Ümummilli lider Heydər Əliyevin anadan olmasının 88-ci ildönümünə həsr edilmiş məktəblilərin inşa yazı müsabiqəsinə yekun vurulub

Bakı:

11 °C

93 %

3 m/s

AZ RU EN

Ana səhifə / Siyasət / Ümummilli lider Heydər Əliyevin anadan olmasının 88-ci ildönümünə həsr edilmiş məktəblilərin inşa yazı müsabiqəsinə yekun vurulub

Ümummilli lider Heydər Əliyevin anadan olmasının 88-ci ildönümünə həsr edilmiş məktəblilərin inşa yazı müsabiqəsinə yekun vurulub

07.05.2011 [12:53]

“Gülüstan” sarayında bu münasibətlə keçirilən tədbirdə qaliblərə fəxri fərmanlar və qiymətli mükafatlar təqdim edilib
ümummilli lider Heydər Əliyevin anadan olmasının 88-ci ildönümünə həsr edilmiş məktəblilərin inşa yazı müsabiqəsinə yekun vurulub. Dünən “Gülüstan” Sarayı”nda müsabiqə qaliblərini mükafatlandırma mərasimi keçirilib. Müsabiqə Heydər Əliyev Fondu, Yeni Azərbaycan Partiyası (YAP), Təhsil, Rabitə və İnformasiya Texnologiyaları nazirlikləri, həmçinin, Azərbaycan Həmkarlar İttifaqları Konfederasiyasının birgə təşkilatçılığı ilə üç mərhələdə (məktəb, rayon (şəhər) və respublika (yekun) keçirilib.
Məlumat üçün bildirək ki, ümumtəhsil məktəblərinin VII-XI sinifləri arasında təşkil olunan müsabiqədə 700 minədək şagird iştirak edib. Müsabiqənin yekun mərhələsinə 97 məktəbli qatılıb. Nəticələrə əsasən, 3 nəfər I yerə, 4 nəfər II yerə, 6 nəfər isə III yerə layiq görülüblər.
Milli Məclisin deputatlarının, tanınmış alimlərin, ali məktəb rektorlarının, təhsil işçilərinin iştirakı ilə keçirilən tədbirdə təhsil naziri Misir Mərdanov ümummilli lider Heydər Əliyevin təhsilin inkişafına daim böyük önəm verdiyini, dahi rəhbərin siyasətinin Prezident İlham Əliyev tərəfindən uğurla davam etdirildiyini bildirib.
“İnşa yazı müsabiqəsinin məktəb, rayon və şəhər mərhələlərinə 700 minədək məktəbli qatılıb” deyən nazir dövlətimizin başçısı İlham Əliyevin təhsillə bağlı imzaladığı sənədlərin əhəmiyyətindən danışıb: “Son illərdə Prezident tərəfindən təhsilin müxtəlif istiqamətləri ilə bağlı 18 dövlət proqramı təsdiqlənib. Bunlar təhsil sahəsindəki problemlərin həllini əks etdirən proqramlardır. Biz təhsilin məzmun və keyfiyyətində çox ciddi dəyişikliklər etməyi düşünürük”.
Tədbirdə çıxış edən Yeni Azərbaycan Partiyası Sədrinin müavini-İcra katibi, Milli Məclisin deputatı Əli Əhmədov Ulu öndər Heydər Əliyevin gənclərə, onların təhsilinə daim böyük diqqət və qayğı göstərdiyini xatırladıb. Əli Əhmədov qeyd edib ki, Ulu öndər Heydər Əliyev irsini öyrənməklə gənclər vətənpərvərlik ruhunda tərbiyə olunurlar: “çünki Heydər Əliyev böyük vətənpərvər idi. Ulu öndər Heydər Əliyev irsini öyrənməklə gənclər vətəndaş kimi formalaşırlar. Heydər Əliyev irsini öyrənən gənclərimiz azərbaycançılıq məfkurəsini mənimsəyirlər”.
ölkəmizdə təhsilə göstərilən dövlət qayğısından bəhs edən YAP Sədrinin müavini Yeni Azərbaycan Partiyası İdarə Heyətinin qərarına uyğun olaraq inşa müsabiqəsinin qaliblərinin hər birinə ali məktəblərdə təhsil aldıqları müddətdə YAP tərəfindən təqaüdlər verildiyini də xatırladıb. Hazırda 19 tələbəyə hər ay YAP-ın təqaüdünün verildiyini deyən Əli Əhmədov gələcəkdə bu təqaüdü alanların sayının xeyli artacağına ümidvar olduğunu vurğulayıb.
Azərbaycan Həmkarlar İttifaqları Konfederasiyasının sədri, Milli Məclisin deputatı Səttar Mehbalıyev ümummilli lider Heydər Əliyev siyasi irsinin əhəmiyyətini vurğulayıb, ölkəmizdə qazanılan nailiyyətlərdən bəhs edib.
Rabitə və informasiya texnologiyaları naziri Əli Abbasov cəmiyyətin inkişafında təhsilin mühüm rolu olduğunu bildirib, müsabiqənin əhəmiyyətini diqqətə çatdırıb, qalibləri təbrik edib.
Sonra müsabiqənin qaliblərinə diplomlar, fəxri fərmanlar və digər qiymətli mükafatlar təqdim olunub.
RUHİYYƏ

Paylaş:

Baxılıb: 978 dəfə