Avropa Parlamenti Avropanın maraqlarına qarşı

Bakı:

18 °C

76 %

6 m/s

Əlaqə

AZ RU EN

Ana səhifə / Siyasət / Avropa Parlamenti Avropanın maraqlarına qarşı

Avropa Parlamenti Avropanın maraqlarına qarşı

20.01.2023 [17:24]

Mübariz ABDULLAYEV

Bir sıra beynəlxalq təşkilatların xaricdəki erməni lobbisinin əlində alətə çevrildikləri hər kəsə bəllidir. Avropa parlamenti də məhz belə qurumlardandır. İndiyədək Avropa Parlamentində keçmiş Dağlıq Qarabağ münaqişəsi, Azərbaycan-Ermənistan münasibətləri ilə bağlı bir neçə dəfə müzakirələr aparılıb. Hər dəfə AP-da müzakirələrə çıxardılan hesabatlar, qəbul olunan qətnamələr bilavasitə ermənilərin maraqlarını əks etdirib. Bu günlərdə Avropa Parlamenti ermənipərəstliyini növbəti dəfə ortaya qoyub. Belə ki, qurumun yanvarın 18-də qəbul etdiyi qətnamədə yenə də anti-Azərbaycan məzmunlu bir sıra bəndlər yer alıb.

AP separatçılığı, qanunsuzluğu və ksenofobiyanı təşviq edir

Avropa Parlamentinin davranışlarına, burada zaman-zaman qəbul olunan qərəzli qətnamələrə istinadən bu qurumun regionda müsbət proseslərin, sülhün deyil, məhz problemlərin tərkib hissəsinə çevrildiyi qənaətini ifadə edə bilərik. Ermənilərin iddiaları separatizmə əsaslanır. Havadarlarının dəstəyinə arxalanan Ermənistan 30 il ərzində işğalçılıq siyasəti aparıb, Azərbaycanın ərazilərinin 20 faizini öz nəzarəti altında saxlayıb, bir milyondan çox insanı doğma ev-eşiyindən didərgin salıb. İşğal altında qalan ərazilərdə ermənilər misli görünməmiş vandalizm əməlləri törədiblər-yaşayış evlərini, mülki infrastruktur obyektlərini, mədəni irsi dağıdıblar, ekologiyamıza ziyan vurublar, qeyri-qanuni iqtisadi fəaliyyətlə məşğul olublar və sərvətlərimizi talayıblar. Ancaq Avropa Parlamenti susub, ermənilərin beynəlxalq hüquqla bir araya sığmayan əməllərini qınayan hansısa bir sənəd qəbul etməyib. Görünən odur ki, AP belə yanaşma ilə separatçılığı, qanunsuzluğu, ksenofobiyanı təşviq edir.

Avropa Parlamentinin indiyədək Azərbaycan əleyhinə qəbul etdiyi qətnamələrin heç biri hüquqi əsasları olan sənədlər kimi qəbul olunmayıb. Yeni qətnamə də bu baxımdan heç nə ilə fərqlənmir və boş bir kağız parçasıdır. Belə qətnamələr, qarayaxma kampaniyaları hec vəchlə Azərbaycanın iradəsinə təsir göstərə, ölkəmizin qanuni hədəflərinə çatmasına mane ola bilməz. Azərbaycan xalqı 2020-ci ildə yüksək vətənpərvərlik, həmrəylik, əzm, qətiyyət nümayiş etdirərək düşməni torpaqlarımızdan qovdu və ölkənin ərazi bütövlüyünü təmin etdi. Postmüharibə dövründə isə işğaldan azad edilmiş ərazilərdə genişmiqyaslı quruculuq-abadlıq işləri həyata keçirilir, Böyük Qayıdış planı reallaşdırılır. Azərbaycanın aydın gündəliyi var və hədəflərinə doğru inamla irəliləyir.

Oturduğu budağı kəsməklə məşğul olan Avropa Parlamenti

Vaxtilə həmin bu Avropa Parlamenti Cənub Qaz Dəhlizi layihəsinə qarşı çıxmışdı. Lakin zaman Cənub Qaz dəhlizinin Avropanın enerji təhlükəsizliyi üçün vacibliyini sübut etdi. Bu mənada deyə bilərik ki, Avropa Parlamenti Azərbaycana qarşı sərgilədiyi davranışları ilə əslində oturduğu budağı kəsməklə məşğuldur.

Daim ədalət mövqeyindən çıxış edən Azərbaycanla beynəlxalq hüquqa arxa çevirən Ermənistanın Avropa İttifaqının (Aİ) həyatında oynadıqları rol bir-birlərindən tamam fərqlənir. Əslində, Ermənistan Aİ məkanına heç nə vermir, yalnız kömək və maddi yardımlar umur, daim öz xislətinə uyğun olaraq nəyi isə qopartmağa çalışır. Azərbaycanın mövqeyi isə tamam fərqli rakrusdan diqqət çəkir. Respublikamız qoca qitənin enerji təhlükəsizliyinin təmin olunmasına sanballı töhfələr verir. İndiki geosiyasi reallıqlar fonunda Aİ-nin enerji daşıyıcılarına, xüsusən də mavi yanacağa tələbatı daha da artıb. Avropa Komissiyası əlavə qaz tədarükü ilə bağlı ölkəmizə müraciət ünvanlayıb. Azərbaycan bu müraciəti həssaslıqla qarşıılayıb və qoca qitənin ehtiyacının qarşılanmasında öz rolunu artırmaq məqsədilə əzmlə çalışıb. 2021-ci ildə respublikamız Avropaya 8 milyard kubmetr qaz nəqli ilə bağlı öhdəliyinə sadiq qaldı. 2023-cü ildə bu həcmin 12 milyard kubmetrədək artırılacağı gözlənilir. Eyni zamanda, Azərbaycan qoca qitəyə qaz tədarükünü 2027-ci ilədək 20 milyard kubmetrədək artırmağı hədəfləyib.

Prezident İlham Əliyev Azərbaycanın Aİ ilə əməkdaşlığa böyük önəm verdiyini və ölkəmizin hədəflərini bu günlərdə Davos İqtisadi Forumu çərçivəsində keçirilən tədbirlərdə bir daha bəyan etdi. Azərbaycan Prezidentinin Davos Forumunda iştirak etdiyi, uğurlu görüşlər keçirdiyi və bunun hətta Ermənistan mediasında belə etiraf etdiyi bir vaxtda Avropa Parlamentinin Azərbaycanı əsassız yerə hədəf alan bəndlərin olduğu bir qətnaməni qəbul etməsi Azərbaycan ilə Aİ arasında əlaqələri korlamağa hesablanıb.

Azərbaycanofob, islamofob Avropa Parlamentinin anti-Azərbaycan mövqeyinə rəğmən, 2022-ci il 18 iyul tarixində Avropa Komissiyasının Prezidenti Ursula fon der Leyenin Bakıya səfəri zamanı Azərbaycan ilə Avropa İttifaqı arasında enerji sahəsində əməkdaşlığa dair anlaşma memorandumunun, eləcə də ötən il dekabrın 17-də Buxarestdə Azərbaycan, Gürcüstan, Rumıniya və Macarıstan arasında “yaşıl enerji” sahəsində strateji tərəfdaşlıq anlaşmasının imzalanması fonunda Azərbaycan və Avropa İttifaqı arasında qarşılıqlı faydalı əməkdaşlıq davam edəcək.

Paylaş:

Baxılıb: 683 dəfə