Növbəti yalan...

Bakı:

29 °C

55 %

4 m/s

Əlaqə

AZ RU EN

Ana səhifə / Siyasət / Növbəti yalan...

Növbəti yalan...

28.02.2023 [10:45]

İrəvan heç bir əhəmiyyətə, təsirə malik olmayan “palata”lara möhtac qalıb

Ermənistan Laçın yolu üzərində azərbaycanlı ekofəalların keçirdiyi etiraz aksiyası ilə bağlı yalanlarını müxtəlif platformalar üzrə “inkişaf etdirməyə” çalışır. Bütün beynəlxalq strukturlarda fiaskoya uğrayan, bütün platformalarda məğlub olan, yalan təbliğatına siyasi don geyindirə bilməyən Ermənistan artıq yeni “fəndlərə” əl atır. Eyni zamanda, ermənilər bütövlükdə, mənəvi dəyərlərə qiymət vermədiyini bir daha ortaya qoyur. Belə ki, Ermənistan KİV-ləri fevralın 26-da Avrasiya İqtisadi Birliyinin (AİB) İctimai Palatası adlanan təsisatının “bəyanatı”nı yayıb. İlk olaraq vurğulanmalıdır ki, bəyanatın məhz Xocalı soyqırımı günündə erməni KİV-i tərəfindən yayılması bir daha onların mənəvi cəhətdən cılızlığının əyani sübutudur. “Bəyanat”a gəldikdə isə özündən əvvəlkilərdən fərqlənməyən və əsassız fikirlərin yer aldığı bu kağızda da ənənəvi “blokada” yalanına müraicət edilib. Hətta bu “bəyanat”da adıçəkilən “palata” bir az da uzağa gedərək Qarabağda qazın verilişinin kəsilməsi kimi yalanlar səsləndirir, bunu Cenevrə Konvensiyası ilə “əsaslandırmağa” çalışıblar.

Maraqlıdır ki, bu “bəyanat”ı yayanların siyahısında Azərbaycana dost olan ölkələrin də adları yer alıb. Amma sonradan bəlli olub ki, bu, bir oyundur - həmin “palata” ilə bağlı araşdırmalar onu göstərir ki, bu, ictimai əsaslarla çıxış edən bir neçə “ekspert yığnağı”ndan başqa bir şey deyil.

Məsələ ilə bağlı fikirlərini bölüşən politoloq İlqar Vəlizadə qəzetimizə açıqlamasında bildirib ki, bu “təsisat” özlüyündə heç bir əhəmiyyətə, təsirə malik deyil. Onlar ictimai əsaslarla fəaliyyət göstərən müxtəlif “ekspertlər”dir: “Bu ekspertlər ara-sıra müxtəlif mövzularla bağlı müzakirələr təşkil edirlər. Bu müzakirələr isə AİB-in gündəliyinə belə daxil edilmir, qurumun iqtisadi gündəliyinə təsir belə göstərmir. Bu, sadəcə, ictimai platformadır və burada təmsil olunan insanlar ən yaxşı halda AİB-ə və onun ali orqanı olan üzv ölkələrin dövlət başçıları Şurasına hansısa tövsiyyələr verə bilərlər. Bu təşkilat AİB-in strukturunda yer almayıb. Ona görə də bu insanların çıxışlarına ciddi yanaşmaq düzgün olmazdı”.

Politoloqun fikrincə, Ermənistan KİV-i hər zaman olduğu kimi bu mövzunu şişirdərək gündəmə gətirməyə çalışıb. Bunun altında isə təxribatçı istəklərin yatdığına şübhə yoxdur. “Bu işin arxasında olan insanlar çalışırlar Azərbaycanla AİB-də təmsil olunan ölkələr arasında ziddiyyətlər yaratsınlar. Xüsusilə də biz həmin təsisatın işində bizə dost, qardaş olan ölkələrin nümayəndələrinin də adlarının olduğunu görürük. Və Ermənistan KİV-i bu bəyanatı məhz həmin dövlətin adından səsləndirərək suyu bulandırmağa çalışır. Amma bu, belə deyil. Ermənistan nə KTMT-nin, nə də AİB-in əli ilə Azərbaycana qarşı hər hansı bir addım ata bilməyib. İrəvan bu təşkilatların məhz onun məqsədlərinə uyğun mövqe nümayiş etdirməsini təmin edə bilməyib. Ona görə də indiki halda belə oyuna əl atırlar. Biz bilirik ki, müxtəlif ölkələrdə, eyni zamanda, bizə dost, yaxın olan ölkələrdə də, onların cəmiyyətində də ermənipərəst insanlar yox deyil. Bəzi tədbirlərdə və ya başqa məqamlarda bu insanları ön plana çəkərək ermənilər bunu həmin ölkələrin ictimaiyyətinin reaksiyası kimi qələmə verməyə çalışırlar. Ermənistanın politexnoloqları istəyirlər ki, bizim cəmiyyətimizdə həmin dost ölkələr haqqında ziddiyyətli fikirlər formalaşdırsınlar. Onlar bu yolla süni gərginlik yaratmağa çalışırlar. Beləliklə də, öz məqsədlərinə çatmaq istəyirlər. Məqsədləri isə bəllidir - yalan təbliğata siyasi don geyindirmək. Amma bu niyyətlərinə çata bilmirlər”, - deyə politoloq əlavə edib.

PƏRVİZ

Paylaş:

Baxılıb: 538 dəfə