Vergilər Nazirliyində kollegiya iclası keçirilib

Bakı:

23 °C

62 %

7 m/s

Əlaqə

AZ RU EN

Ana səhifə / Siyasət / Vergilər Nazirliyində kollegiya iclası keçirilib

Vergilər Nazirliyində kollegiya iclası keçirilib

15.03.2011 [09:07]

İclasda araşdırma tələb edən vətəndaş müraciətlərinin səthi cavablar yazmaqla nəzarətdən çıxarılması hallarına yol vermiş idarə rəhbərləri ciddi tənqid olunub
Vergilər Nazirliyində vətəndaş müraciətlərinə baxılmasının vəziyyəti ilə bağlı məsələlərə həsr olunmuş kollegiya iclası keçirilib. İclasda qeyd olunub ki, 2006-cı il fevral ayının 1-dən etibarən dövlət vergi orqanlarında Avtomatlaşdırılmış Vergi İnformasiya Sisteminin (AVİS) tətbiq olunması nəticəsində vergi orqanlarında kargüzarlığın aparılmasında ciddi keyfiyyət dəyişiklikləri baş verib, sənədlərin icrası, vətəndaş müraciətlərinə baxılması proseslərini əvvəldən axıradək izləməyə imkan verən dəqiq və kifayət qədər təkmil nəzarət sistemi yaradılıb.
Vergi ödəyicilərinin, vətəndaşların vergi orqanlarına müraciətlərinin təhlil olunması, qarşıya çıxan problemlərin yerlərdə araşdırılması və müzakirə edilməsi, vergi ödəyicilərini narahat edən məqamların öyrənilməsi məqsədilə 2010-cu ildə nazir müavinləri və nazirliyin digər rəhbər işçilərinin iştirakı ilə 10 şəhərdə vergi ödəyiciləri ilə görüşlər və bu görüşlərin nəticələri də nəzərə alınmaqla dörd zona müşavirəsi keçirilib. Vergi ödəyiciləri tərəfindən qaldırılan məsələlər nəzarətə götürülərək onların icrası ilə bağlı tədbirlər planı təsdiq olunub.
ötən il ölkənin vergi orqanlarına 37.474 yazılı müraciət daxil olub. Onlardan 97,3 faizi ərizə, 2,6 faizi şikayət, 1 faizi təklif xarakterli olub, 283 müraciətin icrası xüsusi nəzarətə götürülub. Müraciətlərin 79,5 faizi müsbət həll olunub, qalanları barədə vətəndaşlara müvafiq izahatlar verilib. ötən il dövlət vergi orqanlarına cəmi 960 şikayət daxil olub ki, bu da 2009-cu illə müqayisədə 1164 vahid azdır. Vergi orqanlarının vəzifəli şəxslərinin hərəkəti (hərəkətsizliyi) ilə bağlı şikayətlərin sayı da 264 vahid azalıb.
Nazirliyin rəsmi internet səhifəsində (www.taxes.gov.az) vətəndaşların birbaşa vergilər nazirinə və digər rəhbər işçilərə müraciət etmələri üçün imkan yaradılıb, “195” Telefon Məlumat Xidmətinə müraciət edənlərin sayı 236.000 nəfərdən çox olub. Vergi orqanlarına daxil olmuş müraciətlərdən 272-nin və ya cəmi 0,7 faizinin baxılma müddəti gecikdirilib ki, bu da əvvəlki illə müqayisədə 355 vahid azdır. 8 saylı Ərazi Vergilər İdarəsində (ƏVİ) 22, 6 və 12 saylı ƏVİ-nin hər birində 12 vətəndaşın müraciətinə icra müddətləri pozulmaqla baxılıb.
İclasda o da qeyd olunub ki, bir sıra hallarda Ərazi Vergilər İdarələrinə daxil olan müraciətlər mövzulara və növlərə görə düzgün qeydiyyata alınmır, bu isə onların hansı məsələlərlə əlaqədar olduğunun müəyyən edilməsində çətinliklər yaradır. Bununla da vətəndaş müraciətlərinin dövlət idarəetmə sistemində oynadığı əsas rollardan biri, yəni, vətəndaşlarla əks əlaqə, sistemdəki real vəziyyət barədə ilk mənbədən məlumat əldə edilməsi imkanları məhdudlaşdırılır. Bunu nəzərə alaraq ötən ilin ikinci yarısından etibarən vətəndaş müraciətlərinin mövzular və növlər üzrə təsnifatı dəyişdirilib, keçirilmiş tədbirlər nəticəsində məsələ artıq öz həllini tapıb. Kollegiyada araşdırma tələb edən vətəndaş müraciətlərinin səthi, başdansovdu cavablar yazmaqla nəzarətdən çıxarılması hallarına yol vermiş idarə rəhbərləri ciddi tənqid olunub.
2010-cu ildə dövlət vergi orqanlarında 3111, o cümlədən, nazirliyin aparatında 819 vətəndaş qəbul edilib, onların müraciətlərinə müvafiq qaydada baxılaraq tədbirlər görülüb. Bununla yanaşı, bəzi vergi orqanlarında hələ də həm qəbul zamanı, həm də yazılı müraciətlərdə qaldırılan məsələlərin mahiyyəti üzrə axıradək düzgün araşdırılmaması, məsələnin müsbət həlli mümkün olmadıqda bunun səbəbləri barədə vətəndaşlara əsaslandırılmış izahatların verilməməsi hallarına rast gəlinir ki, nəticə etibarilə bu da təkrar müraciətlərə səbəb olur.
Nazirliyin aparatında və tabeli qurumlarında vətəndaş müraciətlərinə baxılması nəticəsində aşkarlanmış nöqsanlara görə 30 vergi orqanı əməkdaşına xəbərdarlıq edilib, 81 nəfərə töhmət, 40 nəfərə sonuncu xəbərdarlıqla şiddətli töhmət elan edilib, 2 nəfərin xüsusi rütbəsi bir pillə aşağı salınıb, 2 nəfər aşağı vəzifəyə keçirilib, 6 nəfərin vergi orqanlarında fəaliyyətinə xitam verilib.
Kollegiyada çıxış edən vergilər naziri Fazil Məmmədov xüsusi olaraq vurğulayıb ki, vergi orqanlarında vətəndaş müraciətlərinə baxılması məsələsi hər bir vergi orqanı üçün dövlət büdcəsinə vergi daxilolmalarının təmin olunması qədər əhəmiyyətlidir və bu sahədə hər hansı bir vəzifəli şəxs tərəfindən yol verilmiş nöqsanlara görə çox ciddi tədbirlər görülməlidir. Kollegiya müzakirə olunan məsələ barədə müvafiq qərar qəbul edib.
Nadir AZƏRİ

Paylaş:

Baxılıb: 1081 dəfə