Rusiyalı alim Moskva Dövlət Universitetinin Bakı filialında məruzə edib

Bakı:

19 °C

94 %

1 m/s

Əlaqə

AZ RU EN

Ana səhifə / Siyasət / Rusiyalı alim Moskva Dövlət Universitetinin Bakı filialında məruzə edib

Rusiyalı alim Moskva Dövlət Universitetinin Bakı filialında məruzə edib

06.04.2011 [09:59]

Rusiya Elmlər Akademiyasının müxbir üzvü, Moskva Dövlət Universitetinin (MDU) fizika fakültəsinin ümumi fizika və kondensasiya halı fizikası kafedrasının müdiri Dmitri Xoxlov dünən M.V.Lomonosov adına MDU-nun Bakı filialında ölkənin aparıcı fizikləri qarşısında “Terahers şüalanma. Fizika və tətbiq imkanları” mövzusunda məruzə edib. Əvvəlcə MDU-nun Bakı filialının rektoru Nərgiz Paşayeva çıxış edərək, filialla şəxsən tanış olmaq üçün Azərbaycana səfər etmək təşəbbüsünə görə, rusiyalı alimə minnətdarlığını bildirib. Rektor deyib ki, MDU-nun ümumi fizika kafedrasının əməkdaşları bu yaxınlarda Bakı filialının tələbələri ilə məşğələlər keçiblər: “Biz Azərbaycan və Rusiya alimlərinin görüşünün məhz M.V.Lomonosov adına MDU-nun Bakı filialında baş tutmasından məmnunuq”.
Fundamental elmlərin humanitar problemlər və məsələlərlə təmasda olduğunu vurğulayan N.Paşayeva deyib ki, elmi tərəqqi heç də həmişə bəşəriyyət üçün yalnız xoşbəxtlik gətirmir. Bu yaxınlarda Yaponiyada baş vermiş faciə buna misaldır. Odur ki, belə görüşlər, elmi əməkdaşlığın, yüksək məqsədlərə xidmət edən insanların yaxınlaşması həmişə faydalıdır.
Nərgiz xanım vurğulayıb ki, tanınmış Rusiya fizikinin Bakıya gəlişi dialoq üçün, təkcə elmi deyil, həm də ictimai-etik yönümlü mühüm problemlərin müzakirəsi üçün yeni perspektivlər və imkanlar açır.
İki ölkənin alimləri arasında əlaqələrin bir müddət əvvəl çox geniş olduğunu xatırladan Dmitri Xoxlov həmin əlaqələrin bərpa olunmasının əhəmiyyətini vurğulayıb.
Bakıda MDU-nun filialının açılmasının çox əhəmiyyətli bir addım olduğunu vurğulayan alimin fikrincə, bu istiqamətdə növbəti addım daha sıx kooperasiyanın yaradılması və gənc kadrların birgə yetişdirilməsi olmalıdır. O, deyib: “Elm beynəlmiləldir. Kooperasiyanın yaradılması çox əhəmiyyətlidir, çünki heç bir elmi iş təkcə bir ölkədə aparılmır”.
Sonra çıxış edən Azərbaycan Milli Elmlər Akademiyasının (AMEA) prezidenti Mahmud Kərimov iki ölkənin alimlərinin birgə tədqiqatlar aparmalarının əhəmiyyətindən danışaraq deyib ki, rusiyalı həmkarlarla qarşılıqlı maraq nöqtələri tapa bilsək, bu, hər iki tərəf üçün faydalı olacaq. Azərbaycan alimləri birgə tədqiqatlara öz töhfələrini verə bilərlər.
M.Kərimov diqqəti gənc azərbaycanlı alimlərin MDU-da və Rusiyanın digər elmi mərkəzlərində staj keçmələri imkanlarına cəlb edib, MDU-nun Bakı filialının açılmasının həm kadrların hazırlanması, həm də təcrübə və bilik mübadiləsi aparılan belə tədbirlərin təşkili baxımından əhəmiyyətini vurğulayıb.
Sonda qonaq MDU-nun Bakı filialının yeni kompleksinin maketi ilə tanış olub.

Paylaş:

Baxılıb: 1132 dəfə