AzərTAc-ın voleybol komandası ölkə KİV-ləri arasında keçirilən turnirin qalibi olub

Bakı:

24 °C

50 %

5 m/s

Əlaqə

AZ RU EN

Ana səhifə / Siyasət / AzərTAc-ın voleybol komandası ölkə KİV-ləri arasında keçirilən turnirin qalibi olub

AzərTAc-ın voleybol komandası ölkə KİV-ləri arasında keçirilən turnirin qalibi olub

06.05.2011 [09:26]

Əli Əhmədov: Keçirilən bütün tədbirlərlə, o cümlədən də, şahidi olduğumuz voleybol turnirində iştirak edən gənc və həvəskar voleybolçular bu yarışla Ulu öndər Heydər Əliyevin əziz xatirəsinə olan dərin hörmətlərini ifadə ediblər
Dünən Azərbaycan Voleybol Federasiyasının idman zalında Ulu öndər Heydər Əliyevin anadan olmasının 88-ci ildönümü münasibətilə kütləvi informasiya vasitələrinin komandaları arasında keçirilən voleybol turnirinə yekun vurulub.
AzərTAc xəbər verir ki, “Yeni Azərbaycan”, “İki sahil” və “Səs” qəzetlərinin birgə təşkilatçılığı ilə keçirilən turnirin final mərhələsində “AzərTAc” və “SİA” komandaları qarşılaşıblar.
AzərTAc-ın voleybol komandasının üzvlərinin yüksək peşəkarlığı sayəsində komanda həlledici qarşılaşmada “SİA” kollektivini məğlub edərək turnirin qalibi olub.
Mükafatlandırma mərasimində Yeni Azərbaycan Partiyası (YAP) Sədrinin müavini-İcra katibi, Milli Məclisin deputatı Əli Əhmədov, İcra katibinin müavinləri, Milli Məclisin deputatları Siyavuş Novruzov və Mübariz Qurbanlı iştirak ediblər.
Əli Əhmədov jurnalistlərin informasiya sahəsində olduğu kimi, idmanda da fəal iştirakının sevindirici hal olduğunu vurğulayıb. Bu yarışın Ulu öndər Heydər Əliyevin anadan olmasının 88-ci ildönümünə həsr olunmasının ümummilli liderin xatirəsinə yüksək ehtiram əlaməti olduğunu vurğulayan YAP Sədrinin müavini turnirin təşkilatçılarına və iştirakçılara minnətdarlığını bildirib. O, Azərbaycanda idmanın digər növləri kimi, voleybolun da inkişaf etdiyini, bu sahədə böyük uğurlar əldə edildiyini deyib.
YAP-ın İcra katibi partiyanın Azərbaycan xalqının ümummilli lideri Heydər Əliyevin anadan olmasının 88-ci ildönümü ilə əlaqədar bir sıra tədbirlər keçirdiyini və bunların içərisində idman tədbirlərinin də yer aldığını qeyd edib. Əli Əhmədov bildirib ki, keçirilən bütün tədbirlərlə, o cümlədən də, şahidi olduğumuz voleybol turnirində iştirak edən gənc və həvəskar voleybolçular bu yarışla Ulu öndər Heydər Əliyevin əziz xatirəsinə olan dərin hörmətlərini ifadə ediblər.
Final oyununun kifayət qədər maraqlı keçdiyini vurğulayan Əli Əhmədov AzərTAc-ın informasiya sahəsində olduğu kimi, idmanda da öz yüksək peşəkarlığını nümayiş etdirdiyini xüsusi vurğulayıb. Bunu komandanın bütün görüşlərdə öz rəqiblərinə bir set belə uduzmaması da təsdiq edir.
Sonda qaliblərə mükafatlar təqdim olunub.
üçüncü yeri tutmuş “Xalq qəzeti” komandasına YAP İcra katibinin müavini, Milli Məclisin deputatı Mübariz Qurbanlı diplom və 800 manat pul mükafatını, 2-ci yerdə qərarlaşmış “SİA” komandasına YAP İcra katibinin müavini, Milli Məclisin deputatı Siyavuş Novruzov diplom və 1000 manat pul mükafatını təqdim ediblər.
Qalib komanda - “AzərTAc”a isə YAP Sədrinin müavini-İcra katibi Əli Əhmədov kuboku, diplomu və 1200 manat pul mükafatını təqdim edib.
Sonda qaliblərlə xatirə şəkilləri çəkdirilib.

Paylaş:

Baxılıb: 1109 dəfə