Həştərxanda Heydər Əliyev adına Parkın açılışı olub, Rusiya və Azərbaycan Dostluğu körpüsünün təməli qoyulub

Bakı:

19 °C

94 %

2 m/s

AZ RU EN

Ana səhifə / Siyasət / Həştərxanda Heydər Əliyev adına Parkın açılışı olub, Rusiya və Azərbaycan Dostluğu körpüsünün təməli qoyulub

Həştərxanda Heydər Əliyev adına Parkın açılışı olub, Rusiya və Azərbaycan Dostluğu körpüsünün təməli qoyulub

20.05.2011 [08:38]

Dünən “Rusiya və Azərbaycan: regionlararası əməkdaşlığın yeni üfüqlərinə doğru” mövzusunda keçirilən forum çərçivəsində Həştərxanın mərkəzində, Volqa körfəzi yaxınlığındakı Sahil küçəsində Heydər Əliyev adına Parkın təntənəli açılışı olub.
AzərTAc-ın müxbiri xəbər verir ki, tədbirdə forumda təmsil olunan Azərbaycan və Rusiya nümayəndə heyətləri, Həştərxan vilayətindəki Azərbaycan diasporunun üzvləri, ictimaiyyətin və KİV-lərin nümayəndələri iştirak ediblər.
Tədbir iştirakçıları ümummilli lider Heydər Əliyevin xatirəsini yad edib, Ulu öndərin Həştərxanda Azərbaycan Prezidenti İlham Əliyevin iştirakı ilə ötən il açılmış abidəsi önünə əklillər və güllər qoyublar.
Həştərxan vilayətinin qubernatoru Aleksandr Jilkin təntənəli tədbiri açaraq bildirib ki, ümummilli lider Heydər Əliyevin adını daşıyan parkın açılışı Rusiya və Azərbaycan xalqları arasında dostluğun rəmzidir. Qubernator layihənin həyata keçirilməsinə göstərdiyi dəstəyə görə Prezident İlham Əliyevə təşəkkürünü bildirib.
Rusiya Federasiyası Prezidenti Administrasiyasının xarici ölkələrlə mədəni və regionlararası əlaqələr üzrə idarəsinin rəisi, Rusiya nümayəndə heyətinin başçısı Sergey Vinokurov bildirib ki, parkın açılışı Rusiyanın ictimai-siyasi həyatında əlamətdar hadisədir. O deyib: “Parkın açılışı ölkələrimiz, xalqlarımız arasında münasibətlərin, regionlararası əməkdaşlığın tarixində daha bir parlaq səhifədir. Bu, Rusiya-Azərbaycan dostluğunun xoş nişanəsidir”.
Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov mərasimdə çıxış edərək xatırladıb ki, ötən il məhz burada Azərbaycan Prezidenti İlham Əliyevin iştirakı ilə ümummilli lider Heydər Əliyevin abidəsinin açılışı olub. Dahi liderin həyat və fəaliyyətinin bir sıra məqamlarından danışan Əli Həsənov vurğulayıb ki, görkəmli dövlət xadimi siyasi müdrikliyə, geniş dünyagörüşünə malik idi. Ulu öndər Azərbaycana rəhbərliyə qayıdandan sonra Rusiya ilə dostluq münasibətlərinin qurulmasında mühüm rol oynayıb, ölkələrimiz arasında strateji əməkdaşlığın təməlini qoyub. O deyib: “Ulu öndərin səyləri sayəsində Azərbaycan-Rusiya münasibətlərini kökündən yaxşılaşdırmaq və fəallaşdırmaq, ona yeni impuls vermək mümkün olmuşdur. çox sevindirici haldır ki, Həştərxanda 11 nömrəli məktəb Heydər Əliyevin adını daşıyacaq”.
Əli Həsənov əlavə edib ki, Rusiya Prezidenti Dmitri Medvedevin və Azərbaycan Prezidenti İlham Əliyevin həyata keçirdikləri siyasət nəticəsində Rusiya-Azərbaycan münasibətləri strateji tərəfdaşlıq səviyyəsinə yüksəlib.
Sonra Rusiya və Azərbaycan Dostluğu körpüsünün təməli qoyulub. Körpü Heydər Əliyev adına park ilə Birinci Pyotrun abidəsi ucaldılmış parkı birləşdirəcək. Azərbaycan və Rusiya nümayəndə heyətlərinin rəhbərləri Əli Həsənovun və Sergey Vinokurovun birgə bəyanatında deyilir ki, bu körpü Rusiya və Azərbaycan xalqlarının möhkəm dostluq münasibətlərinin əyani göstərici olacaq. Körpünün tikintisini sentyabrda başa çatdırmaq nəzərdə tutulub.

Paylaş:

Baxılıb: 1157 dəfə