Gənclər Qubadakı soyqırımı qurbanlarının xatirəsini yad edib

Bakı:

20 °C

88 %

3 m/s

Əlaqə

AZ RU EN

Ana səhifə / Siyasət / Gənclər Qubadakı soyqırımı qurbanlarının xatirəsini yad edib

Gənclər Qubadakı soyqırımı qurbanlarının xatirəsini yad edib

30.03.2011 [10:01]

YAP Gənclər Birliyinin təşkilatçılığı ilə 31 mart - Azərbaycanlıların soyqırımı gününə həsr olunmuş dəyirmi masa keçirilib
Erməni daşnaklarının Azərbaycan xalqına qarşı 1918-ci ildə gerçəkləşdirdiyi soyqırımının qurbanları hər il ölkə ictimaiyyəti tərəfindən yad edilir. Eyni zamanda, insanlıq əleyhinə yönələn bu qanlı faciənin beynəlxalq miqyasda tanıdılması məqsədilə görülən işlərin genişləndirilməsi istiqamətində mühüm addımlar atılır. Dünən Yeni Azərbaycan Partiyasının (YAP) Gənclər Birliyinin (GB) fəallarının xalqımıza qarşı ermənilərin törətdiyi vəhşiliklərin qanlı izlərindən biri olan Quba məzarlığına baş çəkməsi də bu baxımdan əhəmiyyət daşıyır.
Gənclərə məzarlıqla bağlı ətraflı məlumat verən AMEA-nın Arxeologiya və Etnoqrafiya İnstitutunun əməkdaşı Qəhrəman Ağayev Heydər Əliyev Fondunun təşəbbüsü ilə yaxın zamanlarda ərazidə muzeyin inşa olunacağını bildirib. Q.Ağayev onu da deyib ki, dörd il bundan əvvəl aşkarlanan kütləvi məzarlıqda 1918-ci ildə Hamazaspın başçılıq etdiyi erməni quldur dəstələri tərəfindən qətlə yetirilən 400-dən artıq dinc sakinin sümükləri aşkarlanıb. Erməni vəhşiliyinin danılmaz maddi sübutu olan və məlumatlara əsasən yerli sakinlərin özlərinə qazdırılan 2 böyük quyuda bir-birinin üzərinə yığılan cəsədlərin 100-dən çoxu qadın, 50-dən artığı uşaq, qalanları isə əsasən yaşlı kişilərə məxsusdur. Kəllə sümükləri üzərindəki balta və küt alətlərlə endirilən zərbə izləri, tapılan mismarlar, bir sıra hallarda üst çənədəki ön dişlərin çıxarılmış vəziyyətdə olması və sümüklər üzərindəki digər bir çox işgəncə əlamətləri soyqırımı qurbanlarının başına gətirilən zülm və vəhşiliklərin mənzərəsini insan təsəvvüründə canlandırır. Bir sözlə, üzərindən 93 il keçməsinə baxmayaraq, Quba məzarlığı 1918-ci ildə azərbaycanlılara qarşı törədilən soyqırımı dəhşətlərini əyani surətdə əks etdirir. Yəni, respublikamızın başqa regionlarında olduğu kimi, Quba ərazisində ermənilər tərəfindən törədilən soyqırımı da Azərbaycan xalqının ümumi faciəsidir. çünki 1918-ci ildə Azərbaycan türklərilə yanaşı, ərazidə yaşayan ləzgi, avar, tat, yəhudi və digər etnik qrupların nümayəndələri də amansızcasına qətlə yetirilərək məzarlıqda kütləvi şəkildə basdırılıblar.
Daha sonra YAP GB-nin fəallarının iştirakı ilə Quba Olimpiya Kompleksində 31 mart - Azərbaycanlıların soyqırımı gününə həsr olunmuş dəyirmi masa keçirilib. Tədbiri giriş sözü ilə açan YAP GB-nin sədri Seymur Orucov 93 il bundan əvvəl - 1918-ci il martın sonunda erməni silahlı birləşmələrinin azərbaycanlılara qarşı törətdiyi kütləvi qırğınlar və onun acı nəticələri barədə danışıb. O, Bakıda, Şamaxıda, Qubada, Lənkəranda və digər bölgələrdə törədilən bu qətliamlar zamanı on minlərlə həmvətənimizin qəddarcasına öldürüldüyünü, xalqımızın qiymətli maddi-mədəniyyət abidələrinin məhv edildiyini bildirib.
YAP Quba rayon təşkilatının sədri Ədalət Nəbiyev ermənilərin azərbaycanlılara qarşı zaman-zaman həyata keçirdikləri soyqırımı siyasəti və bunun acı nəticələrindən bəhs edərək bildirib ki, ermənilərin azərbaycanlılara qarşı soyqırımı törətməsinin dünya ictimaiyyətinin diqqətinə çatdırılması üçün Quba məzarlığında həm tarixi, həm əyani vəhşiliyi sübut edən faktları görmək mümkündür.
Daha sonra YAP GB-nin sədr müavini Aygün Əliyeva, YAP Quba rayon GB-in sədri Rəşidə Məhərrəmova, eləcə də, YAP GB-nin gənc fəalları-Anar Cəfərov, Vüsalə Niftəliyeva, Lamiyə Cəlilova, Sadiq Hacıyev və başqaları çıxış edərək soyqırımı həqiqətlərinin bütün dünya ictimaiyyətinə çatdırılmasının vacibliyini vurğulayıblar. Qeyd olunub ki, Azərbaycan dövlət müstəqilliyinə qovuşduqdan sonra soyqırımı barədə həqiqətlərin beynəlxalq təşkilatlara və dünya ictimaiyyətinə çatdırılması istiqamətində məqsədyönlü iş aparılıb, ümummilli lider Heydər Əliyevin 1998-ci il martın 26-da imzaladığı Fərmanla erməni millətçilərinin hərəkətlərinə hüquqi-siyasi qiymət verilib. O da vurğulanıb ki, Ulu öndərin layiqli davamçısı Prezident İlham Əliyevin rəhbərliyi ilə Azərbaycan həqiqətlərinin dünyaya çatdırılması uğrunda informasiya mübarizəsində hücum taktikası daha əzmlə davam etdirilməli, ermənilərin əsl simasının bütün xalqlara tanıdılması, bu soyqırımı hadisələrinə beynəlxalq ictimaiyyət tərəfindən hüquqi-siyasi qiymət verilməsi üçün ardıcıl iş aparılmalıdır.
Hülya MƏMMƏDLİ

Paylaş:

Baxılıb: 1198 dəfə