
Azərbaycanın birinci xanımı Mehriban Əliyeva mərasimdə çıxış edərək deyib: “Xanımlar və cənablar! Hörmətli qonaqlar! Əziz dostlar!
Əvvəlcə mən bu axşam bizimlə olduğunuza görə sizə təşəkkürümü bildirmək istərdim.
Bu iki gün ərzində Azərbaycan Krans Montana Forumunda təmsil olundu. Mən Forumun prezidenti cənab Karterona bu tədbiri təşkil etdiyinə görə xüsusi təşəkkürümü bildirmək istərdim.
Bu il Azərbaycan müstəqilliyinin bərpa olunmasının 20-ci ildönümünü qeyd edir. Qısa zaman kəsiyində Azərbaycan müasir və sürətlə inkişaf edən ölkəyə çevrilmişdir. Azərbaycan Cənubi Qafqaz regionunun aparıcı ölkəsidir və sürətli inkişaf bütün sahələrdə - siyasi, iqtisadi, sosial və mədəni sahələrdə hiss olunur. Bu gün səhər Prezident İlham Əliyev öz çıxışında son illərdə Azərbaycanın əldə etdiyi nailiyyətlər haqqında danışdı. ölkəmizdə siyasi və iqtisadi islahatlar demokratiya və dünyəvilik ənənələrinə əsaslanır. Bu, əslində 1918-ci ildə Azərbaycan Demokratik Respublikasının elan edildiyi vaxtdan etibarən olan ənənədir. Həmin dövrdə Azərbaycan dünyanın bu hissəsində bir çox sahələrdə birinci olmuşdur. İlk dünyəvi qadın məktəbi Azərbaycanda yaradılmış, qadınlara səsvermə hüququ verilmiş, ilk opera və balet səhnəyə qoyulmuşdur. Əfsuslar olsun ki, Azərbaycan Demokratik Respublikası cəmi 23 ay yaşadı və uzun illər ərzində Azərbaycan xalqı müstəqilliyini arzulayırdı. Müxtəlif dövrlərdə imperiyaların bir hissəsi olmağımıza baxmayaraq, biz dilimizi, mədəniyyətimizi, adət-ənənəmizi, özünəməxsusluğumuzu qoruyub saxladıq və 1991-ci ildə müstəqilliyimizi bərpa etdik.
Müstəqil ölkə kimi Azərbaycan bazar iqtisadiyyatı, modernləşmə siyasətini həyata keçirir, qanunun aliliyini təmin edir. Bir neçə ildir ki, Azərbaycan dünyanın ən sürətli iqtisadi inkişaf tempinə malik ölkədir. Bu, bizə ölkəmizi inkişaf etdirməyə, səhiyyə, təhsil və mədəniyyət sahələrinə xüsusi diqqət yetirməklə çox vacib sosial proqramları həyata keçirməyə imkan yaradır. Bütün bunlar həm də Heydər Əliyev Fondunun fəaliyyətinin prioritet sahələridir.
Azərbaycanın Avropa ilə çox güclü münasibətləri vardır. Avropa İttifaqına üzv dövlətlər ilə Azərbaycan arasında ikitərəfli münasibətlər qarşılıqlı fayda və hörmətə əsaslanır. Artıq on ildir ki, Azərbaycan Avropa Şurasının üzvüdür. Bizim münasibətlərimiz uğurla inkişaf edir və yeni mərhələyə qədəm qoyur.
ümidvaram ki, “Şərq tərəfdaşlığı” Proqramı Azərbaycan ilə Avropa İttifaqı arasında daha sıx əməkdaşlığa gətirib çıxaracaqdır. ümid edirəm ki, ölkəmizin dostları kimi sizin hamınız bu əməkdaşlığı dəstəkləyəcəksiniz. Sonda fürsətdən istifadə edərək sizin hamınızı ölkəmizə dəvət edirəm. Bir daha bu axşam bizimlə olduğunuza görə təşəkkürümü bildirirəm, sizə və ailələrinizə uğurlar arzulayıram”.
Rəsmi nahardan sonra mərasimdə iştirak edən qonaqlar Azərbaycanın birinci xanımı ilə söhbətlərində Krans Montana Forumunda ölkəmizə kifayət qədər marağın olduğunu söyləyiblər. Onlar Azərbaycanın bu Forumda iştirakından məmnunluqlarını bildiriblər.
Sonda xatirə şəkli çəkdirilib.

Paylaş:

Baxılıb: 1115 dəfə