Bütün məsələlər Azərbaycanla razılaşdırılmalıdır!

Bakı:

26 °C

68 %

11 m/s

Əlaqə

AZ RU EN

Ana səhifə / Siyasət / Bütün məsələlər Azərbaycanla razılaşdırılmalıdır!

Bütün məsələlər Azərbaycanla razılaşdırılmalıdır!

01.11.2022 [10:07]

Regionla bağlı geosiyasi proseslər birmənalı olaraq rəsmi Bakı tərəfindən tənzimlənir

Bu fakt artıq dünyanın aparıcı dövlətləri tərəfindən də etiraf olunur

İlham Əliyev: Bundan sonra bölgədə gedən işlər, əlbəttə ki, Türkiyə və Azərbaycanın fəal iştirakı və izni ilə aparılacaq

Regionda marağı olan ölkələr, hətta Rusiya da anlayır ki, Ermənistanın başqa çıxış yolu yoxdur - Azərbaycanla sülh müqaviləsi imzalanmalıdır

Pərviz SADAYOĞLU

Vətən müharibəsində qazanılan qələbə istər regional, istərsə də qlobal miqyasda mühüm nəticələrə yol açıb. 30 ilə yaxın davam edən işğal faktını aradan qaldıran, torpaqlarını azad edən Azərbaycan regionda yeni geosiyasi reallıqlar formalaşdırıb. Həm siyasi, həm də hərbi sferadakı üstünlüklərini prosesə uğurla transformasiya edən Azərbaycanın bölgədə tənzimləyici rolu artıb. Eyni zamanda, regionla bağlı verilən qərarlarda mütləq şəkildə Azərbaycanın milli maraqları nəzərə alınır. Bu fakt artıq dünyanın aparıcı dövlətləri tərəfindən də etiraf olunur.

Azərbaycanın maraqları nəzərə alınmalıdır

Oktyabrın 27-də baş tutan Valday Beynəlxalq Diskussiya Klubunun 19-cu iclasının plenar sessiyasında çıxış edən Rusiya Prezidenti Vladimir Putinin çıxışındakı bəzi nüanslar da dediklərimizi təsdiqləyir. Belə ki, Rusiyanın dövlət başçısı Ermənistan ilə Azərbaycan arasındakı sülh gündəliyi ilə bağlı fikirlərini bildirərkən vurğulayıb ki, atılacaq hər bir addımla bağlı Azərbaycanın maraqları nəzərə alınmalıdır, bütün məsələlər Azərbaycanla razılaşdırılmalıdır. Bu fakt növbəti dəfə onu göstərir ki, regionla bağlı geosiyasi proseslər birmənalı olaraq rəsmi Bakı tərəfindən tənzimlənir. Başqa sözlə, ölkəmiz regionla bağlı geosiyasi proseslərdə mühüm üstünlüklərə malikdir.

Sülh gündəliyi Azərbaycanın mövqeyi ilə uzlaşdırılır

10 noyabr kapitulyasiyasına imza atan Ermənistan isə hələ də dayaq axtarışındadır. Məğlub ölkə olan Ermənistan sülh gündəliyini uzatmaq, proseslərin sürətini azaltmaq üçün bütün ünvanların “qapısını döyür”. Təbii ki, regionda marağı olan ölkələr, hətta Rusiya da anlayır ki, Ermənistanın başqa çıxış yolu yoxdur - Azərbaycanla sülh müqaviləsi imzalanmalıdır. Çünki Ermənistanın qeyri-konstruktiv mövqeyi regionda təhlükəsizliyin təmini ilə yanaşı, gələcək inkişafı da yubadır. Bu isə yeni qlobal iqtisadi düzənin formalaşmasına öz mənfi təsirlərini göstərir. 2020-ci il 10 noyabr, 2021-ci il 11 yanvar və 26 noyabr bəyanatlarına əməl etməyən, Rusiyanın vasitəçiliyi ilə həyata keiçrilən görüşlərdə üzərinə götürdüyü öhdəlikləri yerinə yetirməyən Ermənistan Avropa İttifaqının moderatorluğu ilə keçirilən görüşlər zamanı da səsləndirdiyi vədlərdən boyun qaçırır. Bu isə həmin ölkənin davranışlarının qeyri-adekvat olduğunu göstərir. Həm Rusiya, həm də Aİ sülh gündəliyini Azərbaycanın mövqeyi ilə uzlaşdırır. Ermənistana isə sonda bu qərara imza atmaq düşəcək. Rəsmi İrəvan nə qədər çalışsa da, başqa yolu yoxdur.

Türkiyə və Azərbaycanın fəal iştirakı və izni ilə...

İkinci Qarabağ müharibəsi regiondakı siyasi vəziyyəti köklü şəkildə dəyişdi. Azərbaycan yeni əməkdaşlıqlar platformalarını təsis etməkdədir. Artıq Azərbaycan - Türkiyə birliyi regionun aparıcı güc mərkəzinə çevrilib. Bütün parametrlər üzrə müttəfiqlik əlaqələrinə malik iki ölkə bölgənin siyasi-iqtisadi inkişafının yönünü məyyənləşdirir. İki dövlət arasında bağlanan “Şuşa bəyannaməsi” bu mənada xüsusi əhəmiyyət daşıyır. Yeri gəlmişkən, Prezident İlham Əliyev oktyabrın 20-də Zəngilan Beynəlxalq Hava Limanının açılışından sonra mətbuata bəyanatında da bildirib ki, bu gün Türkiyə-Azərbaycan birliyinin, qardaşlığının növbəti təntənəsidir. Türkiyə kimi qüdrətli ölkə bizim qardaşımızdır, bu, bizim üçün böyük xoşbəxtlikdir: “İkinci Qarabağ savaşı, savaşdan sonrakı dövr bu birliyi daha da gücləndirdi. Keçən il biz Şuşada Şuşa Bəyannaməsini imzaladıq və Türkiyə və Azərbaycan rəsmən müttəfiq oldu. Bütün sahələrdə müttəfiq oldu və bu, həm xalqlarımıza ciddi gözaydınlığıdır, eyni zamanda, bölgəyə və dünyaya ciddi mesajdır. Çünki Türkiyə-Azərbaycan birliyi bölgədə çox önəmli bir amildir. Bu, sülh, sabitlik amilidir. Ancaq, eyni zamanda, əgər kimsə yenə də bizə qarşı ədalətsiz hərəkət etmək istəsə, əlbəttə ki, bu amili ciddi nəzərə almalıdır”.

Bu amil, həm də onu deməyə əsas verir ki, regionla bağlı veriləcək qərarlarda, atılacaq addımlarda Azərbaycanın rəyi əsas götürüləcək. Ölkə başçısı bu məsələ ilə bağlı bildirib: “Bundan sonra bölgədə gedən işlər, əlbəttə ki, Türkiyə və Azərbaycanın fəal iştirakı və izni ilə aparılacaq. İstər siyasi təşəbbüslər, iqtisadiyyat, enerji, nəqliyyat - bütün bu sahələrdə bizim işbirliyimiz artıq regional çərçivədən çıxıb, beynəlxalq səviyyəyə qalxıbdır”.

Bəli, Azərbaycanın izni olmadan heç bir addım - nə siyasi, nə də iqtisadi müstəvidə addım atıla bilməz. Bu qalib ölkənin ortaya qoyduğu qətiyyətdən irəli gəlir.

Paylaş:

Baxılıb: 739 dəfə