BSU-nun jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və işlə təmin olunmaq üçün şərait yaradılacaq

Bakı:

30 °C

54 %

7 m/s

AZ RU EN

Ana səhifə / Siyasət / BSU-nun jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və işlə təmin olunmaq üçün şərait yaradılacaq

BSU-nun jurnalistika fakültəsində təhsil alan istedadlı tələbələrə qəzet redaksiyalarında təcrübə keçmək və işlə təmin olunmaq üçün şərait yaradılacaq

11.03.2011 [00:40]

Dünən Bakı Slavyan Universitetində (BSU) Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun təşəbbüsü ilə təhsil ocağının jurnalistika fakültəsinin tələbələri ilə ölkənin aparıcı media qurumlarının rəhbərləri arasında görüş keçirilib. Görüşün əhəmiyyətini xüsusi vurğulayan BSU-nun rektoru, AMEA-nın müxbir üzvü, professor Kamal Abdullayev bildirib ki, əsas məqsəd jurnalistika fakültəsinin istedadlı tələbələrinə qəzet redaksiyalarında təcrübə keçməkləri və gələcəkdə işlə təmin olunmaları üçün şərait yaratmaqdır.
Fondun həyata keçirdiyi layihənin gənclərin gələcəyinə dövlət qayğısının təzahürü olduğunu qeyd edən K.Abdullayev görüşün tələbələr üçün faydalı olacağına əminliyini ifadə edib. Layihə haqqında ətraflı məlumat verən Fondun icraçı direktoru Vüqar Səfərli bildirib ki, universitetin rəhbərliyi tərəfindən seçilən tələbələr beş ay ərzində qəzet redaksiyalarında müqavilə əsasında aparıcı təcrübə keçəcəklər. Bu müddətdə özünü doğruldan tələbələr gələcəkdə redaksiyada işlə təmin olunacaqlar.
Bu yaxınlarda Bakı Dövlət Universitetində (BDU) də bu cür görüşün keçirildiyini diqqətə çatdıran V.Səfərli hazırda BDU-nun jurnalistika fakültəsinin 22 tələbəsinin qəzet redaksiyalarında işə başladıqlarını vurğulayıb.
Azərbaycan Jurnalistlər Birliyinin sədri Elçin Şıxlı, Mətbuat Şurasının sədri Əflatun Amaşov və başqaları Fondun reallaşdırdığı layihəni yüksək qiymətləndirib, görüşün uğurlu nəticəsinə əminliklərini ifadə edib, eləcə də, gələcək jurnalistlərə məsləhət və tövsiyələrini veriblər.
Tələbənin sualını cavablandıran “Səs” qəzetinin baş redaktoru və “Səs” İnformasiya Agentliyinin baş direktoru Bəhruz Quliyev Bakı Slavyan Universitetində tələbələrin fəal olduğunu deyib. O bildirib ki, bir neçə il ərzində bu universitetdən redaksiyaya təcrübə keçmək üçün gələnlər və işləyənlər də var. Dövlətin mətbuata qayğısından danışan Bəhruz Quliyev vurğulayıb ki, bu diqqət ildən-ilə daha da artır.
Daha sonra “Yeni Azərbaycan” qəzetinin baş redaktoru Hikmət Babaoğlu çıxış edərək deyib ki, vətəndaş cəmiyyətinin əsas atributlarından biri vətəndaş-dövlət münasibətlərinin hüquq əsasında formalaşmasıdır: “Hər birimizin sosial statusu gün ərzində dəyişilir. Siz bu gün burada tələbə, burdan çıxdıqda metroda sərnişin, evə gedəndən sonra isə ailənizin üzvü olacaqsınız və s. Hüquqi dövlətdə bütün vətəndaşlar bərabər statusa malikdir. Ancaq bir də peşə məsələsi var. Azərbaycanda jurnalist peşəsinin statusu cəmiyyətin sosial piramidasında kifayət qədər üst mərtəbələrdədir. Son dövrlərdə Azərbaycan dövlətinin, Prezidentinin həyata keçirdiyi siyasət nəticəsində bu statusun peşə nüfuzu daha da artıb. Bu gün informasiya erasında hər bir jurnalist bütün məsələlərdə məhz, vətəndaşlıq mövqeyindən və milli maraqlardan çıxış etməlidir. Ona görə də, hansı peşənin sahibi olmaqdan asılı olmayaraq, ilk növbədə vətəndaş olmaq lazımdır”.
Görüşdə BSU-nun jurnalistika fakültəsinin tələbələrinin fəaliyyəti, xarici jurnalistlərlə birgə proqramları haqqında məlumat verilib.

Paylaş:

Baxılıb: 1121 dəfə